സിംഗപ്പൂർ: പ്രായം വെറുമൊരു അക്കം മാത്രമാണെന്ന് പലരും പറയാറുണ്ട്. എന്നാൽ സിംഗപ്പൂരിലെ പ്രശസ്ത ഫാഷൻ ഫോട്ടോഗ്രാഫറും മോഡലുമായ ചുവാൻഡോ ടാനെ കണ്ടാൽ ആ വാചകം അക്ഷരാർത്ഥത്തിൽ ശരിയാണെന്ന് തോന്നിപ്പോകും. കഴിഞ്ഞ മാർച്ച് 3-ന് 60 വയസ്സ് തികഞ്ഞ ടാൻ തന്റെ ജന്മദിനം ആഘോഷിച്ചത് ലോകശ്രദ്ധ ആകർഷിച്ചുകൊണ്ടാണ്. അറുപതാം വയസ്സിലും ഒരു മുപ്പതുകാരന്റെ ശാരീരികക്ഷമതയും യൗവനവും നിലനിർത്തുന്ന ടാൻ സമൂഹമാധ്യമങ്ങളിൽ വലിയ ചർച്ചകൾക്ക് വഴിതുറന്നു. അദ്ദേഹത്തിന്റെ അസാധാരണ രൂപം പലരെയും അമ്പരപ്പിക്കുകയും 'മനുഷ്യനോ വാമ്പയറോ?' എന്ന് ചോദിപ്പിക്കുകയും ചെയ്യുന്നു.

തന്റെ 60-ാം ജന്മദിനത്തിൽ, '60' എന്ന അക്കത്തിലെഴുതിയ ബലൂണുകൾക്ക് നടുവിൽ നിൽക്കുന്ന ചിത്രവും ഹൃദയസ്പർശിയായ കുറിപ്പുമാണ് ടാൻ ഇൻസ്റ്റാഗ്രാമിൽ പങ്കുവെച്ചത്. 'ഓരോ സൂര്യോദയവും നമുക്ക് ലഭിക്കുന്ന അവകാശമാണ്, അല്ലാതെ ഉറപ്പുള്ള ഒന്നല്ല. സമയം മാത്രമാണ് യഥാർത്ഥ സമ്പത്തെന്ന് ഈ 60-ാം ജന്മദിനം എന്നെ ഓർമ്മിപ്പിക്കുന്നു,' എന്ന് ടാൻ സോഷ്യൽ മീഡിയയിൽ കുറിച്ചു. പ്രകൃതിയിലേക്കും സൂര്യപ്രകാശത്തിലേക്കും മടങ്ങുക എന്നതാണ് ഇനി മുന്നോട്ടുള്ള വഴിയെന്നും അദ്ദേഹം കൂട്ടിച്ചേർത്തു.

ഈ പോസ്റ്റിന് 1.5 ദശലക്ഷത്തിലധികം ലൈക്കുകളാണ് ഇതിനോടകം ലഭിച്ചത്. '60 വയസ്സിലും 35-ന്റെ ലുക്ക്', 'ഇയാൾ മനുഷ്യനാണോ അതോ എൽഫ് വർഗ്ഗത്തിൽപ്പെട്ട ആളാണോ?' എന്നിങ്ങനെ പോകുന്നു ആരാധകരുടെ കമന്റുകൾ. 2017-ൽ 50 വയസ്സായിരുന്നപ്പോഴാണ് ചുവാൻഡോ ടാൻ ആദ്യമായി ഇന്റർനെറ്റിൽ തരംഗമായത്. ജാനറ്റ് ജാക്സൺ, റീറ്റ ഓറ, ഷു ക്വി തുടങ്ങിയ പ്രശസ്ത താരങ്ങൾക്കൊപ്പം പ്രവർത്തിച്ചിട്ടുള്ള മുൻനിര ഫോട്ടോഗ്രാഫറാണ് അദ്ദേഹം.

അസാധാരണമായ ഈ യൗവനത്തിന് പിന്നിൽ യാതൊരു മാന്ത്രിക മരുന്നുകളോ അത്ഭുത ചികിത്സകളോ ഇല്ലെന്ന് ടാൻ ആവർത്തിച്ചു വ്യക്തമാക്കുന്നു. വർഷങ്ങളായുള്ള ചിട്ടയായ ജീവിതശൈലിയാണ് ഇതിന് കാരണം. പ്രോട്ടീൻ ഷേക്കുകൾ അല്ലെങ്കിൽ ഓട്‌സ്, മുട്ട, തേൻ, അവോക്കാഡോ എന്നിവയാണ് ടാനിന്റെ പ്രഭാതഭക്ഷണം.

ഗ്രിൽ ചെയ്തതോ സ്റ്റീം ചെയ്തതോ ആയ ചിക്കൻ അല്ലെങ്കിൽ മത്സ്യം, കൂടെ അല്പം ചോറും സൂപ്പുമാണ് ഉച്ചഭക്ഷണത്തിനും അത്താഴത്തിനുമായി ടാൻ തിരഞ്ഞെടുക്കുന്നത്. മദ്യം, പുകവലി, കാപ്പി, മധുരപലഹാരങ്ങൾ എന്നിവയിൽ നിന്ന് അദ്ദേഹം പൂർണ്ണമായും അകന്നുനിൽക്കുന്നതും ഈ ആരോഗ്യ രഹസ്യത്തിന് പിന്നിലുണ്ട്. ടാൻ പിന്തുടരുന്ന ഈ ജീവിതശൈലി കാലം മായ്ക്കാത്ത രൂപത്തിന്റെ പ്രാധാന്യം വിളിച്ചോതുകയും ആരോഗ്യകരമായ ശീലങ്ങളുടെ സ്വാധീനം വ്യക്തമാക്കുകയും ചെയ്യുന്നു.

സോഷ്യൽ ലോകംവയസ്സ്

സ്വന്തം ലേഖകൻ