കൊറിയൻ പോപ് താരം മൂൺ ബിൻ വീടിനുള്ളിൽ മരിച്ചനിലയിൽ; മ്യൂസിക് ബാൻഡ് ആസ്‌ട്രോയിലെ അംഗത്തിന്റെ മരണത്തിൽ പൊലീസ് അന്വേഷണം
സിയോൾ: കൊറിയൻ പോപ് താരം മൂൺ ബിനി (25) നെ വീടിനുള്ളിൽ മരിച്ച നിലയിൽ കണ്ടെത്തി. കൊറിയൻ മ്യൂസിക് ബാൻഡായ ആസ്‌ട്രോയിലെ അംഗമായിരുന്നു. ആസ്‌ട്രോയുടെ മാനേജ്‌മെന്റ് കമ്പനിയായ ഫന്റാജിയോ ആണ് മരണവാർത്ത പുറത്തുവിട്ടത്. കഴിഞ്ഞ ദിവസം രാത്രി എട്ടോടെയാണ് സിയോളിലെ വസതിയിൽ മരിച്ച നിലയിൽ കണ്ടെത്തിയത്. മരണകാരണം വ്യക്തമല്ല. 2016ലാണ് മൂൺ ബിൻ ആസ്‌ട്രോയിലെത്തുന്നത്.
കഴിഞ്ഞ ദിവസം രാത്രി 8.10 ഓടെയാണ് സോളിലെ ഗൻഗ്‌നം ജില്ലയിലെ വീട്ടിൽ മൂൺബിന്നിനെ ബോധരഹിതനായി മാനേജർ കണ്ടെത്തുകയായിരുന്നു. തുടർന്ന് പൊലീസിനെ വിവിരമറിയിക്കുകയായിരുന്നു. മൃതദേഹം പോസ്റ്റുമോർട്ടത്തിനായി ആശുപത്രിയിലേക്ക് മാറ്റിയിട്ടുണ്ട്. പൊലീസ് അന്വേഷണം പ്രഖ്യാപിച്ചിട്ടുണ്ട്.
ദക്ഷിണ കൊറിയൻ ന്യൂസ് ഔട്ട്‌ലെറ്റായ സൂംപിയാണ് വാർത്ത റിപ്പോർട്ട് ചെയ്തത്. ഗായകന്റെ മരണത്തിൽ സംഗീതലോകവും സുഹൃത്തുക്കളും ആരാധകരുമെല്ലാം അനുശോചനം രേഖപ്പെടുത്തി.
2016 ഫെബ്രുവരി 23 നാണ് മൂൺബിൻ കാലരംഗത്ത് എത്തുന്നത്. പ്രശസ്ത കെ-ഡ്രാമയായ 'ബോയ്‌സ് ഓവർ ഫ്‌ളവേഴ്‌സിൽ' കിം ബുമ്മിന്റെ കഥാപാത്രത്തിന്റെ ബാല്യകാലം അവതരിപ്പിച്ചത് മൂൺബിൻ ആയിരുന്നു. പിന്നീടാണ് ആസ്‌ട്രോ ബാൻഡിൽ അംഗമാകുന്നത്.
