മലേഷ്യയിലെ ഹൈവേയിൽ വിമാനം തകർന്ന് 10 മരണം; മരിച്ചത് വിമാനത്തിൽ സഞ്ചരിച്ച എട്ട് പേരും ഹൈവേയിലൂടെ സഞ്ചരിക്കുകയായിരുന്ന രണ്ട് പേരും; അപകട ദൃശ്യങ്ങൾ പുറത്ത്
ക്വാലാലംപൂർ: മലേഷ്യയിലെ റോഡിൽ ചെറുവിമാനം തകർന്നു വീണുണ്ടായ അപകടത്തിൽ 10 പേർ മരിച്ചു. വിമാനം തകർന്നു വീഴുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്. ഹൈവേയിലൂടെ സഞ്ചരിക്കുകയായിരുന്ന കാറിലെ ഡാഷ്‌ബോർഡ് കാമറയിലാണ് വിമാനം വീണ ദൃശ്യങ്ങൾ പതിച്ചത്. വിമാനത്തിൽ സഞ്ചരിച്ച എട്ട് പേരും ഹൈവേയിലൂടെ സഞ്ചരിക്കുകയായിരുന്ന രണ്ട് പേരുമാണ് മരിച്ചത്.
വിമാനം ഹൈവേയിലേക്ക് വീണ് അഗ്‌നിഗോളമായി മാറുകയായിരുന്നു. ഇതിന് പിന്നാലെ ശക്തമായ പുകയുമുണ്ടായി. 10 പേർ മരിച്ചുവെന്ന വിവരം മലേഷ്യൻ പൊലീസും സ്ഥിരീകരിച്ചിട്ടുണ്ട്. ഇതിൽ എട്ട് പേർ വിമാനത്തിലുണ്ടായിരുന്നവരാണ്. ഒരാൾ ഹൈവേയിലൂടെ ബൈക്കിൽ സഞ്ചരിക്കുകയായിരുന്നുവെന്നും മറ്റൊരാൾ കാറിൽ പോകുമ്പോഴാണ് അപകടത്തിൽപ്പെട്ടതെന്നും പൊലീസ് വ്യക്തമാക്കി.
മലേഷ്യയുടെ വടക്കൻ ദ്വീപായ ലങ്കാവിയിൽ നിന്നും യാത്ര തിരിച്ച വിമാനമാണ് അപകടത്തിൽപ്പെട്ടത്. ക്വാലാലംപൂരിലേക്കുള്ള യാത്രക്കിടെയായിരുന്നു സംഭവം. ആറ് യാത്രക്കാരും രണ്ട് ജീവനക്കാരുമാണ് വിമാനത്തിലുണ്ടായിരുന്നതെന്ന് മലേഷ്യൻ സിവിൽ ഏവിയേഷൻ അഥോറിറ്റി സ്ഥിരീകരിച്ചിട്ടുണ്ട്.
