കെ. സുധാകരന് 'അടിയുറച്ച' കോണ്ഗ്രസുകാരന്; സംശയങ്ങള്ക്ക് സ്ഥാനമില്ലെന്ന് കെ.സി. വേണുഗോപാല്
ന്യൂഡല്ഹി: കെപിസിസി അധ്യക്ഷന് കെ. സുധാകരന്റെ പാര്ട്ടി കൂറിനെച്ചൊല്ലി രാഷ്ട്രീയ കേന്ദ്രങ്ങളില് നടക്കുന്ന പ്രചാരണങ്ങള്ക്ക് കടുത്ത ഭാഷയില് മറുപടി നല്കി എഐസിസി ജനറല് സെക്രട്ടറി കെ.സി. വേണുഗോപാല്. കെ. സുധാകരന് എന്നും അടിയുറച്ച കോണ്ഗ്രസുകാരനായിരിക്കുമെന്നും അദ്ദേഹത്തിന്റെ വിശ്വസ്തതയെ ആര്ക്കും ചോദ്യം ചെയ്യാനാവില്ലെന്നും വേണുഗോപാല് വ്യക്തമാക്കി. സുധാകരന്റെ പാര്ട്ടിയോടുള്ള അചഞ്ചലമായ നിലപാടിനെക്കുറിച്ച് ഫേസ്ബുക്കില് പങ്കുവെച്ച കുറിപ്പിലൂടെയാണ് വേണുഗോപാല് നിലപാട് വ്യക്തമാക്കിയത്.
ഡല്ഹിയിലെത്തിയ കെ. സുധാകരന് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയുമായും പ്രതിപക്ഷ നേതാവ് രാഹുല് ഗാന്ധിയുമായും നടത്തിയ നിര്ണ്ണായക കൂടിക്കാഴ്ചയ്ക്ക് പിന്നാലെയാണ് വേണുഗോപാലിന്റെ ഈ പ്രതികരണം. സുധാകരനെപ്പറ്റി വിവിധ കേന്ദ്രങ്ങളില് നടക്കുന്ന അനാവശ്യ ചര്ച്ചകള്ക്കുള്ള കൃത്യമായ മറുപടിയാണ് ഈ കൂടിക്കാഴ്ചയെന്ന് അദ്ദേഹം പറഞ്ഞു. പലവിധ താല്പര്യങ്ങള് മുന്നിര്ത്തി നടക്കുന്ന അപവാദ പ്രചാരണങ്ങളില് ഇനി ഒട്ടും പ്രസക്തിയില്ലെന്നും അദ്ദേഹം കൂട്ടിച്ചേര്ത്തു.
'ഇന്ത്യന് നാഷണല് കോണ്ഗ്രസ് എന്ന പ്രസ്ഥാനം അതിന്റെ ഹൃദയത്തോട് എക്കാലവും ചേര്ത്തുപിടിക്കുന്ന പേരുകളില് ഒന്നാണ് കെ. സുധാകരന്. മരണം വരെ അദ്ദേഹം അടിയുറച്ച കോണ്ഗ്രസുകാരനായി തുടരും,' കെ.സി. വേണുഗോപാല് കുറിച്ചു. സുധാകരന് പാര്ട്ടിക്ക് നല്കി വരുന്ന സേവനങ്ങളെ ഹൈക്കമാന്ഡ് അര്ഹിക്കുന്ന പ്രാധാന്യത്തോടെയാണ് വിലമതിക്കുന്നതെന്നും കൂടിക്കാഴ്ചയിലൂടെ ഇത് ഒരിക്കല് കൂടി വ്യക്തമായെന്നും അദ്ദേഹം പറഞ്ഞു.
കെ. സുധാകരന്റെ രാഷ്ട്രീയ നീക്കങ്ങളെപ്പറ്റി ഇടതുമുന്നണി ഉള്പ്പെടെയുള്ള എതിരാളികള് ഉയര്ത്തിയ പരിഹാസങ്ങള്ക്കും ചോദ്യങ്ങള്ക്കും ഇതോടെ അറുതിയായിരിക്കുകയാണ്. ഹൈക്കമാന്ഡിന്റെ പൂര്ണ്ണ പിന്തുണ സുധാകരനുണ്ടെന്ന് വ്യക്തമാക്കുന്നതിലൂടെ വരാനിരിക്കുന്ന തിരഞ്ഞെടുപ്പ് പോരാട്ടങ്ങള്ക്ക് കേരളത്തിലെ കോണ്ഗ്രസിനെ സജ്ജമാക്കുക എന്ന ലക്ഷ്യം കൂടിയാണ് ഈ പ്രസ്താവനയ്ക്ക് പിന്നിലുള്ളത്. സുധാകരനെ തകര്ക്കാന് നോക്കുന്നവരുടെ നീക്കങ്ങള് വിലപ്പോവില്ലെന്ന മുന്നറിയിപ്പ് കൂടിയാണ് വേണുഗോപാല് നല്കുന്നത്.
