സോഷ്യൽ മീഡിയയിലുടെ പരിചയപ്പെട്ടു പ്രണയം നടിച്ച് വശീകരിച്ചു; പ്രായപൂർത്തിയാകാത്ത പെൺകുട്ടിയെ പ്രലോഭിപ്പിച്ച് കൊണ്ടു പോയത് കൂത്തുപറമ്പിലെ അൽ അമീൻ റസിഡൻസിയിൽ; ലോഡ്ജിൽ പീഡനം വീട്ടുകാരോട് പറഞ്ഞത് നിർണ്ണായകമായി: കാസർകോട് സ്വദേശികളായ യുവാക്കൾ റിമാൻഡിൽ

കണ്ണൂർ: സോഷ്യൽ മീഡിയയിലൂടെ പരിചയപ്പെട്ടതിനു ശേഷം പ്രണയം നടിച്ച് വലയിലാക്കിയ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച രണ്ട് യുവാക്കൾ അറസ്റ്റിൽ.

കാസർകോട് ബദ്രടുക്കം പുത്തൂർ രാജീവ് കോളനിയിലെ ടി.എ ഫായിസ് (26) കാസർകോട് ബദിയടുക്ക കമ്പാറിലെ പാലത്തൊട്ടി ഹൗസിൽ അബ്ദുൾ മന്നാൻ (25) എന്നിവരെയാണ് കൂത്തുപറമ്പ് പൊലീസ് ഇൻസ്‌പെക്ടർ എൻ.സുനിൽകുമാർ, എഎസ്ഐ അനിൽകുമാർ, സീനിയർ സിവിൽ പൊലീസ് ഓഫിസർമാരായ വിജിത്, സുധി എന്നിവരടങ്ങിയ സംഘം പിടികൂടിയത്.

മാർച്ച് 28നാണ് കേസിനാസ്പദമായ സംഭവം. സോഷ്യൽ മീഡിയയിലൂടെ പരിചയപ്പെട്ട 14കാരിയെ പ്രലോഭിപ്പിച്ച് കൂത്തുപറമ്പ് മൂന്നാംപീടിക കണ്ടംകുന്നിലെ അൽ അമീൻ റസിഡൻസിയിൽ എത്തിച്ച ശേഷം പ്രതികൾ പീഡിപ്പിക്കുകയായിരുന്നു. തുടർന്ന് പെൺകുട്ടി വീട്ടിലെത്തി ബന്ധുക്കളോട് വിവരം പറഞ്ഞതോടെയാണ് പൊലീസിൽ പരാതിയുമായി എത്തിയത്.

പോക്‌സോ നിയമപ്രകാരം കേസെടുത്ത പൊലീസ് പ്രതികളെ അറസ്റ്റു ചെയ്യുകയായിരുന്നു. പ്രതികളെ കൂത്തുപറമ്പ് കോടതി രണ്ടാഴ്‌ച്ചത്തേക്ക് റിമാൻഡ് ചെയ്തു.