വിവാഹ വേദിയിൽ ആടിപ്പാടി ഡാൻസ് കളിച്ച് വധു; പൊടുന്നനെ ക്യാമെറമാന് ഉദിച്ച ഐഡിയ; എനിക്കാ.. ഷോട്ട് തന്നെ വേണമെന്നും വാശി; വരൻ വധുവിനെ എടുത്ത് ചുംബിക്കാനൊരുങ്ങിയതും എല്ലാം ശുഭം; വേദിയിൽ വെടിപ്പൊട്ടി; യുവതിയുടെ പിൻഭാഗത്ത് പരിക്ക്; ദൃശ്യങ്ങൾ വൈറൽ
ബെംഗളൂരു: ഒരു വിവാഹമെന്ന മംഗളകർമ്മം ജീവിതത്തിൽ ഒരിക്കൽ മാത്രം നടക്കുന്ന അത്ഭുതമാണ്. അതൊരു പുസ്തക താളിൽ ഓർമിപ്പിക്കുവിധം കാത്ത് സൂക്ഷിക്കണം. അതുകൊണ്ട് തന്നെ നല്ല ഓർമ്മകളും നിമിഷങ്ങളും നമ്മൾ ക്യാമെറയിൽ പകർത്തും. അങ്ങനെയൊരു ഫോട്ടോഷൂട്ടിനിടെ നവദമ്പതികൾക്ക് സംഭവിച്ച കാര്യമാണ് ഇപ്പോൾ സോഷ്യൽ മീഡിയയിൽ വൈറലായിരിക്കുന്നത്.
വിവാഹ ഫോട്ടോഷൂട്ടിനിടെ കളര്‍ ബോംബ് പൊട്ടിത്തെറിച്ച് നവവധുവിന് സാരമായ പരിക്കുപറ്റി. ഫോട്ടോഷൂട്ടില്‍ പശ്ചാത്തലത്തില്‍ പൊട്ടിത്തെറിക്കേണ്ട കളര്‍ബോംബ്, ദമ്പതികളുടെ അടുത്തേക്ക് പാഞ്ഞെത്തുകയായിരുന്നു. വരന്‍ വധുവിനെ എടുത്തുയര്‍ത്തിയപ്പോഴാണ് കളര്‍ ബോംബ് പൊട്ടിത്തെറിച്ചത്. യുവതിയുടെ പിന്‍ഭാഗത്താണ് സാരമായ പരിക്കേറ്റത്.
കാനഡയില്‍ തന്നെ താമസമാക്കിയ ഇന്ത്യന്‍ വംശജരായ വിക്കിയും പിയയുമാണ് ബെംഗളൂരുവില്‍വെച്ച് കഴിഞ്ഞ ദിവസം വിവാഹിതരായത്. വിവാഹത്തിന് ശേഷം നടന്ന ഫോട്ടോഷൂട്ടിനിടെയായിരുന്നു കാര്യങ്ങൾ വഷളായത്. യുവതിയുടെ പിന്‍ഭാഗത്ത് പൊള്ളലേല്‍ക്കുകയും മുടിയുടെ ഭാഗം കരിഞ്ഞുപോവുകയുംചെയ്തു. വധുവിനെ വരന്‍ പൊക്കിയെടുത്ത് ചുംബിക്കാനൊരുങ്ങുമ്പോഴായിരുന്നു സ്ഥാനംതെറ്റിയെത്തിയ കളര്‍ ബോംബ് യുവതിയുടെ ശരീരത്തില്‍ പതിച്ചത്. തുടര്‍ന്ന് യുവതി ആശുപത്രിയില്‍ പ്രവേശിപ്പിക്കുകയും ചികിത്സ ലഭ്യമാക്കുകയും ചെയ്തു.
അതേസമയം, സംഭവത്തിന്റെ വീഡിയോ ദൃശ്യങ്ങൾ വൈറലാണ്. ദമ്പതികള്‍ തന്നെയാണ് പങ്കുവെച്ചത്. മറ്റുള്ളവര്‍ക്ക് ഒരു മുന്നറിയിപ്പ് എന്ന നിലയിലാണ് തങ്ങള്‍ വീഡിയോ പുറത്തുവിട്ടതെന്ന് അവര്‍ പ്രതികരിച്ചു.
മനോഹരമായൊരു ഷോട്ടിന് വേണ്ടി പശ്ചാത്തലത്തില്‍ കളര്‍ ബോംബുകള്‍ പൊട്ടിക്കുക എന്നതായിരുന്നു ലക്ഷ്യം. എന്നാല്‍, അത് പാളുകയും ഞങ്ങള്‍ക്ക് നേരെ പാഞ്ഞടുക്കുകയുംചെയ്തു', റീലിന്റെ ക്യാപ്ഷനില്‍ അവര്‍ പറയുന്നു.വീഡിയോയ്ക്ക് പിന്നാലെ സമൂഹ മാധ്യമങ്ങളിൽ ചൂട് പിടിച്ച ചർച്ചകൾ ആണ് നടക്കുന്നത്.
