ഇന്ത്യന് വിദ്യാര്ഥി യുകെയില് കുത്തേറ്റു മരിച്ചു; ഹരിയാന സ്വദേശിയായ വിജയ് കുമാര് ഷിയോറന്റെ കൊലപാതകത്തില് അന്വേഷണം തുടങ്ങി
ഇന്ത്യന് വിദ്യാര്ഥി യുകെയില് കുത്തേറ്റു മരിച്ചു
ലണ്ടന്: യുകെയില് ഇന്ത്യന് വിദ്യാര്ഥി കുത്തേറ്റു മരിച്ചു. ഹരിയാന സ്വദേശിയായ വിജയ് കുമാര് ഷിയോറന്(30) ആണ് കൊല്ലപ്പെട്ടത്. സംഭവത്തില് അന്വേഷണം ആരംഭിച്ചതായി പൊലീസ് സ്ഥിരീകരിച്ചു. നവംബര് 25ന് പുലര്ച്ചെ 4.15 ഓടെ യുകെയിലെ വോര്സെസ്റ്ററിലെ ബാര്ബോണ് റോഡില് ഗുരുതരമായി പരിക്കേറ്റ നിലയിലാണ് വിജയ് കുമാറിനെ വെസ്റ്റ് മെര്സിയ പൊലീസ് കണ്ടെത്തിയത്. ഉടന് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.
സംഭവവുമായി ബന്ധപ്പെട്ട് അഞ്ച് പേരെ അറസ്റ്റ് ചെയ്തിട്ടുണ്ട്. ഇവരെ ചോദ്യം ചെയ്തുവരികയാണ്. കൊലപാതകത്തിലേക്ക് നയിച്ച കാരണങ്ങള് കണ്ടെത്താന് വിപുലമായ അന്വേഷണം തുടരുകയാണെന്ന് ഡിറ്റക്റ്റീവ് ചീഫ് ഇന്സ്പെക്ടര് ലീ ഹോള്ഹൗസ് അറിയിച്ചു.
ചാര്ഖി ദാദ്രിയിലെ ജാഗ്രാംബാസ് ഗ്രാമത്തില് നിന്നുള്ള വിജയ് കുമാര് ഇംഗ്ലണ്ടിലെ ബ്രിസ്റ്റലിലുള്ള വെസ്റ്റ് ഓഫ് ഇംഗ്ലണ്ട് യൂണിവേഴ്സിറ്റിയില് പഠിക്കുകയായിരുന്നു.മൃതദേഹം നാട്ടിലെത്തിക്കാന് സഹായം അഭ്യര്ഥിച്ച് കുടുംബം വിദേശകാര്യ മന്ത്രി എസ്. ജയശങ്കറിന് കത്തയച്ചു.
