കോവളത്ത് ഒരു കറുത്ത കുത്ത്; ഒരു കറുത്ത കുത്ത് ഇല്ലേ..; കുറെ നല്ലതിന്റെ ഇടയിൽ ഒരു ചീത്ത; കോൺഗ്രസിന്റെ സ്ഥാനാർത്ഥിയാണ് കൂടുതൽ ഒന്നും പറയുന്നില്ല; അണികളെ കണ്ടതും വേദിയിൽ 'വാ'വിട്ട വാക്കുകളുമായി നേതാവ്; എം. വിൻസെന്റിനെതിരെ അധിക്ഷേപ പരാമർശവുമായി എ. വിജയരാഘവൻ; കോവളത്ത് രാഷ്ട്രീയ വിവാദം പുകയുന്നു

തിരുവനന്തപുരം: കോവളത്തെ യു.ഡി.എഫ് സ്ഥാനാർത്ഥി എം. വിൻസെന്റിനെതിരെ വ്യക്തിപരമായ അധിക്ഷേപ പരാമർശവുമായി എൽ.ഡി.എഫ് കൺവീനർ എ. വിജയരാഘവൻ. തിരഞ്ഞെടുപ്പ് പ്രചാരണത്തിന്റെ ഭാഗമായി നടന്ന യോഗത്തിലാണ് എം. വിൻസെന്റിനെതിരെ വിജയരാഘവൻ വിവാദമായ വാക്കുകൾ ഉപയോഗിച്ചത്. സംഭവത്തിന്റെ വീഡിയോ ദൃശ്യങ്ങൾ പുറത്തുവന്നതോടെ വലിയ രാഷ്ട്രീയ വിവാദത്തിനാണ് കോവളം മണ്ഡലം സാക്ഷ്യം വഹിക്കുന്നത്.

കോവളത്തെ എൽ.ഡി.എഫ് സ്ഥാനാർത്ഥിയുടെ പ്രചാരണ യോഗത്തിൽ സംസാരിക്കവേയാണ് വിജയരാഘവൻ വിൻസെന്റിനെ കടന്നാക്രമിച്ചത്. സ്ഥാനാർത്ഥിയെ വംശീയമായി അധിക്ഷേപിക്കുന്ന രീതിയിലായിരുന്നു വിജയരാഘവന്റെ പ്രസംഗം. വിൻസെന്റിനെ പോലെയുള്ള ഒരാൾ നിയമസഭയിൽ ഇരിക്കാൻ യോഗ്യനല്ലെന്നും പ്രസംഗത്തിൽ അദ്ദേഹം സൂചിപ്പിച്ചു.

എ. വിജയരാഘവന്റെ വാക്കുകൾ ഇങ്ങനെ...

നല്ലകാലത്തും കുറച്ച് കഷ്ടക്കാലം ഉണ്ടാവൂലെ..കുറെ നല്ലതിന്റെ ഇടയിൽ ഒരു ചീത്ത..അരി കൊണ്ടുവന്നാലേ പുത്തരിയുടെ ഇടയിൽ ചീത്ത കാണും അത് എടുത്തെറിയും ഉറപ്പല്ലേ..ആ അങ്ങനെ നല്ല സ്ഥാനാർത്ഥികളെ കേരളം കണ്ടോണ്ട് ഇരിക്കുന്ന കേരളത്തിന്റെ വളർച്ചയുടെ കാലത്ത് ഒരു കറുത്ത കുത്ത് എവിടെ കോവളത്ത്. കോവളത്ത് ഒരു കറുത്ത കുത്ത് ഇല്ലേ..കോൺഗ്രസിന്റെ സ്ഥാനാർത്ഥിയാണ് കൂടുതൽ വിശദാംശങ്ങളിലേക്ക് കടക്കുന്നില്ല. എന്ന് അദ്ദേഹം വ്യക്തമാക്കി

അതേസമയം, വിജയരാഘവന്റെ പരാമർശം തികച്ചും വ്യക്തിഹത്യയുമാണെന്ന് ആരോപിച്ച് യു.ഡി.എഫ് രംഗത്തെത്തി. തോൽവി ഭയന്നാണ് എൽ.ഡി.എഫ് നേതാക്കൾ ഇത്തരത്തിൽ തരംതാഴ്ന്ന അധിക്ഷേപങ്ങൾ ഉന്നയിക്കുന്നതെന്ന് കോൺഗ്രസ് നേതൃത്വം കുറ്റപ്പെടുത്തി. വിജയരാഘവൻ മാപ്പുപറയണമെന്നും തിരഞ്ഞെടുപ്പ് കമ്മീഷന് പരാതി നൽകുമെന്നും യു.ഡി.എഫ് പ്രവർത്തകർ വ്യക്തമാക്കി.

എന്നാൽ താൻ വസ്തുതകൾ മാത്രമാണ് പറഞ്ഞതെന്നും ആരെയും വ്യക്തിപരമായി അധിക്ഷേപിക്കാൻ ശ്രമിച്ചിട്ടില്ലെന്നുമാണ് വിജയരാഘവന്റെ നിലപാട്. പ്രസംഗത്തിലെ വാക്കുകൾ വളച്ചൊടിക്കപ്പെട്ടതാണെന്നും രാഷ്ട്രീയമായ വിമർശനമാണ് താൻ നടത്തിയതെന്നും അദ്ദേഹം വിശദീകരിച്ചു.

അതിനിടെ, തിരഞ്ഞെടുപ്പിന് തൊട്ടടുത്ത ദിവസങ്ങളിൽ ഉയർന്നുവന്ന ഈ വിവാദം മണ്ഡലത്തിലെ വോട്ടിംഗിനെ സ്വാധീനിക്കുമോ എന്ന ആശങ്കയിലാണ് രാഷ്ട്രീയ പാർട്ടികൾ. എം. വിൻസെന്റ് തന്നെ വ്യക്തിപരമായി ഈ പരാമർശത്തിൽ കടുത്ത പ്രതിഷേധം രേഖപ്പെടുത്തിയിട്ടുണ്ട്. മണ്ഡലത്തിലെ വോട്ടർമാർക്കിടയിൽ ഈ വിഷയം സജീവ ചർച്ചയായിരിക്കുകയാണ്.

മുൻപും സമാനമായ രീതിയിൽ രാഷ്ട്രീയ നേതാക്കൾക്കെതിരെ പരാമർശങ്ങൾ നടത്തി വിജയരാഘവൻ വിവാദങ്ങളിൽ അകപ്പെട്ടിട്ടുണ്ട്. പുതിയ സംഭവവികാസങ്ങൾ കോവളത്തെ പോരാട്ടത്തിന് കൂടുതൽ ചൂടേറ്റിയിരിക്കുകയാണ്.