നിയന്ത്രണങ്ങള്‍ കടുപ്പിച്ചപ്പോള്‍ സ്റ്റുഡന്റ് വിസയിലും വര്‍ക്ക് വിസയിലും എത്തുന്നവരുടെ എണ്ണം കുത്തനെ കുറഞ്ഞു; അനധികൃതമായി എത്തി അഭയാര്‍ത്ഥികള്‍ ആവുന്നവരുടെ എണ്ണം റോക്കറ്റ് പോലെ കുതിച്ചു: ബ്രിട്ടന്റെ തലതിരിഞ്ഞ കുടിയേറ്റ പരിഷ്‌കാര ഫലം ചര്‍ച്ചകളില്‍
ലണ്ടന്‍: ബ്രിട്ടണിലെ ലേബര്‍ സര്‍ക്കാരിന്റെ കുടിയേറ്റ നിയമം വിപരീത ഫലങ്ങളാണ് സൃഷ്ടിക്കുന്നത് എന്ന റിപ്പോര്‍ട്ടുകള്‍ പുറത്തു വരുന്നു. നിയമപരമായ കുടിയേറ്റത്തിനുള്ള നിയമങ്ങള്‍ കര്‍ക്കശമാക്കിയതോടെ സ്റ്റുഡന്റ് വിസയിലും വര്‍ക്ക് വിസയിലും എത്തുന്നവരുടെ എണ്ണം കാര്യമായി കുറഞ്ഞപ്പോള്‍, അഭയാര്‍ത്ഥികളുടെ എണ്ണം കുതിച്ചുയരുകയാണെന്നും റിപ്പോര്‍ട്ടില്‍ പറയുന്നു. 2024 ല്‍ മാത്രം 1,08,138 പേരാണ് അഭയത്തിനായി അപേക്ഷിച്ചത്. നിലവിലെ രേഖകള്‍ സൂക്ഷിക്കാന്‍ ആരംഭിച്ച, 2001 മുതലുള്ള ഏറ്റവും ഉയര്‍ന്ന സംഖ്യയാണിത്.
അതേസമയം, ബ്രിട്ടന്റെ സമ്പദ്ഘടനക്ക് കൂടി മുതല്‍ക്കൂട്ടാവുന്ന തരത്തില്‍ വര്‍ക്ക് വിസയില്‍ എത്തുന്നവരുടെ, പ്രത്യേകിച്ചും എന്‍ എച്ച് എസ്സിലും സോഷ്യല്‍കെയര്‍ മേഖലയിലും ജോലിക്ക് എത്തുന്നവരുടെ എണ്ണത്തില്‍ കുത്തനെയുള്ള ഇടിവാണ് ഉണ്ടായിരിക്കുന്നത്. മറ്റൊരു വിധത്തില്‍ പറഞ്ഞാല്‍, അനധികൃത കുടിയേറ്റത്തിന്റെ നിരക്ക് വര്‍ദ്ധിക്കുകയും നിയമവിധേയമായ കുടിയേറ്റം കുറയുകയും ചെയ്യുന്ന അവസ്ഥ. സര്‍ക്കാര്‍ കണക്കുകള്‍ തന്നെ വ്യക്തമാക്കുന്ന വസ്തുതയാണിത്.
2024 ല്‍ ഹെല്‍ത്ത് ആന്‍ഡ് കെയര്‍ വര്‍ക്കര്‍ വിസയില്‍ എത്തിയത് 27,000 പേരാണ്. 2023 ല്‍ ഇത്തരക്കാരുടെ കുത്തൊഴുക്ക് മൂര്‍ദ്ധന്യതയില്‍ എത്തിയ സമയത്തെ കണക്കുമായി താരതമ്യം ചെയ്യുമ്പോള്‍ 81 ശതമാനത്തിന്റെ കുറവാണ് ഇക്കാര്യത്തില്‍ ഉണ്ടായിരിക്കുന്നത്. സമാനമായ രീതിയില്‍ 3,93,000 സ്പോണ്‍സേര്‍ഡ് സ്റ്റഡി വിസകളാണ് 2024 ല്‍ നല്‍കിയത്. 2019 ലെ കണക്കുമായി താരതമ്യം ചെയ്യുമ്പോള്‍ 46 ശതമാനത്തിന്റെ വര്‍ദ്ധനവ് ഇക്കാര്യത്തില്‍ ഉണ്ടായിട്ടുണ്ടെങ്കിലും, 2023 ലേതുമായി താരതമ്യം ചെയ്യുമ്പോള്‍ 14 ശതമാനത്തിന്റെ കുറവാണ് ഇക്കാര്യത്തില്‍ ഉണ്ടായിരിക്കുന്നത്.
അതേസമയം, 2023 ല്‍ അഭയത്തിനുള്ള അപേക്ഷകളുടെ എണ്ണം 91,811 ആയിരുന്നെങ്കില്‍ 2024 ഇക്കാര്യത്തില്‍ ഉണ്ടായത് 18 ശതമാനത്തിന്റെ വര്‍ദ്ധനവാണ്. ഇതിനു മുന്‍പ് അഭയാപേക്ഷകള്‍ ഏറ്റവുമധികം ലഭിച്ചത് 2002 ല്‍ ആയിരുന്നു. 1,03,081 അപേക്ഷകളായിരുന്നു അന്ന് ലഭിച്ചത്. കഴിഞ്ഞ വര്‍ഷം ലഭിച്ച അഭയാപേക്ഷകളില്‍ 32 ശതമാനത്തോളം, അപകടകരമായ വിധത്തില്‍ ഇംഗ്ലീഷ് ചാനല്‍ കടന്നെത്തിയവരുടേതായിരുന്നു. ഇതില്‍ ഏറ്റവുമധികം പേരുള്ളത് പാകിസ്ഥാനില്‍ നിന്നാണ്.
മൊത്തം അഭയാപേക്ഷകളില്‍ 10 ശതമാനത്തോളം പാകിസ്ഥാനില്‍ നിന്നുള്ളവരുടേതാണ്. 10542 പേരാണ് പാകിസ്ഥാനില്‍ നിന്നും ബ്രിട്ടനില്‍ അഭയത്തിനായി അപേക്ഷിച്ചിരിക്കുന്നത്. 2023 ല്‍ ഇത് 5,904 ആയിരുന്നു എന്നതോര്‍ക്കണം. 8,508 പേര്‍ അഭയത്തിനായി അപേക്ഷിച്ച അഫ്ഗാനിസ്ഥാന്‍ ആണ് രണ്ടാം സ്ഥാനത്ത് ഉള്ളത്. തൊട്ടു മുന്‍പത്തെ വര്‍ഷം 9,710 അഫ്ഗാനികളായിരുന്നു അഭയത്തിനായി അപേക്ഷിച്ചത്. അഫ്ഗാനിസ്ഥാനില്‍ നിന്നുള്ള അഭയാര്‍ത്ഥികളുടെ എണ്ണത്തില്‍ കുറവു വരികയും, പാകിസ്ഥാനില്‍ നിന്നുള്ളത് ഇരട്ടിയോളം വര്‍ദ്ധിക്കുകയും ചെയ്യുന്നത്, ഇരു രാജ്യങ്ങളുടെയും പോക്ക് എങ്ങോട്ടാണ് എന്നതിന്റെ വ്യക്തമായ സൂചനയാണ് നല്‍കുന്നത്.
പാകിസ്ഥാനിലേതിന് സമാനമായി, ഒരു വര്‍ഷത്തിനുള്ളില്‍ അഭയാര്‍ത്ഥികളുടെ എണ്ണത്തില്‍ വന്‍ വര്‍ദ്ധനവ് ഉണ്ടായിരിക്കുന്നത് വിയറ്റ്‌നാമിന്റെ കാര്യത്തിലാണ്. 2023 ല്‍ 2,469 അഭയാര്‍ത്ഥികളായിരുന്നു വിയറ്റ്‌നാമില്‍ നിന്നും ഉണ്ടായിരുന്നതെങ്കില്‍, കഴിഞ്ഞ വര്‍ഷം അത് 5,259 ആയി വര്‍ദ്ധിച്ചു. 2024 ഡിസംബര്‍ അവസാനത്തെ കണക്കുകള്‍ പ്രകാരം ബ്രിട്ടനില്‍ മൊത്തം 1,24,802 പേരാണ് അഭയാര്‍ത്ഥി അപേക്ഷയിന്മേലുള്ള പ്രാഥമിക തീരുമാനവും കാത്തിരിക്കുന്നത്.
