റെസിഡൻസി വിസ നിയമത്തിൽ യുഎഇയിൽ പുതിയമാറ്റം

അബുദാബി: റെസിഡൻസി വിസ നിയമത്തിൽ പുതിയമാറ്റം വരുത്തി യുഎഇ. ആറ് മാസത്തിൽ കൂടുതൽ രാജ്യത്തിന് പുറത്ത് താമസിക്കുന്നവർക്കും റീ-എൻട്രി പെർമിറ്റിന് അപേക്ഷിക്കാനുള്ള അവസരമൊരുക്കും. റീ-എൻട്രി അനുമതിക്കായി ഫെഡറൽ അഥോറിറ്റിയുടെ ഔദ്യോഗിക വെബ്സൈറ്റ് വഴി അപേക്ഷിക്കാം.

ആറ് മാസക്കാലയളവിൽ രാജ്യത്തിന് പുറത്ത് താമസിച്ചതിന്റെ തെളിവ് റീ-എൻട്രി പെർമിറ്റിന് അപേക്ഷിക്കുമ്പോൾ സമർപ്പിക്കേണ്ടിവരും. വിവിധ ആവശ്യങ്ങൾക്കായി ചുരുങ്ങിയ കാലം നാട്ടിലെത്തുന്ന പ്രവാസികൾക്ക് ഗുണകരമാകുന്നതാണ് പുതിയ തീരുമാനം. ഫെഡറൽ അഥോറിറ്റി ഫോർ ഐഡന്റിറ്റി, സിറ്റിസൺഷിപ്പ്,കസ്റ്റംസ് ആൻഡ് പോർട്ട് സെക്യൂരിറ്റിയിൽനിന്ന് ഇ-മെയിൽ ലഭിച്ച ശേഷമേ അപേക്ഷകന് യുഎഇയിലേക്ക് വീണ്ടും പ്രവേശിക്കാൻ കഴിയൂ.

എമിറേറ്റ്സ് ഐഡി, വിസ തുടങ്ങിയ സേവനങ്ങൾക്കുള്ള ഫീസ് 100 ദിർഹമായി അടുത്തിടെ വർധിപ്പിച്ചിരുന്നു. സാധാരണ നിലയിൽ യുഎഇയിലെ ഒരു താമസക്കാരൻ 180 ദിവസം രാജ്യത്തിന് പുറത്ത് പോയാൽ റസിഡൻസി റദ്ദാക്കപ്പെടും.