കടബാധ്യത മൊത്തം ആഭ്യന്തര ഉത്പാദനത്തിന്റെ 70 ശതമാനം! രാജ്യത്തിന്റെ പൊതു കടം 2025 ജൂണോടെ 286.832 ബില്യണ്‍ ഡോളറായി; ഇനിയും കടം വാങ്ങി മുടിയും; പാക്കിസ്ഥാനെ രക്ഷിക്കാന്‍ ഇനി ആര്‍ക്കുമാകില്ല; കടുത്ത സാമ്പത്തിക പ്രതിസന്ധിയില്‍ വലഞ്ഞ് ഇന്ത്യയുടെ അയല്‍പക്കം; ഭീകരത വളര്‍ത്തി ഒരു രാജ്യം തളരുമ്പോള്‍
ഇസ്ലാമാബാദ്: പാക്കിസ്ഥാന് കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്നതിനിടെ, രാജ്യത്തിന്റെ പൊതു കടം 2025 ജൂണോടെ 286.832 ബില്യണ്‍ ഡോളറായി കുതിച്ചുയര്‍ന്നതായി റിപ്പോര്‍ട്ട്. മുന്‍ വര്‍ഷത്തെ അപേക്ഷിച്ച് ഏകദേശം 13 ശതമാനത്തിന്റെ വര്‍ദ്ധനവാണ് രേഖപ്പെടുത്തുന്നത്. ഈ കടബാധ്യത മൊത്തം ആഭ്യന്തര ഉത്പാദനത്തിന്റെ (ജിഡിപി) 70 ശതമാനമായി ഉയര്‍ന്നതായും സൂചനയുണ്ട്. ഇത് പാക്കിസ്ഥാന്റെ സാമ്പത്തിക ഭാവിയെക്കുറിച്ച് ഗുരുതരമായ ആശങ്കകള്‍ ഉയര്‍ത്തുന്നു.
കടത്തിലെ ഗണ്യമായ വര്‍ദ്ധനവ് രാജ്യത്തിന്റെ സാമ്പത്തിക സുസ്ഥിരതയ്ക്ക് വലിയ വെല്ലുവിളിയാണ് ഉയര്‍ത്തുന്നത്. പൊതു കടം ക്രമാതീതമായി വര്‍ദ്ധിക്കുന്നത് സര്‍ക്കാരിന് വായ്പ തിരിച്ചടയ്ക്കാനുള്ള ശേഷിയെയും, അടിസ്ഥാന സൗകര്യ വികസനത്തിനും ജനക്ഷേമ പദ്ധതികള്‍ക്കുമായി ഫണ്ട് കണ്ടെത്താനുള്ള കഴിവിനെയും പ്രതികൂലമായി ബാധിക്കും. ഇത് അന്താരാഷ്ട്ര ധനകാര്യ സ്ഥാപനങ്ങളില്‍ നിന്നും മറ്റ് രാജ്യങ്ങളില്‍ നിന്നും കൂടുതല്‍ വായ്പകള്‍ തേടാന്‍ പാകിസ്ഥാനെ നിര്‍ബന്ധിതമാക്കും, ഇത് നിലവിലുള്ള കടം കൂടുതല്‍ കൂട്ടും.
ഒരു രാജ്യത്തിന്റെ ജിഡിപിയുടെ 70 ശതമാനം കടം എന്നത്, സാമ്പത്തിക വിദഗ്ധരുടെ കാഴ്ചപ്പാടില്‍ അങ്ങേയറ്റം ആശങ്കാജനകമായ ഒരു സാഹചര്യമാണ്. ഇത് രാജ്യത്തിന്റെ ക്രെഡിറ്റ് റേറ്റിംഗിനെ ബാധിക്കുകയും പുതിയ നിക്ഷേപങ്ങള്‍ ആകര്‍ഷിക്കാനുള്ള കഴിവിനെ തടസ്സപ്പെടുത്തുകയും ചെയ്യും. വര്‍ദ്ധിച്ചുവരുന്ന പണപ്പെരുപ്പം, രൂപയുടെ മൂല്യത്തകര്‍ച്ച, കുറയുന്ന വിദേശനാണ്യ ശേഖരം എന്നിവയുടെ പശ്ചാത്തലത്തിലാണ് ഈ പുതിയ കണക്കുകള്‍ പുറത്തുവരുന്നത്, ഇത് സാമ്പത്തിക പ്രതിസന്ധിയുടെ ആഴം വര്‍ദ്ധിപ്പിക്കുന്നു.
ഈ സാഹചര്യം പാക്കിസ്ഥാന് സര്‍ക്കാരിന് കടുത്ത സാമ്പത്തിക പരിഷ്‌കരണ നടപടികള്‍ സ്വീകരിക്കാന്‍ സമ്മര്‍ദ്ദം ചെലുത്തും. നികുതി വര്‍ദ്ധിപ്പിക്കുക, സബ്സിഡികള്‍ വെട്ടിക്കുറയ്ക്കുക, ചെലവുകള്‍ ചുരുക്കുക തുടങ്ങിയ ജനപ്രിയമല്ലാത്ത തീരുമാനങ്ങളിലേക്ക് ഇത് നയിച്ചേക്കാം. ഭാവിയില്‍ രാജ്യത്തിന്റെ സാമ്പത്തിക വളര്‍ച്ചയെയും പൗരന്മാരുടെ ജീവിതനിലവാരത്തെയും ഈ വര്‍ദ്ധിച്ചുവരുന്ന കടബാധ്യത കാര്യമായി സ്വാധീനിക്കും. അടുത്ത കാലയളവില്‍ പാകിസ്ഥാന്റെ സാമ്പത്തിക നയരൂപീകരണത്തിലും ബജറ്റ് നിര്‍മ്മാണത്തിലും ഈ ഭീമമായ കടം ഒരു പ്രധാന വെല്ലുവിളിയായി തുടരും.
ഭീമമായ കടബാദ്ധ്യത ഇപ്പോള്‍ തന്നെ പാക്കിസ്ഥാനുണ്ട്. അതിജീവനത്തിനായി ചൈന, സൗദി അറേബ്യ പോലുള്ള രാജ്യങ്ങളില്‍ നിന്ന് വായ്പയെടുക്കാറാണ് പതിവ്. എന്നാല്‍ ഈ കടം തിരിച്ചടയ്ക്കാന്‍ പാക്കിസ്ഥാന് കഴിയാറില്ല. നേരത്തെ അന്താരാഷ്ട്ര നാണയ നിധി (ഐഎംഎഫ്) പാകിസ്ഥാന്റെ സാമ്പത്തിക വളര്‍ച്ചയെ മൂന്ന് ശതമാനമായി താഴ്ത്തിയിരുന്നു. 3.5 ശതമാനമായിരുന്നു മുന്‍പ്.
ഇന്ത്യയുടെയും പാകിസ്ഥാന്റെയും സാമ്പത്തിക സ്ഥിതി താരതമ്യം ചെയ്യുമ്പോള്‍ ഇന്ത്യയ്ക്ക് ശക്തമായ സാമ്പത്തിക വളര്‍ച്ചയുണ്ടെന്നാണ് വിലയിരുത്തല്‍. 2025ലും 2026ലും ഇന്ത്യയുടെ ജിഡിപി വളര്‍ച്ചാ നിരക്ക് 6.5 ശതമാനമായിരിക്കുമെന്ന് ഐഎംഎഫ് പ്രവചിക്കുമ്പോള്‍ ലോകബാങ്ക് ഇത് 6.7 ശതമാനമായി കണക്കാക്കുന്നു. ഇന്ത്യയ്ക്ക് വരും വര്‍ഷങ്ങളില്‍ വലിയ സാമ്പത്തിക വളര്‍ച്ചയുണ്ടാകുമെന്നാണ് ഐഎംഎഫ് പ്രതീക്ഷ. ലോജിസ്റ്റിക് ഇന്‍ഫ്രാസ്ട്രക്ചറിന്റെ വളര്‍ച്ച, നികുതി പരിഷ്‌കരണങ്ങള്‍ എന്നിവ ഉള്‍പ്പടെ സേവന നിര്‍മ്മാണ മേഖലകള്‍ മെച്ചപ്പെടുത്താന്‍ ലക്ഷ്യമിട്ട് മോദി സര്‍ക്കാര്‍ കൊണ്ടുവന്ന പുത്തന്‍ സംരംഭങ്ങളാണ് ഇന്ത്യയുടെ സമ്പത്ത് വ്യവസ്ഥയെ ശക്തിപ്പെടുത്തുന്നത്.
പാക്കിസ്ഥാന്റെ സാമ്പത്തിക സ്ഥിതി ആശങ്കാജനകമാണെന്നാണ് ഐഎംഎഫും ഏഷ്യന്‍ ഡെവലപ്‌മെന്റ് ബാങ്കും (എഡിപി) പറയുന്നത്. രാഷ്ട്രീയ അനിശ്ചിതത്വം, സാമ്പത്തിക അസ്ഥിരത, കാര്യക്ഷമമല്ലാത്ത വ്യാവസായിക പ്രവര്‍ത്തനങ്ങള്‍ എന്നിവയാണ് പാക്കിസ്ഥാന്റെ സാമ്പത്തിക ബുദ്ധിമുട്ടുകള്‍ക്ക് പ്രധാന കാരണം. ഭീകരര്‍ക്ക് വേണ്ടി എന്തും ചെയ്യുന്ന സര്‍ക്കാരാണ് പാക്കിസ്ഥാനിലേത്. ഓപ്പറേഷന്‍ സിന്ദൂറില്‍ തളര്‍ന്ന പാക്കിസ്ഥാന് പിന്നേയും ഭീകരരെ സഹായിക്കുകയാണ്. ഇതും കടബാധ്യത കൂട്ടും.
