കല്യാണം കഴിക്കാൻ മെഡിക്കൽ പരിശോധന നിർബന്ധമാക്കി ഒമാൻ; എല്ലാ പൗരന്മാർക്കും നിർദ്ദേശങ്ങൾ നൽകി അധികൃതർ; പുതിയ നിയമം പ്രാബല്യത്തിൽ

മസ്കറ്റ്: ഒമാനിൽ വിവാഹത്തിന് മുൻപുള്ള വൈദ്യപരിശോധന നിർബന്ധമാക്കി. 2026 ജനുവരി 1 മുതൽ ഈ പുതിയ നിയമം പ്രാബല്യത്തിൽ വരുമെന്ന് ഒമാൻ ആരോഗ്യ മന്ത്രാലയം അറിയിച്ചു. രാജ്യത്തെ പൗരന്മാരുടെ ആരോഗ്യ സുരക്ഷ ഉറപ്പാക്കുന്നതിനും ജനിതക, പാരമ്പര്യ, പകർച്ചവ്യാധികളുടെ വ്യാപനം തടയുന്നതിനുമുള്ള സുപ്രധാന നടപടിയായാണ് ഈ തീരുമാനം. എല്ലാ ഒമാനി പൗരന്മാർക്കും ഇത് ബാധകമാകും.

രാജകീയ ഉത്തരവ് നമ്പർ 111/2025 പ്രകാരമാണ് ഈ പുതിയ വ്യവസ്ഥ നടപ്പാക്കുന്നത്. വിവാഹം രാജ്യത്തിനകത്തോ പുറത്തോ വെച്ച് നടന്നാലും, അല്ലെങ്കിൽ വധുവോ വരനോ ഒരാൾ വിദേശിയാണെങ്കിലും, വിവാഹ കരാർ പൂർത്തിയാക്കുന്നതിനുള്ള അടിസ്ഥാന നിബന്ധനയായിരിക്കും ഈ വൈദ്യപരിശോധന.

പ്രധാനമായും ജനിതക രക്തരോഗങ്ങളായ സിക്കിൾ സെൽ അനീമിയ, തലസീമിയ എന്നിവയും പകർച്ചവ്യാധികളായ ഹെപ്പറ്റൈറ്റിസ് ബി, ഹെപ്പറ്റൈറ്റിസ് സി, എച്ച്‌ഐവി/എയ്ഡ്സ് എന്നിവയുമാണ് പരിശോധനയിലൂടെ കണ്ടെത്തുന്നത്. പരിശോധനാ ഫലങ്ങളുടെ അടിസ്ഥാനത്തിൽ ദമ്പതികൾക്ക് ആവശ്യമായ മെഡിക്കൽ കൗൺസലിംഗും നൽകും.

ഈ തീരുമാനം ദൂരവ്യാപകമായ ലക്ഷ്യങ്ങൾ മുൻനിർത്തിയാണെന്ന് ആരോഗ്യ മന്ത്രാലയം വ്യക്തമാക്കി. ജനിതക രക്തരോഗങ്ങളോടെ കുഞ്ഞുങ്ങൾ ജനിക്കുന്ന സാഹചര്യം കുറയ്ക്കുക, കുടുംബങ്ങളുടെ ആരോഗ്യപരവും സാമൂഹികവും മാനസികവും സാമ്പത്തികവുമായ ഭാരങ്ങൾ ലഘൂകരിക്കുക, ആരോഗ്യ സ്ഥാപനങ്ങളിലെയും രക്തബാങ്കുകളിലെയും സമ്മർദ്ദം കുറയ്ക്കുക, ദമ്പതികൾക്കിടയിലും അമ്മയിൽ നിന്ന് ഗർഭസ്ഥ ശിശുവിലേക്കുമുള്ള രോഗവ്യാപനം തടയുക, ആവശ്യമായ ചികിത്സയും മുൻകരുതൽ മാർഗ്ഗങ്ങളും നേരത്തെ ലഭ്യമാക്കുക എന്നിവ ഇതിൽ ഉൾപ്പെടുന്നു.

പരിശോധന നിർബന്ധമാണെങ്കിലും, വിവാഹവുമായി മുന്നോട്ട് പോകണോ വേണ്ടയോ എന്ന അന്തിമ തീരുമാനം എടുക്കുന്നതിൽ സർക്കാരോ ആരോഗ്യ വകുപ്പോ ഇടപെടില്ലെന്ന് മന്ത്രാലയം ഊന്നിപ്പറഞ്ഞു. വിവാഹ ജീവിതത്തെയും ഭാവി തലമുറയെയും ബാധിക്കുന്ന ആരോഗ്യ വിവരങ്ങൾ ദമ്പതികളെ വ്യക്തമായി അറിയിക്കുക എന്നതാണ് ഈ നയത്തിന്റെ പ്രധാന ഉദ്ദേശ്യം.