അടൂർ നഗരസഭയിലെ യുഡിഎഫ് സ്ഥാനാർത്ഥി ഫെനി നൈനാന് വൻ തോൽവി; പരാജയപ്പെട്ടത് രാഹുലിന്റെ ഏറ്റവും അടുത്ത വിശ്വസ്തൻ; സീറ്റ് നിലനിർത്തി ബിജെപി
പത്തനംതിട്ട: പാലക്കാട് എംഎൽഎ രാഹുൽ മാങ്കൂട്ടത്തിലിന്റെ വിശ്വസ്തനും അടൂർ നഗരസഭയിലെ എട്ടാം വാർഡ് യുഡിഎഫ് സ്ഥാനാർത്ഥിയുമായിരുന്ന ഫെനി നൈനാന് തദ്ദേശ തെരഞ്ഞെടുപ്പിൽ തോൽവി. ബിജെപി സിറ്റിംഗ് സീറ്റ് നിലനിർത്തിയ വാർഡിൽ ഫെനി നൈനാൻ മൂന്നാം സ്ഥാനത്താണ് എത്തിയത്. രാഹുൽ മാങ്കൂട്ടത്തിലുമായി ബന്ധപ്പെട്ട ഒരു ബലാത്സംഗ കേസിൽ ഫെനി നൈനാനെതിരെയും ഗുരുതര ആരോപണങ്ങൾ ഉയർന്നിരുന്നു.
അതേസമയം, രാഹുൽ മാങ്കൂട്ടത്തിലിന്റെ മറ്റൊരു വിശ്വസ്തനായ റിനോ പി. രാജൻ ഏറത്ത് പഞ്ചായത്തിലെ ആറാം വാർഡിൽ 240 വോട്ടിന്റെ ഭൂരിപക്ഷത്തിൽ വിജയിച്ചു.
പത്തനംതിട്ട നഗരസഭയിലെ പതിനാറാം വാർഡിൽ നടന്ന തെരഞ്ഞെടുപ്പിൽ കോൺഗ്രസ് വിമതനായ ബിബിൻ ബേബി 248 വോട്ടിന്റെ ഭൂരിപക്ഷത്തിൽ വിജയം നേടി. ഇവിടെ കോൺഗ്രസ് പ്രതിപക്ഷ നേതാവ് ജാസിം കുട്ടിയെയാണ് ബിബിൻ തോൽപ്പിച്ചത്. എഴുമറ്റൂർ പഞ്ചായത്തിലെ രണ്ടാം വാർഡിൽ ബിജെപിക്ക് അട്ടിമറി വിജയം നേടാനായി. 25 വർഷത്തിലേറെയായി സിപിഎം ഭരിച്ചിരുന്ന വാർഡിൽ ബിജെപി പത്തനംതിട്ട ജില്ലാ സെക്രട്ടറി കെ. ബിന്ദുവാണ് ജയിച്ചത്.
