പിന്നാലെ വന്ന കാർ കാണാതായപ്പോൾ ബസ് ജീവനക്കാർക്ക് തോന്നിയ സംശയം; നാട്ടുകാർ നടത്തിയ തെരച്ചിലിൽ കണ്ടത് തോട്ടിലെ വെള്ളത്തിൽ മുങ്ങിയ കാർ; 20 മിനിട്ടോളം വെള്ളത്തിൽ മുങ്ങിയ കാറിൽ അച്ഛനും മക്കളും ശ്വാസം കിട്ടാതെ മരിച്ചു: കുമളിയിൽ നിന്നെത്തി കുമ്പനാട് താമസമാക്കി പാസ്റ്റർ ചാണ്ടി മാത്യുവിന്റെയും രണ്ടു പെണ്മക്കളുടെയും മരണത്തിൽ വിതുമ്പി നാട്

തിരുവല്ല: മുൻപേ പോയ സ്വകാര്യ ബസ് ജീവനക്കാർക്ക് തോന്നിയ ഒരു സംശയം തോന്നി നാട്ടുകാർ നടത്തിയ തെരച്ചിലിലാണ് പിതാവിന്റെയും രണ്ടു പെണ്മക്കളുടെയും ദാരുണ മരണത്തിന് കാരണമായ കാർ തോട്ടിൽ മുങ്ങിയ നിലയിൽ കണ്ടെത്തിയത്. കുമളി ചക്കുപള്ളം വരയന്നൂർ വീട്ടിൽ ചാണ്ടി മാത്യൂ, മക്കളായ ഫെബ വി. ചാണ്ടി, ബ്ലസി വി. ചാണ്ടി എന്നിവരാണ് വെണ്ണിക്കുളം പുറമറ്റം റോഡിൽ കല്ലുപാലം പെട്രോൾ പമ്പിന് സമീപം കാർ തോട്ടിലേക്ക് മറിഞ്ഞ് മരിച്ചത്.

ഇന്ന് രാവിലെ ഏഴരയോടെയാണ് അപകടമുണ്ടായത്. ഒരു ബസിനെ ഓവർടേക്ക് ചെയ്ത് മുന്നോട്ട് പോകുന്നതിനിടെയാണ് തിരുവല്ല ഭാഗത്തേക്ക് പോകുകയായിരുന്ന മാരുതി ആൾട്ടോ കാർ നിയന്ത്രണം വിട്ട് തോട്ടിലേക്ക് മറിഞ്ഞത്. 20 മിനിറ്റോളം കാർ വെള്ളത്തിൽ മുങ്ങിക്കിടന്നെന്നാണ് ദൃക്സാക്ഷികൾ വിശദീകരിക്കുന്നത്. പുറകിലുണ്ടായിരുന്ന കാർ കാണ്മാനില്ലെന്ന് ബസ് ജീവനക്കാർ അറിയിച്ചതനുസരിച്ചാണ് നാട്ടുകാർ ആദ്യഘട്ടത്തിൽ തെരച്ചിൽ നടത്തിയത്.

വാഹനത്തിലുണ്ടായിരുന്ന രണ്ട് പേരുടെ മരണം ആദ്യം സ്ഥിരീകരിച്ചു. മൂന്നാമത്തെയാളെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. ആദ്യഘട്ടത്തിൽ അപകടത്തിൽപ്പെട്ടവരെ തിരിച്ചറിഞ്ഞിരുന്നില്ല. പിന്നീട് കാറിലുണ്ടായിരുന്നു വിദ്യാർത്ഥിനിയുടെ കോളേജ് ഐഡി കാർഡിലെ വിവരങ്ങളിൽ നിന്നാണ് മരിച്ചവരെ തിരിച്ചറിഞ്ഞത്. പരുമലയിലെ കോളേജിലെ വിദ്യാർത്ഥിനിയാണെന്ന് വ്യക്തമായതോടെ ഇതനുസരിച്ച് അന്വേഷണം നടത്തുകയായിരുന്നു. മഴ ശക്തമായതിനാൽ തോട്ടിൽ വലിയ തോതിൽ വെള്ളവും ഒഴുക്കും ഉണ്ടായിരുന്നു.

ഇത് രക്ഷാപ്രവർത്തനം ദുസ്സഹമാക്കി. നാട്ടുകാരുടെ സഹായത്തോടെ അഗ്നിശമന സേന എത്തിയാണ് കാർ കരക്കെത്തിച്ചത്. കുമളി സ്വദേശികളായ ചാണ്ടി മാത്യു, ഇടുക്കി ചക്കുപള്ളം സ്വദേശികളായ ഇവർ പത്തു വർഷമായി പത്തനംതിട്ട കുമ്പനാട് ആണ് താമസിക്കുന്നത്.