ഇനി ഒമാനിലേക്ക് പറക്കാൻ ഒരുങ്ങുമ്പോൾ ഇതൊക്കെ ശ്രദ്ധിക്കണം..!!; സുപ്രധാന മാർഗനിർദ്ദേശങ്ങൾ പുറത്തിറക്കി അധികൃതർ; ഈ വസ്തുക്കൾ കൈവശമുണ്ടെങ്കിൽ അറിയിക്കണമെന്ന് കസ്റ്റംസ്

മസ്കറ്റ്: ഒമാൻ കസ്റ്റംസ് അധികൃതർ യാത്രക്കാർക്കായി പുതിയ മാർഗ്ഗനിർദ്ദേശങ്ങൾ പുറത്തിറക്കി. രാജ്യത്തേക്ക് വരുന്നവരും ഇവിടെ നിന്ന് മറ്റു രാജ്യങ്ങളിലേക്ക് പോകുന്നവരും പണവും കൈമാറ്റം ചെയ്യാവുന്ന രേഖകളും കൊണ്ടുപോകുമ്പോൾ നിർബന്ധമായും ശ്രദ്ധിക്കേണ്ട കാര്യങ്ങളാണ് നിർദ്ദേശങ്ങളിൽ ഉൾപ്പെടുത്തിയിട്ടുള്ളത്.

കര, വ്യോമ, സമുദ്ര മാർഗ്ഗങ്ങളിലൂടെ രാജ്യത്തിനകത്തേക്ക് പ്രവേശിക്കുന്നവരും പുറത്തുപോകുന്നവരും, ഒമാൻ വഴി ട്രാൻസിറ്റ് ചെയ്യുന്നവരും 6,000 ഒമാനി റിയാലോ (RO 6,000) അതിന് തുല്യമായ മറ്റ് കറൻസികളോ കൈവശം വെക്കുന്നുണ്ടെങ്കിൽ അത് കസ്റ്റംസ് അധികൃതരെ നിർബന്ധമായും അറിയിക്കണം. ഇതിൽ പണം, ചെക്കുകൾ, സെക്യൂരിറ്റികൾ, ഓഹരികൾ, പേയ്‌മെന്റ് ഓർഡറുകൾ, സ്വർണം, വജ്രം, മറ്റ് വിലയേറിയ ലോഹങ്ങൾ, കല്ലുകൾ എന്നിവയെല്ലാം ഉൾപ്പെടും. ഈ വിവരങ്ങൾ കസ്റ്റംസ് വെബ്സൈറ്റ് മുഖേന രേഖപ്പെടുത്താം.

ഇതു കൂടാതെ, തപാൽ വഴിയോ ഷിപ്പിംഗ് സേവനങ്ങൾ വഴിയോ പണമോ സാമ്പത്തിക രേഖകളോ അയയ്ക്കുന്നവരും സ്വീകരിക്കുന്നവരും നിശ്ചിത പരിധിക്ക് മുകളിലുള്ള തുകയുടെ വിവരങ്ങൾ കസ്റ്റംസിൽ അറിയിക്കേണ്ടതാണ്.

ഈ നിർദ്ദേശങ്ങൾ പാലിക്കാത്തവർക്ക് കനത്ത പിഴ ലഭിക്കുമെന്നും കസ്റ്റംസ് മുന്നറിയിപ്പ് നൽകുന്നു. കള്ളപ്പണം വെളുപ്പിക്കൽ, ഭീകരവാദ പ്രവർത്തനങ്ങൾക്ക് ധനസഹായം നൽകൽ തുടങ്ങിയ കുറ്റകൃത്യങ്ങൾ തടയുന്നതിനാണ് ഈ നടപടി. വെളിപ്പെടുത്താതിരിക്കുകയോ തെറ്റായ വിവരങ്ങൾ നൽകുകയോ ചെയ്യുന്നത് കള്ളപ്പണം വെളുപ്പിക്കൽ തടയൽ നിയമത്തിലെ ആർട്ടിക്കിൾ (98) പ്രകാരം ക്രിമിനൽ കുറ്റമായി കണക്കാക്കും. ഇതിന് മൂന്നു വർഷം വരെ തടവോ 10,000 ഒമാനി റിയാൽ വരെ പിഴയോ അല്ലെങ്കിൽ രണ്ടും കൂടിയോ ലഭിക്കാം. നിയമ സ്ഥാപനങ്ങൾക്ക് 10,000 റിയാൽ മുതൽ വെളിപ്പെടുത്താത്ത ആകെ തുക വരെയുള്ള പിഴയും വ്യവസ്ഥ ചെയ്തിട്ടുണ്ട്.