ദാവോസില്‍ നിന്നും കേരളം പഠിക്കേണ്ടത്... മുരളി തുമ്മാരുകുടി എഴുതുന്നു
ദാവോസില്‍ നിന്നും കേരളം പഠിക്കേണ്ടത്... മുരളി തുമ്മാരുകുടി എഴുതുന്നു
ദാവോസില്‍ വേള്‍ഡ് എക്കണോമിക് ഫോറം ആയിരുന്നുവല്ലോ. അമേരിക്കന്‍ പ്രസിഡന്റ് മുതല്‍ ലോകത്തെ അനവധി ലോക നേതാക്കള്‍, ബിസിനസ്സ് സാമ്രാജ്യത്തിന്റെ അധിപന്മാര്‍ എല്ലാം എത്തിച്ചേരുന്ന ലോകത്തെ ഏറ്റവും പ്രശസ്തമായ മീറ്റിംഗുകളില്‍ ഒന്നാണ് WEF. നൂറ്റി മുപ്പത് രാജ്യങ്ങളില്‍ നിന്നായി അമ്പത് രാഷ്ട്രത്തലവന്മാര്‍ ഉള്‍പ്പടെ മൂവായിരം പ്രതിനിധികളാണ് സമ്മേളനത്തിന് ഉണ്ടായിരുന്നത്. ഈ വര്‍ഷം ട്രംപ് പ്രസിഡന്റ് ആയ അന്ന് തന്നെയാണ് ഫോറം തുടങ്ങിയത് എന്നതിനാല്‍ അദ്ദേഹം ഓണ്‍ലൈന്‍ ആയിട്ടാണ് പങ്കെടുത്തത്. കേരളത്തില്‍ നിന്നും വ്യവസായമന്ത്രി ശ്രീ. പി. രാജീവിന്റെ നേതൃത്വത്തില്‍ ഒരു പ്രതിനിധി സംഘം ഉണ്ടായിരുന്നു.
പതിവ് പോലെ 'പത്തുകോടിയുടെ ധൂര്‍ത്ത്', 'മഹാരാഷ്ട്രക്ക് ലക്ഷം കോടികളുടെ നിക്ഷേപം ലഭിച്ചപ്പോള്‍ കേരളത്തിന് ഒന്നും കിട്ടിയില്ല' തുടങ്ങിയ നെഗറ്റീവ് വര്‍ത്തകള്‍ക്കപ്പുറം ദാവോസ് മീറ്റിംഗിനെ പറ്റി വിശദമായ ഒരു റിപ്പോര്‍ട്ടും കണ്ടില്ല. ജനീവയില്‍ അനവധി വര്‍ഷം ജീവിച്ചതിനാല്‍ വേള്‍ഡ് എകണോമിക്ക് ഫോറവുമായി ഔദ്യോഗികമായി ഇടപെടാന്‍ അനവധി അവസരങ്ങള്‍ ലഭിച്ചിട്ടുണ്ട്. ആ സാഹചര്യത്തില്‍ WEF, ദാവോസ് മീറ്റിംഗ്, അതിന്റെ സാദ്ധ്യതകള്‍, കേരളം എന്ത് ചെയ്യണം എന്നതിനെയെല്ലാം കുറിച്ച് ഏന്റെ അറിവും ചിന്തകളും പങ്കുവെക്കാം.
1. World Economic Forum എന്നത് വര്‍ഷാവര്‍ഷം ദാവോസില്‍ നടക്കുന്ന ഒരു മീറ്റിങ്ങ് മാത്രമല്ല, ഒരു പ്രസ്ഥാനമാണ്.
2. 1971 ല്‍ ഡോക്ടര്‍ ക്ലൗസ് ഷ്വാബ് ആണ് ഈ പ്രസ്ഥാനം സ്ഥാപിച്ചത്. ഇതിന്റെ ആസ്ഥാനം ജനീവയില്‍ ആണ്.
3. അനവധി കോര്‍പ്പറേറ്റ് സ്ഥാപനങ്ങളുടെ കേന്ദ്രമായ ജനീവയിലെ ഏറ്റവും ഡയനാമിക്ക് ആയ സ്ഥാപനങ്ങളില്‍ ഒന്നാണ് WEF. നൂറു കണക്കിനാളുകള്‍ ഇവിടെ ജോലി ചെയ്യുന്നുണ്ട്.
4. ജനീവയില്‍ കൂടാതെ ന്യൂ യോര്‍ക്ക്, സാന്‍ഫ്രാന്‍സിസ്‌കോ, ബെയ്ജിങ്, ടോക്കിയോ എന്നിവിടങ്ങളില്‍ ഇവര്‍ക്ക് ബ്രാഞ്ചുകള്‍ ഉണ്ട്.
5. എല്ലാ വര്‍ഷവും ജനുവരിയില്‍ ദാവോസില്‍ നടക്കുന്ന വാര്‍ഷിക സമ്മേളനം ആണ് ഏറ്റവും പ്രധാനപ്പെട്ട മീറ്റിംഗ്. ഇത് കൂടാതെ മൂന്നോ നാലോ പ്രധാനപ്പെട്ട മീറ്റിങ്ങുകള്‍ മറ്റു നഗരങ്ങളില്‍ നടത്തപ്പെടുന്നുണ്ട്.
6. ദാവോസ് എന്നത് വാസ്തവത്തില്‍ സ്വിറ്റസര്‍ലണ്ടിലെ ചെറിയ ഒരു ഗ്രാമം ആണ്. വെറും പതിനായിരം ആളുകളാണ് അവിടുത്തെ ജനസംഖ്യ (വെങ്ങോലയുടെ ജനസംഖ്യ 32000 ആണ്!). ഒരു മെയിന്‍ റോഡിന് അപ്പുറവും ഇപ്പുറവുമായി ഒരു കിലോമീറ്റര്‍ നീളത്തില്‍ ഒരു ചെറിയ നഗരം. ഇതാണ് ദാവോസ്. വര്‍ഷാവര്‍ഷം രാഷ്ട്രത്തലവന്മാരും കോര്‍പ്പറേറ്റ് ഭീമന്മാരും ഒക്കെ എത്തുമെങ്കിലും ഇവിടെ ഒരു വിമാനത്താവളം പോലുമില്ല. ജനീവയിലോ സ്യൂറിക്കിലോ ഇറങ്ങി ഹെലികോപ്റ്ററിലോ, ട്രെയിനിലോ, കാറിലോ വേണം ദാവോസില്‍ എത്താന്‍. ഇത്രയും ചെറിയൊരു ഗ്രാമം ഇതിനായി തിരഞ്ഞെടുത്തതും അവിടെ നിന്നും ഒരു ലോക ബ്രാന്‍ഡ് ഉണ്ടാക്കിയെടുത്തതുമായ മാതൃക കണ്ടു പഠിക്കേണ്ടതാണ്.
7. ദാവോസ് എന്നത് ഒരു ഇന്‍വെസ്റ്റ്‌മെന്റ് മേളയോ ഡോണര്‍ മീറ്റിംഗോ ഒന്നുമല്ല. ഭാവിയിലെ ലോകത്തെപ്പറ്റിയുള്ള ചിന്തകളും ആശങ്കകളും പങ്കുവെക്കാന്‍ ലോകനേതാക്കളും ബിസിനസ്സ് നേതൃത്വവും യു.എന്‍. പോലുള്ള ഏജന്‍സികളും ചിന്തകരും സമ്മേളിക്കുന്ന ഒരു സ്ഥലം.
8. ഇവിടെ നടക്കുന്ന ചര്‍ച്ചകളുടെ ഫോര്‍മാറ്റ് നമ്മള്‍ ശ്രദ്ധിക്കേണ്ടതാണ്. വളരെ പ്രമുഖരായ നാലുമുതല്‍ ആറ് വരെ പാനല്‍ അംഗങ്ങളുള്ള ചര്‍ച്ചകള്‍ നയിക്കാന്‍ ഒരു മോഡറേറ്റര്‍. നാല്പത് മിനുട്ട് മുതല്‍ അമ്പത്തി അഞ്ചു മിനുട്ട് വരെയാണ് ചര്‍ച്ചകള്‍ക്ക് സമയം. സ്വാഗത പ്രസംഗങ്ങള്‍ ഇല്ല. രാഷ്ട്രത്തലവന്മാര്‍ക്ക് പോലും സംസാരിക്കാന്‍ കിട്ടുന്നത് അഞ്ചുമുതല്‍ എട്ടു മിനുട്ട് വരെയാണ്. സദസ്സില്‍ ഇരിക്കുന്നവരും പൊതുവെ ലോകത്ത് എവിടെ പോയാലും ആളുകള്‍ ശ്രദ്ധിക്കുന്ന ചിന്തകള്‍ ഉള്ളവര്‍ ആണ്. അവിടെ നിന്നും മൂന്നോ നാലോ ചോദ്യങ്ങള്‍. കഴിഞ്ഞു. കൃത്യസമയത്ത് തുടങ്ങുന്നു, കൃത്യസമയത്ത് അവസാനിക്കുന്നു. ഇപ്പോള്‍ ലോകം ഈ ഫോര്‍മാറ്റിലേക്ക് ചര്‍ച്ചകള്‍ മാറ്റുകയാണ്. ദാവോസ് സ്‌റ്റൈല്‍ എന്നൊരു പ്രയോഗം വരെ ഉണ്ട്. എല്ലാ പാനലിലും സ്ത്രീകള്‍ ഉണ്ടായിരിക്കും എന്നതും ശ്രദ്ധിക്കേണ്ടതാണ്. എന്നാണ് നമുക്ക് ഇത്തരത്തില്‍ കാര്യക്ഷമമായി ചര്‍ച്ചകള്‍ നടത്താന്‍ കഴിയുന്നത് ?
9. മീറ്റിംഗിന് എത്തുന്ന മൂവായിരം പേര്‍ക്കും അപ്പുറം ഓണ്‍ലൈന്‍ ആയി തത്സമയവും പിന്നീട് റെക്കോര്‍ഡഡ് ആയും WEF മീറ്റിംഗുകള്‍ ലോകത്തിന് ലഭ്യമാണ്.
10. ചര്‍ച്ചകള്‍ക്കപ്പുറം ദാവോസില്‍ എത്തിയിരിക്കുന്ന മിക്ക പ്രതിനിധികളും സാധാരണഗതിയില്‍ ഒരേ സമയത്ത് ഒരേ ഇടത്ത് എത്താന്‍ സാധ്യതയുള്ളവര്‍ അല്ല. സമയത്തിന് വളരെ വിലയുള്ളവരാണ് താനും. അവരുമായി ഒറ്റക്കോ കൂട്ടമായോ നടത്തുന്ന ചര്‍ച്ചയ്ക്കുള്ള അവസരം ഓര്‍ത്താണ് കൂടുതല്‍ പ്രതിനിധികളും ദാവോസില്‍ എത്തുന്നത്. രാവിലെ ബ്രെക്ഫാസ്റ്റ് മീറ്റിങ്ങ് മുതല്‍ രാത്രി ഡിന്നര്‍ മീറ്റിംഗ് വരെ, പതിനാലു മണിക്കൂറും മീറ്റിംഗുകളാണ്. വരുന്ന ഓരോ പ്രതിനിധിയും അമ്പതോ അറുപതോ മീറ്റിംഗുകളില്‍ പങ്കെടുക്കുകയും ചെയ്യും.
11. ആനുവല്‍ മീറ്റിംഗിനും റീജിയണല്‍ മീറ്റിങ്ങിനും അപ്പുറം വേള്‍ഡ് എക്കണോമിക്ക് ഫോറം വിവിധ വിഷയങ്ങളില്‍ സ്ഥിരമായി ഗവേഷണങ്ങള്‍ നടത്തുണ്ട്, പ്രസിദ്ധീകരണങ്ങള്‍ പുറത്തുകൊണ്ടുവരാറുണ്ട്. വേള്‍ഡ് എക്കണോമിക് ഫോറത്തിന്റെ സോഷ്യല്‍ മീഡിയ ഹാന്‍ഡിലുകള്‍ ഞാന്‍ മാതൃകയായി എടുക്കുന്ന ഒന്നാണ്.
12. നിര്‍മ്മിതബുദ്ധിയുടെ വരവിനെ പറ്റി, അതുണ്ടാക്കാന്‍ പോകുന്ന മാറ്റങ്ങളെ പറ്റി ഒക്കെ ഏറ്റവും ആദ്യം ലോകത്തിന് മുന്നറിയിപ്പ് നല്കിത്തുടങ്ങിയത് WEF ആണ്. നാലാം വ്യവസായ വിപ്ലവം എന്ന വിഷയത്തില്‍ പുസ്തകം ഇറക്കിയതും ആ വാക്ക് പ്രശസ്തമാക്കിയതും ഡോക്ടര്‍ ക്ലൗസ് ഷ്വാബ് ആണ്, 2016 ല്‍. ഈ വര്‍ഷത്തെ തീം 'Collaboration for the Intelligent Age' എന്നതാണ്. സമ്മേളന നഗരിയില്‍ എവിടെയും നിര്‍മ്മിത ബുദ്ധിയുടെ സന്ദേശങ്ങളും പ്രയോഗങ്ങളും ആണ്.
13. എന്റെ ഔദ്യോഗിക കപ്പാസിറ്റിയില്‍ ഞാന്‍ WEF മായി ചേര്‍ന്ന് പ്രവര്‍ത്തിക്കുന്നുണ്ട്, പലപ്പോഴും ജനീവയില്‍ പോകാറുണ്ട്, ഞങ്ങളുടെ മീറ്റിംഗില്‍ അവിടെ നിന്നുള്ളവര്‍ പങ്കെടുക്കാറുമുണ്ട്. ഏറെ ഇന്ത്യക്കാര്‍ അവിടെ ജോലി ചെയ്യുന്നുണ്ട്. അടുത്തയിടക്ക് ഒരു മലയാളി പെണ്‍കുട്ടി അവിടെ ജോലി കിട്ടിയതായി പറഞ്ഞിരുന്നു. ഇന്റര്‍നാഷണല്‍ പോളിസി രംഗത്ത് ജോലി ചെയ്യാന്‍ താല്പര്യമുളളവര്‍ തീര്‍ച്ചയായും അവരുടെ കരിയര്‍ സൈറ്റ് സന്ദര്‍ശിക്കണം.
ഇടക്കൊക്കെ കേരളത്തില്‍ നിന്നും മന്ത്രിമാര്‍ WEF ല്‍ പങ്കെടുക്കാറുണ്ട്. 2006 ല്‍ സമ്മേളനത്തില്‍ പങ്കെടുക്കാന്‍ എത്തിയ ശ്രീ. ഉമ്മന്‍ ചാണ്ടി അവിടെ തെന്നി വീണു കാലൊടിഞ്ഞപ്പോഴാണ് നമ്മള്‍ വെഫിനെ ശ്രദ്ധിക്കാന്‍ തുടങ്ങിയതെന്ന് തോന്നുന്നു. ഈ വര്‍ഷം ശ്രീ. രാജീവും സീനിയര്‍ ഉദ്യോഗസ്ഥരും ഇവിടെ എത്തിയിരുന്നു.
ഇതുപോലെ ഇടക്കിടക്ക് വരികയും വേള്‍ഡ് എക്കണോമിക്ക് ഫോറത്തെ ഒരു മീറ്റിങ്ങ് ആയി കാണുകയും ചെയ്യുന്ന രീതി മാറ്റി WEF എന്ന പ്രസ്ഥാനത്തെയും അവരുടെ ഗവേഷണങ്ങളെയും കൂടുതല്‍ അടുത്തറിയുകയും, അവരുമായി ദീര്‍ഘകാല ബന്ധങ്ങള്‍ സ്ഥാപിക്കുകയും ചെയ്യണം. അവര്‍ മീറ്റിംഗുകള്‍ നടത്തുന്ന രീതി, ഒരു ചെറിയ ഗ്രാമത്തില്‍ ഇത്തരത്തില്‍ ഒരു ആഗോള കൂട്ടായ്മ നടത്തി വിജയമാക്കുന്നത്, ഇതില്‍ നിന്നൊക്കെ നമുക്ക് പഠിക്കാനുണ്ട്. എന്റെ പ്രത്യേക നിര്‍ദ്ദേശങ്ങള്‍ ഇനി ഉള്ളവ ആണ്.
1. ഇനി വരുന്ന എല്ലാ വര്‍ഷവും വെഫില്‍ പങ്കെടുക്കും എന്ന് നയപരമായി തന്നെ തീരുമാനിക്കുക. പറ്റിയാല്‍ മുഖ്യമന്ത്രിയുടെ നേതൃത്വത്തില്‍. ചെറുപ്പക്കാരായ (ചെറുപ്പക്കാരികള്‍ ഉള്‍പ്പടെ) നേതാക്കളുടെയും ഉദ്യോഗസ്ഥരുടെയും ഒരു സംഘം (അതിപ്പോള്‍ പത്തോ പതിനഞ്ചോ ആയാലും) കൂടെ ഉണ്ടാകണം. ഇത്തരത്തില്‍ ഉണ്ടാക്കിയെടുക്കുന്ന ബന്ധങ്ങള്‍ക്ക് ദീര്‍ഘകാല പ്രയോജനം ഉണ്ട്, അതിന് നടത്തുന്ന ഇന്‍വെസ്റ്റ്‌മെന്റ് ഒരിക്കലും നഷ്ടമല്ല.
2. ആനുവല്‍ മീറ്റിങ്ങില്‍ മാത്രമല്ല വെഫ് എന്ന പ്രസ്ഥാനവുമായിക്കൂടിയും ദീര്‍ഘകാല ബന്ധങ്ങള്‍ സ്ഥാപിച്ചെടുക്കുക. സാധിക്കുമെങ്കില്‍ ഒരു വെഫ് സമ്മേളനം കേരളത്തില്‍ സംഘടിപ്പിക്കുക. നമ്മുടെ ഉദ്യോഗസ്ഥരെയും യൂണിവേഴ്‌സിറ്റികളിലെ ഗവേഷകരെയും ഹൃസ്വകാലത്തേക്ക് WEF ല്‍ പോസ്റ്റ് ചെയ്യാന്‍ ശ്രമിക്കുക.
3. വെഫ് മാതൃകയില്‍ ഒരു ഇന്ത്യ എക്കണോമിക് ഫോറം കേരളത്തില്‍ സ്ഥാപിക്കുന്നതിനെ പറ്റി ചിന്തിക്കുക. ഇന്ത്യയില്‍ ഭാവിയുടെ ചിന്തകള്‍ക്ക് നേതൃത്വം നല്‍കുന്ന ചര്‍ച്ചകള്‍ നടത്തുന്ന ഒരു സ്ഥലമായി അടുത്ത പത്തു വര്‍ഷത്തിനകം ഇത് മാറ്റിയെടുക്കാനുള്ള ഒരു വിഷന്‍ നമുക്ക് വേണം. ഇന്ത്യയില്‍ എവിടെനിന്നുമുള്ള രാഷ്ട്രീയ നേതൃത്വം, ബിസിനസ്സ് നേതൃത്വം, അക്കാദമിക് നേതൃത്വം, യുവ നേതൃത്വം, ഒക്കെ വരുന്ന ഒരു സ്ഥലമാക്കി ഇതിനെ മാറ്റണം. അതിന് പറ്റിയ ഒരു വിഷനറി ആയ ഒരാളെ ഇക്കാര്യം ഏല്‍പ്പിക്കുക (ഒരാളുടെ പേര് ഞാന്‍ വേണമെങ്കില്‍ പറയാം!).
4. ഇത്തരത്തില്‍ ഒരു സ്ഥാപനവുമായി വെഫിനെ ബന്ധിപ്പിച്ചാല്‍ ലോകമാതൃകയുമായി നമുക്ക് അടുത്ത് ബന്ധപ്പെടാനാകും. നമ്മുടെ ചര്‍ച്ചകളും ചിന്തകളും ലോക നിലവാരവുമായി വര്‍ഷാവര്‍ഷം ബന്ധിപ്പിക്കാനും സാധിക്കും.
5. മുന്‍പ് പറഞ്ഞത് പോലെ കേരളത്തില്‍ നടക്കുന്ന ചര്‍ച്ചകളില്‍ ദാവോസ് സ്‌റ്റൈല്‍ പാനല്‍ നടപ്പിലാക്കാന്‍ ശ്രമിക്കുക. സമയത്തിന് മീറ്റിംഗുകള്‍ തുടങ്ങുന്നതും അവസാനിക്കുന്നതും, തുടങ്ങി രാഷ്ട്രീയ നേതൃത്വം ഉള്‍പ്പെട്ട (എന്നാല്‍ ഒരാള്‍ക്കും കൂടുതല്‍ പ്രാധാന്യം നല്‍കാത്ത) പാനലുകള്‍, കൃത്യമായ സ്ത്രീ സാന്നിധ്യം, ഒരു മണിക്കൂര്‍ മാത്രം നീളുന്ന ചര്‍ച്ചകള്‍, പത്തു മിനുട്ടില്‍ കൂടാത്ത പ്രഭാഷണം, ചോദ്യോത്തര സെഷന്‍, മുപ്പത് സെക്കന്‍ഡിനുള്ളില്‍ പ്രഭാഷകരെ പരിചയപ്പെടുത്തുന്നതും നന്ദി പറയുന്നതും, വരെ നാം ശീലിക്കണം.
വെഫില്‍ നമ്മള്‍ പങ്കെടുക്കുന്നത് ഓരോ വര്‍ഷവും വിവാദമാക്കുന്നതും വെഫിനെ എത്ര നിക്ഷേപം കിട്ടി എന്ന തരത്തില്‍ അളന്നു നോക്കുന്നതും നമ്മുടെ അറിവും പക്വതയും ഇല്ലായ്മയാണ് കാണിക്കുന്നത്. കേരളം മാറുകയാണ്, ലോകം അത് ശ്രദ്ധിക്കുന്നുണ്ട്. കേരളത്തെ പറ്റി കേരളത്തില്‍ ഉള്ളവര്‍ക്ക്, പ്രത്യേകിച്ചും ഇവിടെ പൊതുബോധം സൃഷ്ടിക്കുന്നവര്‍ക്ക് കുറച്ചുകൂടി പോസിറ്റീവ് ചിന്തകള്‍ ആകാം.മുരളി തുമ്മാരുകുടി, ദാവോസ്, ഇക്കണോമിക് ഫോറം, ബിസിനസ്സ്, കേരളം
