വാടക വീട് എടുത്ത് ആരും കാണാതെ കുക്കിംഗ്; റെയ്‌ഡിനിടെ മുങ്ങൽ; ബാലിയിൽ ലഹരിക്കടത്ത് സംഘത്തിലെ ഉക്രേനിയൻ പൗരന് ജീവപര്യന്തം തടവ്; പ്രതി ദയ അർഹിക്കുന്നില്ലെന്ന് ജഡ്ജി
ബാലി: ഇന്തോനേഷ്യയിലെ പ്രമുഖ വിനോദസഞ്ചാര ദ്വീപായ ബാലിയിൽ പ്രവർത്തിക്കുന്ന റഷ്യൻ-ഉക്രേനിയൻ ലഹരിക്കടത്ത് സംഘത്തിലെ പ്രധാനിയായ ഉക്രേനിയൻ പൗരന് ജീവപര്യന്തം തടവ്. റോമൻ നസറെങ്കോയെയാണ് ഡെൻപാസാർ ജില്ലാ കോടതി കഠിനമായി ശിക്ഷിച്ചത്.
ഡിസംബറിൽ ബാങ്കോക്കിലെ സുവാർണ്ണഭൂമി വിമാനത്താവളത്തിൽ നിന്ന് ദുബായിലേക്ക് കടക്കാൻ ശ്രമിക്കുന്നതിനിടെയാണ് തായ് അധികൃതർ നസറെങ്കോയെ പിടികൂടിയത്. പിന്നീട് ഇന്തോനേഷ്യയിലേക്ക് കൈമാറുകയായിരുന്നു. 2024 മെയ് മാസത്തിൽ ബാലിയിലെ ഒരു വാടക വീടിന് നേരെ നടന്ന റെയ്ഡിൽ ലഹരിമരുന്ന് ഉത്പാദന കേന്ദ്രം കണ്ടെത്തിയതിനെ തുടർന്നാണ് ഇയാൾ ഒളിവിൽ പോയത്. ഈ കേന്ദ്രത്തിൽ നിന്ന് കഞ്ചാവ് ചെടികളും എക്സ്റ്റസി നിർമ്മിക്കാനുള്ള രാസവസ്തുക്കളും കണ്ടെത്തിയിരുന്നു.
നസറെങ്കോ ലഹരിക്കടത്ത് സംഘത്തിൻ്റെ മുഖ്യസൂത്രധാരന്മാരിൽ ഒരാളാണെന്ന് പ്രോസിക്യൂഷൻ വാദിച്ചു. താൻ ചതിക്കപ്പെടുകയായിരുന്നെന്ന് പ്രതിഭാഗം വാദിച്ചെങ്കിലും കോടതി അത് അംഗീകരിച്ചില്ല. "പ്രതിയെ ക്ഷമിക്കാനോ ന്യായീകരിക്കാനോ കാരണമില്ല. ചെയ്ത കുറ്റത്തിന് അനുസരിച്ചുള്ള ശിക്ഷ അർഹിക്കുന്നു," പ്രിസൈഡിംഗ് ജഡ്ജി എനി മാർട്ടിൻഗ്രം പറഞ്ഞു. "ഇയാളുടെ കുറ്റം യുവതലമുറയുടെ മാനസികാരോഗ്യത്തെ ദോഷകരമായി ബാധിക്കും."
ഇന്തോനേഷ്യയിലെ നാർക്കോട്ടിക്സ് ഏജൻസി മേധാവി മാർഥിനസ് ഹുകോം പറയുന്നതനുസരിച്ച്, ബാലിയിൽ റഷ്യൻ, ഉക്രേനിയൻ പൗരന്മാർ ചേർന്ന് ലഹരിക്കടത്ത് സംഘങ്ങൾ രൂപീകരിക്കുന്നത് വർധിച്ചു വരികയാണ്. യുദ്ധത്തിലുള്ള രണ്ട് രാജ്യങ്ങളിലെ പൗരന്മാർ ഇവിടെ കുറ്റകൃത്യങ്ങളിൽ പങ്കാളികളാകുന്ന ഈ പ്രതിഭാസം അസാധാരണമാണെന്ന് അദ്ദേഹം കൂട്ടിച്ചേർത്തു.
