ന്യൂഡൽഹി: ഇന്ത്യക്ക് ഭീഷണിയായ ഭീകരരെ പാക് മണ്ണിൽ വച്ചുതന്നെ വകവരുത്താൻ ആസൂത്രണം ചെയ്തെന്നും ഭീകരരെ വധിച്ചതിനു പിന്നിൽ ഇന്ത്യയുടെ കൈയുണ്ടെന്നുമുള്ള ബ്രിട്ടീഷ് പത്രമായ 'ദ ഗാർഡിയൻ' വാർത്ത തള്ളി വിദേശ കാര്യ മന്ത്രാലയം. 2020 ന് ശേഷം രഹസ്യാന്വേഷണ ഏജൻസിയായ റോ മുൻകൈയെടുത്ത് പാക്കിസ്ഥാനിൽ 20 ഓളം ഭീകരെ വകവരുത്തിയെന്ന ആരോപണമാണ് കേന്ദ്രമന്ത്രി എസ് ജയശങ്കർ തള്ളിയത്.

ദേശസുരക്ഷയ്ക്കു ഭീഷണിയാവുന്നവരെ വിദേശത്തു വച്ചും വധിക്കാം എന്ന നയം ഇന്ത്യ 2019ൽ നരേന്ദ്ര മോദി രണ്ടാം തവണ പ്രധാനമന്ത്രി ആയ ശേഷം ആവിഷ്‌കരിച്ചെന്നു പത്രം പറയുന്നു. ഇസ്രയേലും റഷ്യയും നടപ്പാക്കുന്ന നയമാണ് ഇന്ത്യയും ഏറ്റെടുത്തത്. കാനഡയിലെ കൊലയ്ക്കു പുറമെ യുഎസിൽ ഖാലിസ്ഥാൻ നേതാവ് ഗുർപത്വന്ത് സിങ് പന്നുനിനെ വധിക്കാൻ ഗൂഢാലോചന നടത്തി എന്ന കേസും ആ നയത്തിന്റെ ഭാഗമാണ്.

ബ്രിട്ടീഷ് പത്രമായ ദി ഗാർഡിയനാണ് ഇന്ത്യൻ-പാക് ഇന്റലിജൻസ് ഉദ്യോഗസ്ഥരെ ഉദ്ധരിച്ചുകൊണ്ടെന്ന പേരിൽ വിദേശ മണ്ണിൽ ഭീകരരുടെ ഉന്മൂലനം ഇന്ത്യ ആസൂത്രണം ചെയ്ത് നടപ്പാക്കുന്നുവെന്ന് റിപ്പോർട്ട് ചെയ്തത്. ഖലിസ്ഥാൻ വിഘടനവാദികളും ഇത്തരത്തിൽ ഉന്മൂലനം ചെയ്യപ്പെട്ടവരിൽ ഉൾപ്പെടുന്നു. എന്നാൽ, തികച്ചും, ദുരുദ്ദേശ്യത്തോടെയുള്ള ഇന്ത്യ - വിരുദ്ധ പ്രചാരണങ്ങളുടെ ഭാഗമാണു റിപ്പോർട്ടെന്നും മറ്റുരാജ്യങ്ങളിൽ ഇത്തരം കൊലപാതകങ്ങൾ നടത്തുന്നത് ഇന്ത്യയുടെ നയമല്ലെന്നും വിദേശകാര്യ മന്ത്രി എസ്.ജയശങ്കർ പറഞ്ഞു.

2023 ആയതോടെ കൊലപാതകങ്ങളുടെ എണ്ണം വർധിച്ചുവെന്നും അജ്ഞാതരായ തോക്കുധാരികളാണു കൊലപാതകത്തിനു പിന്നിലെന്നും ഗാർഡിയൻ റിപ്പോർട്ടിൽ പറയുന്നു. 2019 ലെ പുൽവാമ ഭീകരാക്രമണത്തിന് ശേഷം ആക്രമണ ഭീഷണികളെ മുൻകൂട്ടി കണ്ട് ചെറുക്കുകയെന്ന തന്ത്രമാണ് ഇന്ത്യ ആവിഷ്‌കരിച്ചതെന്ന ആരോപണം ഉയർന്നിരുന്നു.

ഇസ്രയേലിലെ മൊസാദിന്റെയും, റഷ്യയിലെ കെജിബിയുടെയും മാതൃകയിലാണ് ഇത്തരം ഉന്മൂലനം എന്നും ആക്ഷേപങ്ങളുണ്ടായിരുന്നു. എന്നാൽ, ഇന്ത്യൻ സർക്കാർ ഈ ആരോപണം ആവർത്തിച്ച് നിഷേധിച്ചിട്ടുണ്ടെന്നും ഗാർഡിയൻ റിപ്പോർട്ടിൽ പറയുന്നുണ്ട്. യുഎഇയിൽ നിന്ന് പ്രധാനമായി പ്രവർത്തിക്കുന്ന ഇന്ത്യൻ ഇന്റലിജൻസ് സ്ലീപ്പർ സെല്ലുകളാണ് ഈ കൊലപാതകങ്ങൾ നടത്തുന്നതെന്നാണ് പാക് ഇന്റലിജൻസ് ആരോപിക്കുന്നത്. കൊലപാതകത്തിനായി വ്യാജ സാഹചര്യങ്ങൾ സൃഷ്ടിച്ച് ജിഹാദിസ്റ്റുകളെയോ, പ്രാദേശിക ക്രിമിനലുകളെയോ ഉപയോഗിച്ചാണ് കൊല നടത്തുന്നതെന്നും പാക്കിസ്ഥാൻ ആരോപിക്കുന്നുവെന്നും റിപ്പോർട്ടിൽ പറയുന്നു. കഴിഞ്ഞ നാല് വർഷത്തിനിടെ വധിക്കപ്പെട്ട 21 ഭീകരരുടെ പട്ടികയാണ് പുറത്തുവിട്ടാണ് ആരോപണം.

(1) ഖ്വാജ ഷാഹിദ് ( കൊല്ലപ്പെട്ടത് 6 നവംബർ 2023)

ലഷ്‌കർ-ഇ-തൊയ്ബ ഭീകരനായ ഷാഹിദിനെ പാക് അധീന കശ്മീരിൽ (ജീഗ) നിന്ന് അജ്ഞാതരായ തോക്കുധാരികൾ തട്ടിക്കൊണ്ടുപോയി, പിന്നീട് പാക് അധീന കശ്മീരിലെ നിയന്ത്രണ രേഖയ്ക്ക് സമീപം (എൽഒസി) മരിച്ച നിലയിൽ കണ്ടെത്തുകയായിരുന്നു. 2018 ഫെബ്രുവരിയിൽ ജമ്മുവിലെ ഇന്ത്യൻ സൈനിക ക്യാമ്പിന് നേരെയുണ്ടായ സുൻജ്വാൻ ഭീകരാക്രമണത്തിന്റെ മുഖ്യസൂത്രധാരനായിരുന്നു ഇയാൾ. പാക് അധീന കശ്മീരിലെ നിയന്ത്രണ രേഖയ്ക്ക് സമീപമാണ് ഇയാളുടെ തലയറുത്ത നിലയിൽ മൃതദേഹം കണ്ടെത്തിയത്.

(2) അക്രം ഗസ്സി (കൊല്ലപ്പെട്ടത് 10 നവംബർ 2023)

ലഷ്‌കറെ തൊയ്ബയുടെ മറ്റൊരു ഉന്നത കമാൻഡറായ അക്രം ഗസ്സിയെ പാക്കിസ്ഥാനിലെ ഖൈബർ പഖ്തൂൺഖ്വയിൽ മോട്ടോർ സൈക്കിളിൽ എത്തിയ അക്രമികൾ കൊലപ്പെടുത്തുകയായിരുന്നു. കശ്മീർ താഴ്‌വരയിലേക്ക് നുഴഞ്ഞുകയറിയ തീവ്രവാദികൾ പരിശീലനം നൽകിയതിൽ പ്രധാനിയായിരുന്നു അക്രം ഗസ്സി. അതിർത്തി കടന്നുള്ള ഭീകര പ്രവർത്തനത്തിന് ചുക്കാൻ പിടിച്ച കൊടുംഭീകരനാണ് കൊല്ലപ്പെട്ട അക്രം ഖാസി.

(3) മൗലാന റഹീം ഉള്ളാ താരിഖ് (കൊല്ലപ്പെട്ടത് 14 നവംബർ 2023)

ജെയ്ഷെ മുഹമ്മദ് തലവൻ മൗലാന മസൂദ് അസ്ഹറിന്റെ അടുത്ത സഹായി മൗലാന റഹീം ഉല്ലാ താരിഖ് കറാച്ചിയിൽവച്ചാണ് വെടിയേറ്റു മരിച്ചത്. ജമ്മു കശ്മീരിലെ ഭീകരാക്രമണങ്ങളുടെ ആസൂത്രണങ്ങൾക്ക് പിന്നിലെ പ്രധാനിയാണ് കൊല്ലപ്പെട്ട മൗലാന റഹീം ഉല്ലാ താരിഖ്.

(4) മൗലാന ഷേർ ബഹാദൂർ ( കൊല്ലപ്പെട്ടത് 3 ഡിസംബർ 2023)

ഖൈബർ പഖ്തൂൺഖ്വയിലെ പെഷവാറിൽ തീവ്ര പ്രഭാഷകനും ജെ.ഇ.എമ്മിന്റെ അറിയപ്പെടുന്ന അനുയായിയുമായ മൗലാന ഷേർ ബഹാദൂർ പോയിന്റ് ബ്ലാങ്ക് റേഞ്ചിൽ വെടിയേറ്റാണ് കൊല്ലപ്പെട്ടത്.

(5) ലഖ്ബീർ സിങ് റോഡ് ( കൊല്ലപ്പെട്ടത് 2 ഡിസംബർ 2023)

ഖാലിസ്ഥാൻ ഭീകരനും ജർണയിൽ സിങ് ഭിന്ദ്രൻവാലയുടെ അനന്തരവനുമായ ലഖ്ബീർ സിങ് റോഡെ ഹൃദയാഘാതം മൂലം മരിച്ചതായി റിപ്പോർട്ട്. മയക്കുമരുന്ന്, ആയുധങ്ങൾ, സ്‌ഫോടകവസ്തുക്കൾ, ടിഫിൻ ബോംബുകൾ എന്നിവ പഞ്ചാബിലേക്ക് കടത്തുന്നതിൽ ഇയാൾ ഏർപ്പെട്ടിരുന്നു. നേരത്തെ, 20 കിലോ ആർഡിഎക്സ് സ്ഫോടകവസ്തുക്കളുമായി നേപ്പാളിൽ പിടിയിലായിരുന്നു, ഇത് പാക്കിസ്ഥാനിൽ നിന്ന് എത്തിച്ചതാണെന്ന് സമ്മതിച്ചിരുന്നു.

(6) അദ്നാൻ അഹമ്മദ് (കൊല്ലപ്പെട്ടത് 5 ഡിസംബർ 2023)

2016ൽ പാംപോറിൽ സിആർപിഎഫ് വാഹനവ്യൂഹത്തിന് നേരെയുണ്ടായ ആക്രമണത്തിന്റെ മുഖ്യ സൂത്രധാരനായ ഹൻസല അദ്‌നാൻ എന്നറിയപ്പെടുന്ന അദ്‌നാൻ അഹമ്മദിനെ ഡിസംബർ 3 ന് കറാച്ചിയിൽ വെച്ച് അജ്ഞാതരായ തോക്കുധാരികൾ ആക്രമിക്കുകയായിരുന്നു. പാക്കിസ്ഥാൻ സൈന്യം നടത്തുന്ന ആശുപത്രിയിൽ രഹസ്യമായി ചികിത്സയിൽ കഴിയവെ അദ്‌നാൻ അഹമ്മദ് ഡിസംബർ 5 ന് മരണത്തിന് കീഴടങ്ങി. ഉധംപൂരിലെ ആക്രമണങ്ങൾ സംഘടിപ്പിക്കുന്നതിലും പാക് അധീന കശ്മീരിലെ ലഷ്‌കർ ക്യാമ്പുകളിൽ റിക്രൂട്ട് ചെയ്യുന്നവരെ പരിശീലിപ്പിക്കുന്നതിലും ഇയാൾ പങ്കാളിയായിരുന്നു.

(7) ഷാഹിദ് ലത്തീഫ് (കൊല്ലപ്പെട്ടത് 11 ഒക്ടോബർ 2023)

ജെയ്ഷെ മുഹമ്മദുമായി ബന്ധമുള്ള ലത്തീഫ് എന്ന ഭീകരൻ ഇന്ത്യൻ സുരക്ഷാ ഏജൻസികളുടെ മോസ്റ്റ് വാണ്ടഡ് ലിസ്റ്റിൽ ഉൾപ്പെട്ടിരുന്നു. 2016-ലെ പത്താൻകോട്ട് ഭീകരാക്രമണത്തിന്റെ സൂത്രധാരനായിരുന്നു. ആക്രമണത്തിൽ ഏഴ് സുരക്ഷാ ഉദ്യോഗസ്ഥരുടെ വീരമൃത്യുവിന് ഇടയാക്കിയിരുന്നു. ഒക്ടോബർ 11 ന് പാക്കിസ്ഥാനിലെ സിയാൽകോട്ടിൽ അജ്ഞാതരായ തോക്കുധാരികളാൽ കൊല്ലപ്പെടുകയായിരുന്നു.

(8) സിയാവുർ റഹ്‌മാൻ (കൊല്ലപ്പെട്ടത് 29 സെപ്റ്റംബർ 2023)

കറാച്ചിയിലെ ഗുലിസ്ഥാൻ-ഇ-ജൗഹറിൽ പുരോഹിതനായി സേവനമനുഷ്ഠിച്ച ലഷ്‌കർ-ഇ-തൊയ്ബയുടെ (എൽഇടി) മറ്റൊരു അംഗം, ഇന്ത്യയ്ക്കെതിരെ ആയുധമെടുക്കാനും ജിഹാദ് നടത്താനും യുവാക്കളെ നിരന്തരം പ്രേരിപ്പിക്കുകയും തീവ്രവാദ ക്യാമ്പിൽ പരിശീലനത്തിന് വഴിയൊരുക്കുകയും ചെയ്തിരുന്നു. മോട്ടോർ സൈക്കിളിൽ എത്തിയ അജ്ഞാതരായ രണ്ട് അക്രമികളാണ് ഇയാളെ വെടിവെച്ച് കൊന്നത്. തുടർന്ന് പാക്കിസ്ഥാൻ രഹസ്യാന്വേഷണ ഏജൻസിയായ ഇന്റർ-സർവീസസ് ഇന്റലിജൻസ് സുരക്ഷാ നടപടികൾ വർധിപ്പിക്കുകയും ഡസൻ കണക്കിന് ഭീകരരെ ശമ്പളപ്പട്ടികയിൽ ഉൾപ്പെടുത്തി സംരക്ഷണം ഒരുക്കുകയും ചെയ്തിരുന്നു.

(9) സുഖ്ദൂൽ സിങ് (കൊല്ലപ്പെട്ടത് 21 സെപ്റ്റംബർ 2023)

കാനഡ കേന്ദ്രീകരിച്ച് പ്രവർത്തിക്കുന്ന കുപ്രസിദ്ധ ഗുണ്ടാസംഘവും ഖാലിസ്ഥാൻ ഭീകരനുമായ അർഷ്ദീപ് സിങ്ങിന്റെ അടുത്ത അനുയായിയും ഖാലിസ്ഥാൻ ഭീകരനുമായ സുഖ ദുനെകെ എന്നറിയപ്പെടുന്ന സുഖ്ദൂൽ സിങ് കാനഡയിലെ വിന്നിപെഗിൽ വെടിയേറ്റ് മരിച്ചു. മറ്റൊരു ഖാലിസ്ഥാനി ഭീകരൻ ഹർദീപ് സിങ് നിജ്ജാറിന്റെ മരണത്തിന് ഇന്ത്യയെ കുറ്റപ്പെടുത്തി കനേഡിയൻ പ്രധാനമന്ത്രി ജസ്റ്റിൻ ട്രൂഡോ ആരോപിച്ച് രണ്ട് ദിവസത്തിന് ശേഷമാണ് ഇത് സംഭവിച്ചത്. ഫേസ്‌ബുക്ക് പോസ്റ്റിലൂടെ ഉത്തരവാദിത്തം ഏറ്റെടുത്ത ലോറൻസ് ബിഷ്ണോയി സംഘം രംഗത്ത് വന്നിരുന്നു.

(10) അബു ഖാസിം കശ്മീരി (കൊല്ലപ്പെട്ടത് 8 സെപ്റ്റംബർ 2023)

രജൗരി ജില്ലയിൽ ഏഴ് പേർ കൊല്ലപ്പെടുകയും പതിമൂന്ന് പേർക്ക് പരിക്കേൽക്കുകയും ചെയ്ത ധാൻഗ്രി ആക്രമണത്തിന് പിന്നിലെ പ്രധാന സൂത്രധാരൻ ജമ്മുവിലെ താമസക്കാരനായ അബു കാസിം എന്നറിയപ്പെടുന്ന റിയാസ് അഹമ്മദാണ്. പാക് അധീന കശ്മീരിലെ പള്ളിയിൽ വച്ചാണ് അജ്ഞാതരായ തോക്കുധാരികൾ അദ്ദേഹത്തെ കൊലപ്പെടുത്തിയത്. ജമ്മു കാശ്മീരിലെ രജൗരി, പൂഞ്ച് ജില്ലകളിലെ ഭീകരവാദം പുനരുജ്ജീവിപ്പിച്ചതിന് പിന്നിലെ മുഖ്യ സൂത്രധാരനായി ലഷ്‌കറെ ത്വയ്ബ അംഗമായ അബു ഖാസിം കണക്കാക്കപ്പെട്ടിരുന്നു.

(11) സർദാർ ഹുസൈൻ അരയിൻ (കൊല്ലപ്പെട്ടത് 1 ഓഗസ്റ്റ് 2023)

സർദാർ ഹുസൈൻ അരയിന്റെ കൊലപാതകത്തിന്റെ ഉത്തരവാദിത്തം സിദ്ധുദേശ് റെവല്യൂഷണറി ആർമി ഏറ്റെടുത്തു. 2018ൽ ഹഫീസ് സയീദിന്റെ രാഷ്ട്രീയ പാർട്ടിയായ അള്ളാ ഓ അക്‌ബർ തഹ്രീക്കിന്റെ ടിക്കറ്റിലാണ് ഹുസൈൻ തെരഞ്ഞെടുപ്പിൽ മത്സരിച്ചത്.

(12) ഹർദീപ് സിങ് നിജ്ജാർ (കൊല്ലപ്പെട്ടത് 19 ജൂൺ 2023)

കനേഡിയൻ പ്രധാനമന്ത്രി ജസ്റ്റിൻ ട്രൂഡോ പ്രശസ്തനായ, ഭീകര സംഘടനയായ ഖലിസ്ഥാൻ ടൈഗർ ഫോഴ്സിന്റെ തലവനും ഗുരു നാനാക് സിഖ് ഗുരുദ്വാര സാഹിബിന്റെ തലവനുമായ നിജ്ജാർ ഗുരുദ്വാരയുടെ പരിസരത്ത് വെടിയേറ്റ് മരിച്ചു.

പഞ്ചാബിലെ ജലന്ധറിലെ ഭാർ സിങ് പുര ഗ്രാമത്തിൽ ജനിച്ചു വളർന്ന ഇയാളെ ഒന്നിലധികം തീവ്രവാദ പ്രവർത്തനങ്ങളിൽ ഏർപ്പെട്ടിരുന്നതിനാൽ ഇന്ത്യയുടെ എൻഐഎയും പഞ്ചാബ് പൊലീസും തിരയുകയായിരുന്നു.

(13) അവതാർ സിങ് ഖണ്ഡ (കൊല്ലപ്പെട്ടത് 16 ജൂൺ 2023)

യുകെ ആസ്ഥാനമായുള്ള ഖാലിസ്ഥാൻ ഭീകരൻ അവതാർ സിങ് ഖണ്ഡ ഈ വർഷം ജൂണിൽ ബർമിങ്ഹാം ആശുപത്രിയിൽ വച്ച് മരിച്ചു. മാർച്ചിൽ ലണ്ടനിലെ ഇന്ത്യൻ ഹൈക്കമ്മീഷൻ തകർക്കാനുള്ള ശ്രമത്തിന് നേതൃത്വം നൽകിയ അദ്ദേഹം പഞ്ചാബ് പൊലീസിൽ നിന്ന് ഒളിച്ചോടുന്നതിനിടെ വാരിസ് പഞ്ചാബ് ദേ നേതാവ് അമൃത്പാൽ സിംഗിനെ സഹായിച്ചിരുന്നു.

(14) പരംജിത് സിങ് പഞ്ച്വാർ (കൊല്ലപ്പെട്ടത് 6 മെയ് 2023)

മാലിക് സർദാർ സിങ് എന്നറിയപ്പെടുന്ന ഖാലിസ്ഥാൻ കമാൻഡോ ഫോഴ്സ് മേധാവിയുടെ തലവൻ പാക്കിസ്ഥാനിലെ ലാഹോറിലെ തന്റെ വീടിന് സമീപം പ്രഭാത നടത്തം നടത്തുന്നതിനിടെ അജ്ഞാതരുടെ വെടിയേറ്റ് മരിച്ചു.

2020 ജൂലായിൽ നിയമവിരുദ്ധ പ്രവർത്തനങ്ങൾ (തടയൽ) നിയമപ്രകാരം 63 വയസ്സുള്ള പഞ്ച്വാറിനെ ഇന്ത്യ തീവ്രവാദിയായി പ്രഖ്യാപിച്ചിരുന്നു, കൂടാതെ മോസ്റ്റ് വാണ്ടഡ് ലിസ്റ്റിലും ഇന്ത്യ ഉണ്ടായിരുന്നു.

ലിസ്റ്റഡ് തീവ്രവാദ സംഘടനയായ ഖാലിസ്ഥാൻ കമാൻഡോ ഫോഴ്സിന്റെ (കെസിഎഫ്) പ്രധാന നേതാവായിരുന്നു പഞ്ച്വാർ, ലാഹോറിൽ നിന്ന് പ്രവർത്തിക്കുകയായിരുന്നു. 1960ൽ തരൺ തരണിലെ പഞ്ച്വാർ ഗ്രാമത്തിലാണ് അദ്ദേഹം ജനിച്ചത്.

(15) സയ്യിദ് നൂർ ഷാലോബർ (കൊല്ലപ്പെട്ടത് 4 മാർച്ച് 2023)

കശ്മീർ താഴ്‌വരയിലെ തീവ്രവാദ റിക്രൂട്ട്മെന്റിന് കുപ്രസിദ്ധിയാർജ്ജിച്ച, ജമ്മു കശ്മീരിൽ തീവ്രവാദം വ്യാപിപ്പിക്കുന്നതിന് പാക്കിസ്ഥാൻ സൈന്യവുമായും ഐഎസ്‌ഐയുമായും ചേർന്ന് പ്രവർത്തിച്ചിരുന്നു, ഷലോബാർ പാക്കിസ്ഥാനിലെ ഖൈബർ പഖ്തൂൺഖ്വ മേഖലയിൽ അജ്ഞാതരായ തോക്കുധാരികളാൽ കൊല്ലപ്പെട്ടു.

(16) ബഷീർ അഹമ്മദ് പീർ (കൊല്ലപ്പെട്ടത് ഫെബ്രുവരി 20)

നിരോധിത ഭീകര സംഘടനയായ ഹിസ്ബുൾ മുജാഹിദ്ദീന്റെ ഉന്നത കമാൻഡറായ ഇംതിയാസ് ആലം എന്ന ബഷീർ അഹമ്മദ് പീറിനെ പാക്കിസ്ഥാനിലെ റാവൽപിണ്ടിയിൽ അജ്ഞാതർ വെടിവച്ചു കൊലപ്പെടുത്തുകയായിരുന്നു. ജമ്മു കശ്മീരിലെ കുപ്വാര ജില്ലയിൽ നിന്നുള്ള പീർ 15 വർഷത്തിലേറെയായി പാക്കിസ്ഥാനിൽ താമസിച്ചു വരികയായിരുന്നു.

പാക്കിസ്ഥാനിലെ ഹിസ്ബുളിന്റെ 'ലോഞ്ചിങ് ചീഫ്' ആയിരുന്ന അദ്ദേഹം കശ്മീർ താഴ്‌വരയിലേക്ക് നുഴഞ്ഞുകയറ്റക്കാരെയും ആയുധങ്ങളും വെടിക്കോപ്പുകളും റിക്രൂട്ട് ചെയ്യുന്നതിലും അയയ്ക്കുന്നതിലും ഒരു പ്രധാന പങ്ക് വഹിച്ചതായി റിപ്പോർട്ടുണ്ട്.

(17) സയ്യിദ് ഖാലിദ് റാസ (കൊല്ലപ്പെട്ടത് 27 ഫെബ്രുവരി 2023)

ഫെബ്രുവരിയിൽ, തുറമുഖ നഗരമായ കറാച്ചിയിൽ വെച്ച് അജ്ഞാതരായ തോക്കുധാരികൾ മുൻ അൽ-ബദർ മുജാഹിദ്ദീൻ കമാൻഡർ സയ്യിദ് ഖാലിദ് റാസയെ വെടിവെച്ചുകൊന്നു.

ഹിസ്ബുൾ മുജാഹിദ്ദീൻ തലവൻ സയ്യിദ് സലാഹുദ്ദീനുമായി അടുത്ത ബന്ധം പുലർത്തിയിരുന്നതായി കരുതപ്പെടുന്ന റാസ, നുഴഞ്ഞുകയറ്റ വഴികൾ കണ്ടെത്തി ലോജിസ്റ്റിക്‌സ് നൽകിക്കൊണ്ട് പുതിയ റിക്രൂട്ട്മെന്റുകളെ കശ്മീരിലേക്ക് അയയ്ക്കുന്നതിൽ പ്രധാനിയായിരുന്നു.

2022 ഒക്ടോബറിൽ നിയമവിരുദ്ധ പ്രവർത്തനങ്ങൾ (തടയൽ) നിയമപ്രകാരം റാസയെ തീവ്രവാദിയായി പ്രഖ്യാപിച്ച നരേന്ദ്ര മോദി സർക്കാർ അദ്ദേഹത്തെ ഹിസ്ബുൾ മുജാഹിദ്ദീന്റെ 'ലോഞ്ചിങ് കമാൻഡർ' ആയാണ് കണക്കാക്കിയത് 'പ്രത്യേകിച്ച് കുപ്വാരയിലേക്ക് നുഴഞ്ഞുകയറുന്നതിനും ജമ്മുവിലെ പ്രവർത്തനങ്ങൾക്കായി മറ്റ് തീവ്രവാദ ഗ്രൂപ്പുകളുമായി ഏകോപിപ്പിക്കുന്നതിലും പ്രധാനിയായിരുന്നു.

(18) ഐജാസ് അഹമ്മദ് അഹങ്കാർ (കൊല്ലപ്പെട്ടത് 14 ഫെബ്രുവരി 2023)

ആഗോള ഭീകര സംഘടനയായ ഇസ്ലാമിക് സ്റ്റേറ്റിന്റെ ഉന്നത കമാൻഡറായി പ്രവർത്തിക്കുന്ന കശ്മീരി ഭീകരൻ ഐജാസ് അഹമ്മദ് അഹാംഗറിനെ ഈ വർഷം ആദ്യം അഫ്ഗാനിസ്ഥാനിലെ കുനാർ പ്രവിശ്യയിൽ താലിബാൻ കൊലപ്പെടുത്തിയതായി റിപ്പോർട്ട് ചെയ്തിരുന്നു.

(19) ഹർവിന്ദർ സിങ് സന്ധു (കൊല്ലപ്പെട്ടത് 19 നവംബർ 2022)

2021 മെയ് മാസത്തിൽ പഞ്ചാബ് പൊലീസ് ഇന്റലിജൻസ് ആസ്ഥാനത്തിന് നേരെയുണ്ടായ റോക്കറ്റ് പ്രോപ്പൽഡ് ഗ്രനേഡ് ആക്രമണത്തിന്റെ സൂത്രധാരനെന്ന് ആരോപിക്കപ്പെടുന്ന ഖാലിസ്ഥാനി ഭീകരൻ ഹർവീന്ദർ സിങ് റിൻഡ എന്ന ഹർവീന്ദർ സിങ് സന്ധു ലാഹോറിലെ ഒരു ആശുപത്രിയിൽ മരിച്ചു.

പഞ്ചാബി ഗായകൻ സിദ്ധു മൂസ് വാലയുടെ കൊലപാതകത്തിലും ഇയാൾക്ക് ബന്ധമുണ്ട്. ഇയാൾക്ക് എൻഐഎ 10 ലക്ഷം രൂപ പാരിതോഷികം പ്രഖ്യാപിച്ചിരുന്നു. ലാഹോറിലെ സൈനിക ആശുപത്രിയിൽ വൃക്ക തകരാറിലായതിനെ തുടർന്നാണ് സന്ധു മരിച്ചത്.

(20) റിപുദമൻ സിങ് മാലിക് (കൊല്ലപ്പെട്ടത് 14 ജൂലൈ 2022)

2022 ജൂലൈയിൽ കാനഡയിലെ സറേയിൽ 75 കാരനായ റിപുദമൻ സിങ് മാലിക് വെടിയേറ്റ് മരിച്ചു. ഖാലിസ്ഥാനി ഭീകര സംഘടനയായ ബബ്ബർ ഖൽസയുമായി മാലിക്കിന് ബന്ധമുണ്ടായിരുന്നു.

2005-ൽ, മാലിക്കിനെയും കൂട്ടുപ്രതിയായ അജയ്ബ് സിങ് ബാഗ്രിയെയും 1985-ൽ 329 പേരുടെ മരണത്തിനിടയാക്കിയ എയർ ഇന്ത്യ ഫ്ളൈറ്റ് 182-ന് ബോംബ് സ്ഫോടനം നടത്തിയതുമായി ബന്ധപ്പെട്ട കൂട്ടക്കൊല, ഗൂഢാലോചന കുറ്റങ്ങൾ എന്നിവയിൽ നിന്ന് വെറുതെവിട്ടു.

(21) സഹൂർ മിസ്ത്രി (കൊല്ലപ്പെട്ടത് 1 മാർച്ച് 2022)

ഇന്ത്യൻ എയർലൈൻസിന്റെ ഐസി-814 വിമാനം ഹൈജാക്ക് ചെയ്ത അഞ്ച് ഭീകരരിൽ ഒരാളും ജെയ്ഷെ മുഹമ്മദുമായി (ജെഎം) ബന്ധമുള്ള മിസ്ത്രിയും കറാച്ചിയിൽ കൊല്ലപ്പെട്ടു. മിസ്ത്രി തന്റെ ഫർണിച്ചർ ഗോഡൗണിലേക്ക് പ്രവേശിക്കുന്നത് കാത്തുനിന്ന രണ്ട് സായുധ മോട്ടോർ സൈക്കിൾ യാത്രക്കാർ പോയിന്റ് ബ്ലാങ്ക് റേഞ്ചിൽ വെടിവച്ചു കൊലപ്പെടുത്തുകയായിരുന്നു.

പാക്കിസ്ഥാനിൽ അജ്ഞാതർ 2020നു ശേഷം നടത്തിയ 20 കൊലകളിലേക്കു 'ഗാർഡിയൻ' വിരൽ ചൂണ്ടുന്നു. ഇതാദ്യമായി ഇന്ത്യൻ നയം നടപ്പാക്കുന്നവർ പാക്കിസ്ഥാനിൽ നടന്ന കൊലകൾ ചർച്ച ചെയ്തുവെന്നു പത്രം അവകാശപ്പെടുന്നുണ്ട്.

ഇന്ത്യയിൽ ആക്രമണം നടത്തുന്നതിനു മുൻപ് ഭീകരരെ തീർത്തു കളയുക എന്ന നയം പുൽവാമയ്ക്കു ശേഷം നടപ്പായെന്നു 'ഗാർഡിയൻ' പറയുന്നു. 'അവരുടെ സുരക്ഷിത താവളങ്ങൾ പാക്കിസ്ഥാനിൽ ആവുമ്പോൾ നമുക്ക് അവരെ തടയാൻ ബുദ്ധിമുട്ടാണ്,' ഇന്ത്യൻ വൃത്തങ്ങൾ പറയുന്നു. 'അതു കൊണ്ട് അവിടെ വച്ചു തന്നെ അവരെ തീർക്കുക എന്ന തീരുമാനത്തിൽ എത്തിയെന്നുമാണ് ഗാർഡിയൻ റിപ്പോർട്ടിൽ പറയുന്നത്.

അതേ സമയം ഇന്ത്യയുടെ സമാധാനം തകർക്കാൻ ശ്രമിക്കുന്ന ഏതൊരു ഭീകരനും തക്കതായ മറുപടി സർക്കാർ നൽകുമെന്ന് പ്രതിരോധ മന്ത്രി രാജ്നാഥ് സിങ് തിരിച്ചടിച്ചു. ഇന്ത്യ, പാക് ഭീകരരെ ലക്ഷ്യം വെച്ച് ആസൂത്രിത കൊലപാതകങ്ങൾ നടത്തുന്നുവെന്ന ഇന്റലിജൻസ് വൃത്തങ്ങളെ ഉദ്ധരിച്ച ഗാർഡിയൻ റിപ്പോർട്ടിനെ കുറിച്ചുള്ള ചോദ്യത്തിന് മറുപടിയായാണ് രാജ്‌നാഥ് സിങിന്റെ മറുപടി.

"ഭീകരർ പാക്കിസ്ഥാനിലേക്ക് പലായനം ചെയ്താൽ, ഞങ്ങൾ അവരെ പിന്തുടർന്ന് പാക്കിസ്ഥാൻ മണ്ണിൽ തന്നെ വകവരുത്തും. പ്രധാനമന്ത്രി നരേന്ദ്ര മോദി സത്യം ചെയ്തിരുന്നു... ഇന്ത്യയ്ക്ക് അതിനുള്ള കഴിവുണ്ട്, പാക്കിസ്ഥാനും അത് മനസ്സിലാക്കിത്തുടങ്ങിയിരിക്കുന്നു. വിദേശ മണ്ണിൽ തീവ്രവാദികളെ ഉന്മൂലനം ചെയ്യാനുള്ള വിപുലമായ തന്ത്രത്തിന്റെ ഭാഗമായാണ് ഇന്ത്യൻ സർക്കാർ പാക്കിസ്ഥാനിൽ കൊലപാതകത്തിന് ഉത്തരവിട്ടത് എന്നും രാജ്നാഥ് സിങ് പറഞ്ഞു.

കൂടാതെ അയൽക്കാരുമായി സൗഹാർദ്ദപരമായ ബന്ധം നിലനിർത്താനാണ് ഇന്ത്യ ആഗ്രഹിക്കുന്നതെന്നും സിങ് വ്യക്തമാക്കി. "നമ്മുടെ ചരിത്രം നോക്കൂ. നമ്മൾ ഒരു രാജ്യത്തെയും ആക്രമിക്കുകയോ മറ്റേതെങ്കിലും രാജ്യത്തിന്റെ ഒരിഞ്ച് സ്ഥലം പോലും കൈവശപ്പെടുത്തുകയോ ചെയ്തിട്ടില്ല. ഇതാണ് ഇന്ത്യയുടെ സ്വഭാവം. എങ്കിലും നമ്മുടെ മണ്ണിൽ ആരെങ്കിലും ഭീകരത വളർത്തി ഇന്ത്യയെ ഭയപ്പെടുത്താൻ ശ്രമിച്ചാൽ അവരെ വെറുതെ വിടില്ല" അദ്ദേഹം പറഞ്ഞു.