എക്സൈസ് കേസെടുക്കുന്നത് ശരിയായി പരിശോധന നടത്തിയിട്ടാണോയെന്ന് യു.പ്രതിഭ; മകന്‍ അങ്ങനെ ചെയ്യില്ലെന്ന് പറയുന്നത് തെറ്റാണെന്ന് എ.പ്രഭാകരന്‍; നിയമസഭയിലെ ലഹരിവ്യാപന ചര്‍ച്ചയില്‍ പഴിചാരി ഭരണപക്ഷ എംഎല്‍എമാര്‍; പകപോക്കല്‍ എന്ന രീതിയില്‍ കേസെടുത്താല്‍ നടപടി സ്വീകരിക്കുമെന്ന് മന്ത്രിയുടെ മറുപടി
നിയമസഭയിലെ ലഹരിവ്യാപന ചര്‍ച്ചയില്‍ പഴിചാരി ഭരണപക്ഷ എംഎല്‍എമാര്‍
തിരുവനന്തപുരം: ലഹരി ഉപയോഗ വ്യാപനം സംബന്ധിച്ച് നിയമസഭയില്‍ അടിയന്തരപ്രമേയ ചര്‍ച്ചയ്ക്കിടെ പരസ്പരം പഴിചാരിയും വിമര്‍ശിച്ചും ഭരണപക്ഷ എംഎല്‍എമാര്‍. പി.സി.വിഷ്ണുനാഥ് എംഎല്‍എ അവതരിപ്പിച്ച അടിയന്തരപ്രമേയ ചര്‍ച്ചയ്ക്കിടെ, ലഹരി വ്യാപനം തടയാനുള്ള ഉത്തരവാദിത്തം സമൂഹത്തിനാണെന്നും കുട്ടികള്‍ ഇത്തരം പ്രവൃത്തികളില്‍ ഏര്‍പ്പെടുമ്പോള്‍ തന്റെ മകന്‍ അങ്ങനെ ചെയ്യില്ലെന്നു രക്ഷിതാക്കള്‍ പറയുന്നതു തെറ്റാണെന്നും മലമ്പുഴയില്‍നിന്നുള്ള ഭരണപക്ഷ എംഎല്‍എ എ.പ്രഭാകരന്‍ പറഞ്ഞു. സിപിഎം എംഎല്‍എ യു.പ്രതിഭയുമായി ബന്ധപ്പെട്ട് അടുത്തിടെ ഉണ്ടായ വിവാദത്തെ ഓര്‍മിപ്പിക്കുന്നതായിരുന്നു പ്രഭാകരന്റെ പരാമര്‍ശം.
പ്രതിഭയുടെ മകനെ കഞ്ചാവ് ഉപയോഗിച്ചതിന്റെ പേരില്‍ എക്സൈസ് പരിശോധനയില്‍ പിടിച്ചിരുന്നു. മകന്‍ തെറ്റ് ചെയ്യില്ലെന്നും കേസ് അടിസ്ഥാനരഹിതമാണെന്നുമായിരുന്നു പ്രതിഭയുടെ നേരത്തെയുള്ള പ്രതികരണം. അതേസമയം, സ്‌കൂളുകളില്‍ ഉള്‍പ്പെടെ ലഹരിവ്യാപനത്തിന് എതിരായി ഫലപ്രദമായ നടപടികള്‍ ഉണ്ടാകുന്നുണ്ടോ എന്നും നേര്‍വഴി അടക്കമുള്ള പദ്ധതികള്‍ സ്‌കൂളുകളില്‍ ആത്മാര്‍ഥമായി നടക്കുന്നുണ്ടോ എന്നും എക്സൈസ് കേസെടുക്കുന്നത് ശരിയായി പരിശോധന നടത്തിയിട്ടാണോ എന്നുമായിരുന്നു ചര്‍ച്ചയ്ക്കിടെ യു.പ്രതിഭയുടെ ചോദ്യം. പകപോക്കല്‍ എന്ന രീതിയില്‍ കേസെടുത്താല്‍ നടപടി സ്വീകരിക്കാറുണ്ടെന്ന് എക്സൈസ് മന്ത്രി എം.ബി.രാജേഷ് മറുപടി നല്‍കി.
പി.സി.വിഷ്ണുനാഥ് എം.എല്‍.എ.യാണ് വിഷയം അടിയന്തരപ്രമേയമായി സഭയില്‍ അവതരിപ്പിച്ചത്. തുടര്‍ന്ന് പ്രമേയം ചര്‍ച്ച ചെയ്യാമെന്ന് എക്സൈസ് വകുപ്പ് മന്ത്രി എം.ബി.രാജേഷ് സഭയെ അറിയിക്കുകയായിരുന്നു. ലഹരിമരുന്ന് വ്യാപനം സമൂഹത്തില്‍ കൂടുതലാണെന്ന് അടിയന്തര പ്രമേയം അവതരിപ്പിച്ച പി.സി. വിഷ്ണുനാഥ് സഭയില്‍ പറഞ്ഞു. ഇതിനിടെ, ഭരണപക്ഷത്തുനിന്ന് സംസാരിച്ച എ.പ്രഭാകരന്‍ എം.എല്‍.എ. ചില പരോക്ഷ വിമര്‍ശനം നടത്തുകായിരുന്നു. സമൂഹത്തിനാണ് ലഹരി തടയാനുള്ള ഉത്തരവാദിത്വം. കുട്ടികള്‍ ഇത്തരം പ്രവൃത്തികളിലേര്‍പ്പെടുമ്പോള്‍ തന്റെ മകന്‍ അങ്ങനെ ചെയ്യില്ലെന്ന് രക്ഷിതാക്കള്‍ പറയുന്നു. ഇത് തെറ്റാണെന്നായിരുന്നു എ.പ്രഭാകരന്‍ പറഞ്ഞത്. യു പ്രതിഭയുടെ പേര് പരാമര്‍ശിക്കാതെയായിരുന്നു മലമ്പുഴ എം.എല്‍.എ. എ.പ്രഭാകരന്റെ വാക്കുകള്‍.
അതിനിടെ, യു. പ്രതിഭ മന്ത്രിയോട് ചോദ്യങ്ങള്‍ ഉന്നയിച്ച് രംഗത്ത് വരികയായിരുന്നു. 'ഗൗരവമുള്ള വിഷയമായതിനാലാണ് ഇടപെട്ട് സംസാരിക്കുന്നത്. 'നേര്‍വഴി' അടക്കമുള്ള പദ്ധതികള്‍ സ്‌കൂളിലുണ്ട്, എവിടെയൊക്കെയാണ് ഇത് ആത്മാര്‍ഥമായി നടത്തുന്നതെന്ന് പരിശോധിക്കുന്നുണ്ടോ?', പ്രതിഭ ചോദിച്ചു. എക്സൈസ് കേസെടുക്കുമ്പോള്‍ ശരിയായ പരിശോധന നടത്താനുള്ള സംവിധാനമുണ്ടോയെന്നും ആവശ്യമായ പരിശോധന നടത്തിയിട്ടാണോ കേസെടുക്കുന്നതെന്നും പ്രതിഭ ചോദിച്ചു.
എന്നാല്‍, വെറും രണ്ടുവാചകങ്ങളിലായിരുന്നു ഈ ചോദ്യത്തിന് മന്ത്രി എം.ബി.രാജേഷിന്റെ മറുപടി. തെറ്റായരീതിയിലോ പകപോക്കല്‍ എന്നരീതിയിലോ കേസെടുത്താല്‍ അത്തരംകാര്യങ്ങളില്‍ നടപടി സ്വീകരിച്ചിട്ടുണ്ട്, ചാലക്കുടിയിലെ കേസൊക്കെ നമ്മള്‍ക്ക് അറിയാവുന്നതാണ് എന്നാണ് മന്ത്രി എം.എല്‍.എ.യ്ക്ക് മറുപടി നല്‍കിയത്.
