പാരീസ്: ലോക ഫാഷൻ ലോകത്തിന്റെ ആസ്ഥാനമായ പാരീസിലെ ചരിത്രപ്രസിദ്ധമായ പാലൈസ് ഗാർനിയർ ഒപ്പേറ ഹൗസിൽ നടന്ന പാരീസ് ഫാഷൻ വീക്കിൽ, പത്തു വയസ്സുകാരനായ മാക്സ് അലക്സാണ്ടർ തന്റെ 'couture to the max' ബ്രാൻഡിന്റെ ഡിസൈനുകളുമായി ശ്രദ്ധേയനായി. എട്ടാം വയസ്സിൽ ന്യൂയോർക്ക് ഫാഷൻ വീക്കിൽ അരങ്ങേറ്റം കുറിച്ച മാക്സ്, ഏഴാം വയസ്സിൽ ലോകത്തിലെ ഏറ്റവും പ്രായം കുറഞ്ഞ റൺവേ ഡിസൈനർ എന്ന ഗിന്നസ് വേൾഡ് റെക്കോർഡ് നേടിയിരുന്നു. ഈ നേട്ടങ്ങൾക്ക് പിന്നാലെയാണ് പാരീസിലെ ഈ വിജയക്കൊടി.

പ്രതിഭാധനനായ ബാലൻ എന്നതിലുപരി, ഹോളിവുഡ് താരങ്ങളായ ഷാരോൺ സ്റ്റോൺ, ഡെബ്ര മെസ്സിംഗ് എന്നിവരുടെ പ്രിയപ്പെട്ട ഡിസൈനർ കൂടിയാണ് മാക്സ്. കരിയറിൽ ഇതുവരെ 150-ലധികം വൈവിധ്യമാർന്ന വസ്ത്രങ്ങൾ രൂപകൽപ്പന ചെയ്ത മാക്സ്, ഡ്രസ്സുകൾ, ജാക്കറ്റുകൾ, കിമോണോകൾ, ബാഗുകൾ തുടങ്ങിയ നിരവധി ഡിസൈനുകൾക്ക് രൂപം നൽകിയിട്ടുണ്ട്.

ഇത്തവണ പാരീസ് ഫാഷൻ വീക്കിൽ മാക്സ് അവതരിപ്പിച്ച 15 വസ്ത്രങ്ങളിൽ 90 ശതമാനവും പരിസ്ഥിതി സൗഹൃദ വസ്തുക്കൾ ഉപയോഗിച്ചുള്ളവയായിരുന്നു. ഇന്ത്യയിൽ നിന്നുള്ള വിന്റേജ് സാരി ഉപയോഗിച്ച് തയ്യാറാക്കിയ ഫ്ലോറൽ സ്ലീവ്‌ലെസ് വസ്ത്രം ഇന്ത്യൻ ആരാധകരെ ഏറെ ആകർഷിച്ചു. കോഫി ബീൻ ചാക്കുകൾ ഉപയോഗിച്ച് വസ്ത്രങ്ങൾ നിർമ്മിച്ചും, മഞ്ഞളും ബീറ്റ്റൂട്ടും ഉപയോഗിച്ച് സ്വാഭാവിക നിറങ്ങൾ നൽകിയും മാക്സ് ഫാഷൻ ലോകത്ത് തന്റേതായ പാത വെട്ടിത്തുറന്നു.

മിക്ക ഡിസൈനർമാരും ആദ്യം സ്കെച്ചുകൾ തയ്യാറാക്കുമ്പോൾ, മാക്സ് തുണികൾ മാനെക്വിനിൽ നേരിട്ട് ചുറ്റിയെടുക്കുന്ന 'ഡ്രേപ്പിംഗ്' രീതിയാണ് പിന്തുടരുന്നത്. മൂന്നാം വയസ്സിൽ തന്നെ താനൊരു ഡിസൈനറാണെന്ന് പ്രഖ്യാപിച്ച മാക്സിന്റെ ആദ്യ മോഡൽ സ്വന്തം സഹോദരി സാമന്തയായിരുന്നു.

ലോകപ്രശസ്തനായ ഡിസൈനറാണെങ്കിലും, വീട്ടിൽ മാക്സ് സാധാരണ പത്തുവയസ്സുകാരന്റെ സന്തോഷങ്ങളിലാണ്. ടെന്നീസ് കളിക്കാനും പാചകം ചെയ്യാനും ഇഷ്ടപ്പെടുന്ന മാക്സിന്റെ സ്വകാര്യത മാതാപിതാക്കൾ ശ്രദ്ധയോടെ സംരക്ഷിക്കുന്നു. പ്രായം വെറുമൊരു അക്കം മാത്രമാണെന്ന് തെളിയിച്ചുകൊണ്ട്, മാക്സ് അലക്സാണ്ടർ ഫാഷൻ ലോകത്ത് തന്റേതായ ഒരിടം ഇതിനോടകം ഉറപ്പിച്ചു കഴിഞ്ഞു.

പാരീസ് ഫാഷൻ വീക്ക്മാക്സ് അലക്സാണ്ടർ

സ്വന്തം ലേഖകൻ