വോട്ടെടുപ്പ് ദിനത്തില് വടക്കന് കേരളത്തില് വ്യാപക ആക്രമണം; ബൂത്ത് ഏജന്റുമാര്ക്ക് നേരെ ക്രൂരവേട്ട; ഇരിങ്ങാലക്കുടയില് ബിജെപി ബൂത്ത് പ്രസിഡന്റിന് കുത്തേറ്റു; ്ത്രീകളുടെ മേല് നായ്ക്കുരണപ്പൊടി എറിഞ്ഞു
കണ്ണൂര്: പോളിങ് ദിനത്തില് വടക്കന് കേരളത്തില് വ്യാപക അക്രമം. കണ്ണൂര്, കോഴിക്കോട്, കാസര്കോട് ജില്ലകളിലാണ് ഏറ്റവും കൂടുതല് അക്രമങ്ങള് റിപ്പോര്ട്ട് ചെയ്യപ്പെട്ടത്. വടക്കന് കേരളത്തിലെ ധര്മ്മടം, മട്ടന്നൂര്, തലശ്ശേരി, പയ്യന്നൂര്, പേരാവൂര് മണ്ഡലങ്ങളില് യുഡിഎഫ് ബൂത്ത് ഏജന്റുമാര്ക്ക് നേരെ ക്രൂരമായ ആക്രമണങ്ങളുണ്ടായി. പരിക്കേറ്റ നിരവധി ഏജന്റുമാര് വിവിധ ആശുപത്രികളില് ചികിത്സ തേടിയിരിക്കുകയാണ്. സിപിഎം പ്രവര്ത്തകരാണ് ഈ ആക്രമണങ്ങള്ക്ക് പിന്നിലെന്ന് യുഡിഎഫ് നേതൃത്വം ആരോപിക്കുന്നു. നാദാപുരത്തും ബാലുശ്ശേരിയിലും സമാനമായ രീതിയില് യുഡിഎഫ് ഏജന്റുമാര്ക്ക് പരിക്കേറ്റു. മട്ടന്നൂരില് കോണ്ഗ്രസ് മന്ദിരം അടിച്ചുതകര്ത്തത് പ്രദേശത്ത് വലിയ സംഘര്ഷാവസ്ഥ സൃഷ്ടിച്ചു. തളിപ്പറമ്പ് മലപ്പട്ടത്ത് വോട്ട് ചെയ്യാനെത്തിയ യുഡിഎഫ് സ്ഥാനാര്ത്ഥി ടി.കെ. ഗോവിന്ദനെ സിപിഎം പ്രവര്ത്തകര് കൂകിവിളിച്ചതും തളിപ്പറമ്പ്, മട്ടന്നൂര് മണ്ഡലങ്ങളിലെ എന്ഡിഎ ഏജന്റുമാര്ക്ക് നേരെയുണ്ടായ ആക്രമണങ്ങളും വോട്ടെടുപ്പ് ദിനത്തിന്റെ സമാധാനാന്തരീക്ഷം കെടുത്തി.
കാസര്കോട് ഉദിനൂരിലും പേരാവൂര് മുഴക്കുന്നിലും വോട്ട് ചെയ്യാനെത്തിയവരോട് അങ്ങേയറ്റം ക്രൂരമായ രീതിയിലാണ് അക്രമികള് പെരുമാറിയത്. യുഡിഎഫ് വനിതാ ബൂത്ത് ഏജന്റ് ഉള്പ്പെടെയുള്ളവര്ക്ക് നേരെ നായ്ക്കുരണ പൊടി പ്രയോഗമുണ്ടായി. ശാരീരികമായ അവശത നേരിട്ട ഇവരെ ഉടന് ആശുപത്രിയില് പ്രവേശിപ്പിച്ചു. ഈ സംഭവത്തില് കേസെടുക്കാന് ചീഫ് ഇലക്ഷന് ഓഫീസര് കര്ശന നിര്ദ്ദേശം നല്കിയിട്ടുണ്ട്. കുറ്റ്യാടിയില് കള്ളവോട്ട് ചോദ്യം ചെയ്ത യുഡിഎഫ് ഏജന്റുമാരായ രാഹുല് ചാലില്, ഷഫീഖ് എന്നിവര്ക്കും മര്ദ്ദനമേറ്റു. പേരാമ്പ്രയില് പ്രായമായ അയല്വാസിയെ വോട്ട് ചെയ്യാന് സഹായിച്ച സ്ത്രീയെ സിപിഎം ജനപ്രതിനിധി മര്ദ്ദിച്ചതായും പരാതി ഉയര്ന്നിട്ടുണ്ട്.
സംസ്ഥാനത്തിന്റെ മറ്റ് ഭാഗങ്ങളിലും സംഘര്ഷങ്ങള്ക്ക് കുറവില്ലായിരുന്നു. തൃശൂര് ഇരിങ്ങാലക്കുട ഐക്കരക്കുന്നില് ബിജെപി ബൂത്ത് പ്രസിഡന്റ് സുരേഷിന് വയറ്റില് കുത്തേറ്റു. ഭക്ഷണം ഒരുക്കുന്നതുമായി ബന്ധപ്പെട്ട തര്ക്കത്തിനിടെയാണ് സുരേഷിന് നേരെ ആക്രമണമുണ്ടായത്. വ്യക്തിവൈരാഗ്യമാണ് ഇതിന് പിന്നിലെന്ന് പോലീസ് പറയുമ്പോഴും രാഷ്ട്രീയ പാര്ട്ടികള്ക്കിടയില് ഇത് പ്രതിഷേധത്തിന് കാരണമായി. തിരുവനന്തപുരം പെരുമാതുറയിലും പട്ടാമ്പിയിലും എല്ഡിഎഫ്-യുഡിഎഫ് പ്രവര്ത്തകര് തമ്മില് ഉരസലുകളുണ്ടായി. പട്ടാമ്പിയില് സ്ഥാനാര്ത്ഥി മുഹമ്മദ് മുഹ്സിനെ യുഡിഎഫ് പ്രവര്ത്തകര് തടഞ്ഞത് സംഘര്ഷത്തിന് വഴിവെച്ചു.
കണ്ണൂര് മയ്യില് അരിമ്പ്രയില് സിപിഎം പ്രവര്ത്തകനായ പ്രകാശന് കുത്തേറ്റത് സംഭവങ്ങളുടെ ഗൗരവം വര്ദ്ധിപ്പിക്കുന്നു. കോണ്ഗ്രസ് പ്രവര്ത്തകരാണ് ആക്രമണത്തിന് പിന്നിലെന്ന് സിപിഎം ആരോപിച്ചു. അക്രമങ്ങളില് പരിക്കേറ്റ പലരുടെയും നില ഗുരുതരമായി തുടരുകയാണ്. ജനാധിപത്യപരമായ വോട്ടെടുപ്പ് പ്രക്രിയയെ അട്ടിമറിക്കാനും വോട്ടര്മാരെയും ഏജന്റുമാരെയും ഭയപ്പെടുത്താനും ലക്ഷ്യമിട്ടുള്ള ഇത്തരം അക്രമങ്ങള്ക്കെതിരെ ശക്തമായ നടപടി വേണമെന്നാണ് സ്ഥാനാര്ത്ഥികളുടെയും വിവിധ രാഷ്ട്രീയ പാര്ട്ടികളുടെയും ആവശ്യം. പല മണ്ഡലങ്ങളിലും പോളിങ് അവസാനിച്ച ശേഷവും അനിഷ്ട സംഭവങ്ങള് ഒഴിവാക്കാന് പോലീസ് കാവല് ശക്തമാക്കിയിരിക്കുകയാണ്.
