മനസ്സിൽ ശാന്തതയുമായി ജീവിക്കുന്ന ജപ്പാൻകാരുടെ പേടിസ്വപ്നം; വർഷങ്ങൾക്കിപ്പുറം പെൻഗ്വിനിൽ കണ്ടത് അപൂർവ്വ ഇനത്തിൽ പെട്ട ആ മത്സ്യത്തെ; ലോകത്തെ നടുക്കി വീണ്ടും സുനാമി മുന്നറിയിപ്പോ?

മെൽബൺ: ഓസ്‌ട്രേലിയയിലെ ടാസ്മാനിയയിലെ തീരദേശ പട്ടണമായ പെൻഗ്വിൻ ബീച്ചിൽ 10 അടിയോളം നീളമുള്ള ഭീമാകാരമായ ഓർ മത്സ്യം (Giant Oarfish) അടിഞ്ഞത് പ്രാദേശികമായി ശ്രദ്ധ നേടി. വെള്ളിനിറമുള്ള, റിബൺ പോലെ നീണ്ട രൂപവും കിരീടം പോലുള്ള ചിറകുകളുമുള്ള ഈ അപൂർവ മത്സ്യത്തെ നായകളുമായി നടക്കാനിറങ്ങിയ നാട്ടുകാരാണ് ആദ്യം കണ്ടത്.

ഓർ മത്സ്യങ്ങൾ പൊതുവെ സമുദ്രോപരിതലത്തിൽ നിന്ന് 1500 മീറ്റർ വരെ താഴ്ചയിലാണ് വസിക്കുന്നത്. അതിനാൽ ഇവ കടൽത്തീരങ്ങളിൽ എത്തുന്നത് വളരെ അപൂർവമായ സംഭവമാണ്. 147 വർഷങ്ങൾക്ക് ശേഷമാണ് ഈ പ്രത്യേക മേഖലയിൽ വീണ്ടും ഓർ മത്സ്യത്തെ കണ്ടെത്തുന്നത്.

ജാപ്പനീസ് ഐതീഹ്യം അനുസരിച്ച്, ഓർ മത്സ്യം "ദുരന്തങ്ങളുടെ സന്ദേശവാഹകൻ" ആണ്. ഭൂകമ്പം, സുനാമി തുടങ്ങിയ വലിയ പ്രകൃതി ദുരന്തങ്ങൾ ഉണ്ടാകുന്നതിനു മുന്നോടിയായാണ് ഇവ കരയിലെത്തുകയെന്ന് വിശ്വാസമുണ്ട്. ഈ വിശ്വാസത്തിന് ശാസ്ത്രീയ അടിത്തറയില്ലെങ്കിലും, 2011-ലെ ഫുകുഷിമ ഭൂകമ്പത്തിന് മുമ്പ് ഈ മത്സ്യങ്ങളെ തീരത്ത് കണ്ടെത്തിയിരുന്നു. മത്സ്യം മരണാസന്നമായിരിക്കുമ്പോൾ മാത്രമാണ് കരയിലേക്ക് വരാൻ സാധ്യതയുള്ളതെന്ന് ഗവേഷകർ നിരീക്ഷിക്കുന്നു.