ജോലിസ്ഥലത്ത് സിന്ദൂരവും താലിയും ധരിച്ചെത്തിയാൽ എന്താ..കുഴപ്പം? എഞ്ചിനീയറായ ഇന്ത്യൻ യുവതിയുടെ വാക്കുകൾ ചർച്ചകളിൽ; സഹപ്രവർത്തകരുടെ പ്രവർത്തിയിൽ അമ്പരപ്പ്
ലണ്ടൻ: വിദേശത്തെ ഒരു പ്രമുഖ കമ്പനിയിൽ ജോലി ചെയ്യുന്ന ഇന്ത്യൻ എൻജിനീയറായ യുവതി, തന്റെ ഓഫീസിലെ ഒരു സാധാരണ ദിവസത്തെ അനുഭവമാണ് പങ്കുവെച്ചത്. വിവാഹിതയായ താൻ പതിവുപോലെ സിന്ദൂരവും മംഗളസൂത്രവും ധരിച്ചാണ് ഓഫീസിലെത്തിയത്. എന്നാൽ ഇത് കണ്ട മറ്റൊരു ഇന്ത്യൻ സഹപ്രവർത്തക പരിഹാസ രൂപേണ സംസാരിക്കുകയായിരുന്നു.
സിന്ദൂരവും മംഗളസൂത്രവും ധരിക്കുന്നത് സ്ത്രീകളെ അടിച്ചമർത്തുന്നതിന്റെയും പുരാതനമായ ആചാരങ്ങളെ മുറുകെ പിടിക്കുന്നതിന്റെയും ലക്ഷണമാണെന്നും, ആധുനിക ലോകത്ത് ഒരു എൻജിനീയറെപ്പോലെയുള്ള ഉന്നത ഉദ്യോഗസ്ഥയ്ക്ക് ഇത് ചേർന്നതല്ലെന്നുമാണ് സഹപ്രവർത്തക വാദിച്ചത്. താൻ പുരോഗമന ചിന്താഗതിക്കാരിയാണെന്ന് വരുത്തിതീർക്കാനുള്ള ശ്രമത്തിനിടെയാണ് സഹപ്രവർത്തക ഈ വിവേചനപരമായ പരാമർശം നടത്തിയത്.
തന്റെ സംസ്കാരത്തിന്റെ ഭാഗമായ അടയാളങ്ങൾ ധരിക്കുന്നത് തന്റെ വ്യക്തിപരമായ താൽപ്പര്യമാണെന്നും അതിൽ മറ്റൊരാൾക്ക് ഇടപെടാൻ അവകാശമില്ലെന്നും യുവതി വ്യക്തമാക്കി. "സ്ത്രീ സ്വാതന്ത്ര്യത്തെക്കുറിച്ചും പുരോഗമനത്തെക്കുറിച്ചും സംസാരിക്കുന്നവർ തന്നെ മറ്റൊരു സ്ത്രീയുടെ വസ്ത്രധാരണത്തെയും ആചാരങ്ങളെയും ജഡ്ജ് ചെയ്യുന്നത് ഖേദകരമാണ്" എന്ന് യുവതി തന്റെ പോസ്റ്റിൽ കുറിച്ചു.
പലരും യുവതിയെ പിന്തുണച്ചു. വിദേശ രാജ്യങ്ങളിൽ ജോലി ചെയ്യുമ്പോഴും സ്വന്തം വേരുകളെയും സംസ്കാരത്തെയും മുറുകെ പിടിക്കുന്നത് അഭിമാനകരമായ കാര്യമാണെന്ന് ഇവർ വാദിക്കുന്നു. ഒരാൾ എന്ത് ധരിക്കണം എന്നത് അവരുടെ വ്യക്തിസ്വാതന്ത്ര്യമാണെന്നും, അതിനെ ബഹുമാനിക്കുന്നതാണ് യഥാർത്ഥ പുരോഗമനമെന്നും പലരും ചൂണ്ടിക്കാട്ടി. പാശ്ചാത്യ വസ്ത്രങ്ങൾ ധരിച്ചാൽ മാത്രം പുരോഗമനവാദിയാവില്ലെന്നും ഇവർ ഓർമ്മിപ്പിച്ചു. വിദേശികൾ പോലും ഇന്ത്യൻ സംസ്കാരത്തെ ബഹുമാനിക്കുമ്പോൾ, സ്വന്തം നാട്ടുകാർ തന്നെ ഇത്തരം കാര്യങ്ങളെ പരിഹസിക്കുന്നത് ലജ്ജാകരമാണെന്ന് കമന്റുകൾ ഉയർന്നു.
