യുവതിയെ വീഴ്‌ത്തിയത് വിവാഹ വാഗ്ദാനത്തിൽ; വാൽപ്പാറയിലും കൂർഗ്ഗിലും കൊച്ചിയിലും എല്ലാമായി പീഡിപ്പിച്ചത് ഒരുവർഷത്തോളം; കാര്യം കഴിഞ്ഞപ്പോൾ ഒഴിഞ്ഞുമാറലും; കൊച്ചിയിൽ ഓർത്തോ ഡോക്ടർ പീഡനക്കേസിൽ കുടുങ്ങിയത് ഇങ്ങനെ
കൊച്ചി: കൊച്ചിയിൽ യുവതിയെ വിവാഹ വാഗ്ദാനം നൽകി ഡോക്ടർ പീഡിപ്പിച്ചത് ഒരു വർഷത്തോളം. കേരളത്തിന് പുറത്തും അകത്തുമായി പല റിസോർട്ടുകളിലും മുറിയെടുത്തായിരുന്നു പീഡനം. പത്തടിപ്പാലം കിന്റർ ആശുപത്രിയിലെ ഓർത്തോ ഡോക്ടർ പെരുമ്പാവൂർ എസ്.കെ മാരാർ ലൈനിൽ ശ്രീ ഹരി വീട്ടിൽ ഡോ.എൻ ശ്രീഹരി(43)യെ യുവതിയുടെ പരാതിയിൽ ഇന്ന് എറണാകുളം ടൗൺ നോർത്ത് പൊലീസ് അറസ്റ്റ് ചെയ്തു.
പരാതിക്കാരിയായ 42 വയസ്സുള്ള യുവതിയെ 2020 ജനുവരിയിൽ വാൽപ്പാറയിലുള്ള റിസോർട്ടിൽ വച്ചും ഫെബ്രുവരിയിൽ കൂർഗ്ഗിലുള്ള റിസോർട്ടിൽ വച്ചും പിന്നീട് കൊച്ചിയിലെ രണ്ടിടങ്ങളിൽ വച്ചും നിരവധി തവണ ലൈംഗിക ബന്ധത്തിലേർപ്പെട്ടും പ്രതി പീഡിപ്പിച്ചു. വിവാഹം കഴിക്കാമെന്ന് പറഞ്ഞ് വിശ്വസിപ്പിച്ചായിരുന്നു ഇത്തരത്തിൽ തന്നെ പീഡിപ്പിച്ചത് എന്ന് യുവതി നൽകിയ പരാതിയിൽ പറയുന്നു. കഴിഞ്ഞ ദിവസം നൽകിയ പരാതിയുടെ അടിസ്ഥാനത്തിൽ ഇന്ന് ഡോ.ശ്രീഹരിയെ അറസ്റ്റ് ചെയ്യുകയായിരുന്നു.
പരാതിക്കാരിയായ യുവതിയും ഒരു ഡോക്ടറാണ്. ഏറെ നാളായി ഇരുവരും പരിചയത്തിലായിരുന്നു. ഇതിനിടയിലാണ് ശ്രീഹരി യുവതിയോട് വിവാഹാഭ്യർത്ഥന നടത്തുന്നത്. വിവാഹ വാഗ്ദാനത്തിൽ വീണു പോയ യുവതിയെ ഇയാൾ പിന്നീട് ലൈംഗികമായി ചൂഷണം ചെയ്യുകയായിരുന്നു. പലവട്ടം വിവാഹത്തെ പറ്റി പറയുമ്പോഴും ഇയാൾ ഒഴിഞ്ഞു മാറിയതോടെയാണ് ചതിക്കപ്പെട്ടതെന്ന് യുവതി മനസ്സിലാക്കിയത്. തുടർന്ന് പൊലീസിൽ പരാതി നൽകുകയായിരുന്നു എന്നാണ് ലഭിക്കുന്ന വിവരം.
ഐ.പി.സി 376(2)എൻ, 377 എന്നീ വകുപ്പുകൾ പ്രകാരമാണ് കേസെടുത്തിരിക്കുന്നത്. പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
