ഡാറ്റ്സൺ ഇല്ല ഇനി നിസാൻ മാത്രം; ഫോർഡിന് പിന്നാലെ ഡാറ്റ്സണും ഇന്ത്യ വിടുന്നു; പ്രവർത്തനം അവസാനിപ്പിക്കുന്നത് രാജ്യാന്തര ലയന തന്ത്രത്തിന്റെ ഭാഗമായി; റെഡി ഗോ മോഡലിന്റെ വിൽപന സ്റ്റോക്ക് തീരും വരെ തുടരുമെന്ന് കമ്പനി
തിരുവനന്തപുരം: കഴിഞ്ഞ രണ്ടു വർഷം ഇന്ത്യൻ വാഹനവിപണി വൻ വീഴ്ചകൾക്ക് സാക്ഷ്യംവഹിച്ച കാലമാണ്. ഫോർഡ് ഇന്ത്യ വിട്ടതും ഒടുവിൽ വോക്സ് വാഗൺ പോളോ ഉത്പാദനം നിർത്തിയതും കഴിഞ്ഞ രണ്ട് വർഷങ്ങൾക്കിടയിലാണ്. ആ പട്ടികയിൽ പുതിയൊരു പേര് കൂടി എഴുതിച്ചേർക്കുകയാണ് ഇപ്പോൾ.ജപ്പാൻ കരുത്തായ നിസാന്റെ കീഴിലുള്ള ബഡ്ജറ്റ് ബ്രാൻഡായ ഡാറ്റ്സണാണ് ഇന്ത്യ വിടുന്ന എറ്റവും പുതിയ ബ്രാൻഡ്.
ഡാറ്റ്‌സണിന്റെ ജനപ്രിയ മോഡലായ റെഡി ഗോ മോഡലിന്റെ വിൽപന സ്റ്റോക്ക് തീരും വരെ തുടരും. ഡാറ്റ്സൺ ബ്രാൻഡിന് നിസാനുമായി ലയിപ്പിക്കുന്ന രാജ്യാന്തര തന്ത്രത്തിന്റെ ഭാഗമായാണ് ഇന്ത്യയിലെ പ്രവർത്തനം അവസാനിപ്പിക്കുന്നത്. നേരത്തെ ഇന്തോനീഷ്യ, റഷ്യ തുടങ്ങിയ രാജ്യങ്ങളിലും ഡാറ്റ്‌സണിന്റെ പ്രവർത്തനം നിസാൻ അവസാനിപ്പിച്ചിരുന്നു.
ഇന്ത്യയിൻ ഇനി പുറത്തിറങ്ങുന്ന ബജറ്റ് കാറുകൾ അടക്കം നിസാൻ ബ്രാൻഡിന് കീഴിലായിരിക്കും. റെഡിഗോ, ഗോ, ഗോ പ്ലസ് തുടങ്ങിയ മോഡലുകളാണ് ഡാറ്റ്സൺ ബ്രാൻഡിന് കീഴിൽ ഇന്ത്യയിലെത്തിയത്. അതിൽ ഗോ, ഗോ പ്ലസ് എന്നിവയുടെ ഉൽപാദനം നേരത്തേ നിർത്തിയിരുന്നു. സർവീസ്, പാർട്‌സ് ലഭ്യത, വാറന്റി എന്നിവ തുടരുമെന്നും കമ്പനി അറിയിച്ചു.
ഡാറ്റ്സൺ റെഡിഗോയുടെ ചെന്നൈ പ്ലാന്റിലെ ഉൽപ്പാദനം കമ്പനി നിർത്തിവച്ചതായി കാർ വാലെ, ഹിന്ദുസ്ഥാൻ ടൈംസ് ഓട്ടോ തുടങ്ങിയ മാധ്യമങ്ങൾ റിപ്പോർട്ട് ചെയ്യുന്നു.നിലവിലുള്ള സ്റ്റോക്കിന്റെ വിൽപ്പനയും ഒപ്പം ദേശീയ ഡീലർഷിപ്പ് ശൃംഖല വഴി വിൽപ്പനാനന്തര സേവനവും വാറന്റി പിന്തുണയും പാർട്‌സുകളുടെ ലഭ്യത ഉറപ്പാക്കുന്നതും കമ്പനി തുടരും എന്നാണ് റിപ്പോർട്ടുകൾ.
കമ്പനി ഗോ , ഗോ പ്ലസ് എന്നിവയുടെ നിർമ്മാണം കുറച്ച് മുമ്പ് നിർത്തിയിരുന്നു. കഴിഞ്ഞ കുറച്ച് വർഷങ്ങളായി, ആഗോളതലത്തിൽ ഡാറ്റ്സൺ ബ്രാൻഡിനെ ഘട്ടംഘട്ടമായി നിർത്തലാക്കാൻ നിസാൻ പദ്ധതിയിട്ടിരുന്നു. 2020-ൽ റഷ്യയിലും ഇന്തോനേഷ്യയിലും ഡാറ്റ്സൺ ബ്രാൻഡ് കമ്പനി നിർത്തലാക്കിയിരുന്നു. ഇതുവരെ ഡാറ്റ്സൺ ബ്രാൻഡ് പ്രവർത്തനക്ഷമമായ അവസാന വിപണി ഇന്ത്യ ആയിരുന്നു.ഡാറ്റ്സൺ ബ്രാൻഡ് കുറച്ച് നാളുകളായി കുറഞ്ഞ വിൽപ്പന സംഖ്യയുമായി മല്ലിടുകയായിരുന്നു. 2020-ൽ ഡാറ്റ്‌സണിൽ നിന്ന് അപ്‌ഡേറ്റ് ലഭിച്ച അവസാന ഉൽപ്പന്നമാണ് റെഡിഗോ.
ചെന്നൈ പ്ലാന്റിലെ റെഡി-ഗോയുടെ ഉൽപ്പാദനം അവസാനിപ്പിച്ചതായി കമ്പനി ബുധനാഴ്ച സ്ഥിരീകരിച്ചതോടെ നിസാൻ മോട്ടോർ ഇന്ത്യ ഡാറ്റ്സൺ ബ്രാൻഡിന്റെ രാജ്യത്തെ നീണ്ട, ഏറെക്കുറെ ശ്രദ്ധേയമല്ലാത്ത ഓട്ടം അവസാനിപ്പിച്ചത് എന്ന് എച്ച്ടി ഓട്ടോ റിപ്പോർട്ട് ചെയ്യുന്നു. ഡാറ്റ്സൻ ഇപ്പോൾ ലോകമെമ്പാടും അതിന്റെ അവസാന ഘട്ടത്തിലാണ്. അതിന്റെ മോഡലുകൾ ചുരുക്കം ചില വിപണികളിൽ മാത്രമേ ലഭ്യമാകൂ.
ഡാറ്റ്സൺ ബ്രാൻഡ് ഇന്ത്യയിൽ നിസാൻ ആണ് കൈകാര്യം ചെയ്യുന്നത്.ഗോ പ്ലസ്, ഗോ , റെഡി ഗോ തുടങ്ങിയ മോഡലുകൾ പണത്തിന് മൂല്യം നൽകാനുള്ള നിർദ്ദേശത്തിൽ വലിയ തോതിൽ മുന്നേറാൻ ശ്രമിച്ചെങ്കിലും വിൽപ്പന എണ്ണം വളരെ കുറവായിരുന്നു. എന്നിരുന്നാലും, റെഡി-ഗോയുടെ സ്റ്റോക്കുള്ള വിൽപ്പന തുടരുമെന്നും നിലവിലുള്ള ഡാറ്റ്സൺ വാഹന ഉടമകൾക്ക് ഇപ്പോഴും സേവനം നൽകുമെന്നും നിസാൻ ഉറപ്പുനൽകുന്നു. ചെന്നൈ പ്ലാന്റിൽ ഡാറ്റ്സൺ റെഡി-ഗോയുടെ ഉത്പാദനം നിർത്തിയതായി കമ്പനി വാർത്താക്കുറിപ്പിൽ അറിയിച്ചു.
മോഡലിന്റെ വിൽപ്പന ഇപ്പോഴും തുടരുകയാണ്. ഉപഭോക്തൃ സംതൃപ്തി മുൻഗണനയായി തുടരുമെന്ന് നിലവിലുള്ളതും ഭാവിയിലെതുമായ എല്ലാ ഡാറ്റ്സൺ ഉടമകൾക്കും ഉറപ്പുനൽകുന്നതായും കൂടാതെ കമ്പനിയുടെ ദേശീയ ഡീലർഷിപ്പ് നെറ്റ്‌വർക്കിൽ നിന്ന് ഉയർന്ന തലത്തിലുള്ള ആഫ്റ്റർസെയിൽ സേവനവും പാർട്‌സ് ലഭ്യതയും വാറന്റി പിന്തുണയും തുടർന്നും നൽകും എന്നും കമ്പനി വ്യക്തമാക്കിയതായി എച്ച്ടി ഓട്ടോ റിപ്പോർട്ട് ചെയ്യുന്നു.
2020 ഡിസംബറിൽ പുറത്തിറക്കിയ മാഗ്‌നൈറ്റ് സബ്-കോംപാക്റ്റ് എസ്യുവിയിലാണ് നിസാൻ ഇന്ത്യ ഇപ്പോൾ ശ്രദ്ധ കേന്ദ്രീകരിക്കുന്നത്. നിസാനെ സംബന്ധിച്ച് മാഗ്‌നൈറ്റ് ഒരു മുഖ്യ ഉൽപ്പന്നമാണ്. നിസാനെ രക്ഷിക്കാൻ മാഗ്നൈറ്റിന് വലിയ തോതിൽ കഴിഞ്ഞു. ആകർഷകമായ ലുക്ക്, പെപ്പി ടർബോ എഞ്ചിൻ, എക്‌സ്‌ട്രോണിക് ട്രാൻസ്മിഷൻ യൂണിറ്റ് എന്നിവ പോലുള്ള മറ്റ് ചില ഹൈലൈറ്റുകളും ആകർഷകമായ വിലയും കാരണം വാഹനം ജനപ്രിയമായി മാറി.
നിസാന്റെ ആഗോള പരിവർത്തന തന്ത്രത്തിന്റെ ഭാഗമായി, ഉപഭോക്താക്കൾക്കും ഡീലർ പങ്കാളികൾക്കും ബിസിനസിനും ഏറ്റവും കൂടുതൽ പ്രയോജനം നൽകുന്ന പ്രധാന മോഡലുകളിലും സെഗ്മെന്റുകളിലും നിസാൻ ശ്രദ്ധ കേന്ദ്രീകരിക്കുന്നു.എന്നാൽ മാഗ്‌നൈറ്റ് ഒഴികെ, നിസാൻ ഇന്ത്യയുടെ ബാനറിന് കീഴിൽ മറ്റൊരു ജനപ്രിയ മോഡലും ഇല്ല. കിക്ക്‌സ് എസ്യുവിയും ജിടി-ആർ പെർഫോമൻസ് കാറും മാത്രമാണ് മറ്റ് രണ്ട് മോഡലുകൾ. ജിടി ആർ ഇറക്കുമതി വഴിയാണ് ഇന്ത്യയിലേക്ക് വരുന്നത്.
