വിഖ്യാത ഇറ്റാലിയൻ ഡിസൈനർ ജോർജിയോ അർമാനി അന്തരിച്ചു; വിടപറഞ്ഞത് വസ്ത്ര സങ്കൽപ്പങ്ങൾക്ക് പുതിയ മാനങ്ങൾ നൽകിയ ഡിസൈനർ; വിയോഗം ഫാഷൻ ലോകത്തിന് തീരാനഷ്ടം

മിലാൻ: വിഖ്യാത ഇറ്റാലിയൻ ഡിസൈനർ ജോർജിയോ അർമാനി അന്തരിച്ചു. 91 വയസ്സായിരുന്നു. വാർധക്യസഹജമായ അസുഖങ്ങളെ തുടർന്നാണ് അദ്ദേഹത്തിൻ്റെ അന്ത്യം. സ്ത്രീകളുടെയും പുരുഷന്മാരുടെയും വസ്ത്ര സങ്കൽപ്പങ്ങൾക്ക് പുതിയ മാനങ്ങൾ നൽകിയ അർമാനി, ഫാഷൻ രംഗത്തെ ഒരു ഇതിഹാസമായി വിശേഷിപ്പിക്കപ്പെടുന്നു.

അർമാനി എക്സ്ചേഞ്ച് ഗ്രൂപ്പിൻ്റെ സ്ഥാപകൻ കൂടിയായ ജോർജിയോ അർമാനി, ഹൗട്ട് കോച്ചർ, റെഡിമെയ്ഡ് വസ്ത്രങ്ങൾ, തുകൽ ഉൽപ്പന്നങ്ങൾ, ഷൂകൾ, വാച്ചുകൾ, ആഭരണങ്ങൾ, ഫാഷൻ അനുബന്ധ ഉൽപ്പന്നങ്ങൾ, കണ്ണടകൾ, സൗന്ദര്യവർദ്ധക വസ്തുക്കൾ, ഹോം ഇന്റീരിയറുകൾ എന്നിങ്ങനെ വിവിധ മേഖലകളിൽ തൻ്റേതായ വ്യക്തിമുദ്ര പതിപ്പിച്ചിട്ടുണ്ട്. അദ്ദേഹത്തിൻ്റെ ഡിസൈനുകൾ ലളിതവും എന്നാൽ ആകർഷകവുമായ ശൈലികൾക്ക് പേരുകേട്ടതായിരുന്നു.

തൻ്റെ അവസാന നാളുകളിലും കമ്പനിയുടെ പ്രവർത്തനങ്ങളിലും പുതിയ ഫാഷൻ ശേഖരങ്ങളുടെ രൂപകൽപ്പനയിലും അദ്ദേഹം സജീവമായി ഇടപെട്ടിരുന്നുവെന്ന് അർമാനി എക്സ്ചേഞ്ച് പുറത്തിറക്കിയ പ്രസ്താവനയിൽ അറിയിച്ചു. പ്രതിവർഷം 2 ബില്യൺ പൗണ്ടിലധികം വരുമാനം നേടുന്ന ഒരു പ്രമുഖ ബിസിനസ്സുകാരൻ കൂടിയായിരുന്നു അർമാനി.

ഹോളിവുഡുമായി അടുത്ത ബന്ധം പുലർത്തിയിരുന്ന അദ്ദേഹം കേറ്റ് ബ്ലാഞ്ചെറ്റ്, ജൂലിയ റോബർട്ട്സ് തുടങ്ങിയ ഇതിഹാസ താരങ്ങൾക്ക് ഓസ്കാർ പോലുള്ള ചടങ്ങുകളിൽ വസ്ത്രങ്ങൾ ഒരുക്കി. 'അമേരിക്കൻ ജിഗോളോ', 'ദ വോൾഫ് ഓഫ് വാൾ സ്ട്രീറ്റ്' തുടങ്ങിയ സിനിമകൾക്കും അദ്ദേഹം വസ്ത്രങ്ങൾ രൂപകൽപ്പന ചെയ്തിട്ടുണ്ട്. ഫാഷൻ ലോകത്തിന് തീരാ നഷ്ടമാണ് ജോർജിയോ അർമാനിയുടെ വിയോഗം.