പുതുവർഷം പിറന്ന് മൂന്നാം നാൾ തന്നെ ലോകത്തെ വിറപ്പിക്കാൻ ഇറങ്ങിയ അമേരിക്കൻ പ്രസിഡന്റ്; 'ചതുരംഗ' കളി പോലെ ഓരോരുത്തരയായി വെട്ടുന്ന കാഴ്ച; അടുത്ത നമ്മുടെ ടാർഗറ്റ് സ്പോട്ട് ഗ്രീൻലാൻഡ് എന്ന് പ്രഖ്യാപിച്ചതും വീണ്ടും ഭീതി; ആ നാറ്റോ പ്രദേശവും കൈക്കലാക്കാൻ തന്നെ ഉദ്ദേശം; ഇനി ഏകമാർഗം രാജ്യങ്ങൾ തമ്മിലുള്ള ചർച്ചകൾ; ട്രംപ് ഭരണകൂടത്തിന്റെ അടുത്ത നീക്കമെന്ത്?

വാഷിംഗ്ടൺ/കോപ്പൻഹേഗൻ: തന്ത്രപ്രധാനമായ ആർട്ടിക് ദ്വീപായ ഗ്രീൻലൻഡ് സ്വന്തമാക്കാനുള്ള അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നീക്കങ്ങൾ ആഗോളതലത്തിൽ വൻ നയതന്ത്ര പ്രതിസന്ധി സൃഷ്ടിക്കുന്നു. ഗ്രീൻലൻഡ് വിഷയത്തിൽ ഡെന്മാർക്ക്, ഗ്രീൻലൻഡ് അധികൃതരുമായി അടുത്ത ആഴ്ച യുഎസ് സ്റ്റേറ്റ് സെക്രട്ടറി മാർക്കോ റൂബിയോ ചർച്ച നടത്തുമെന്ന് വൈറ്റ് ഹൗസ് സ്ഥിരീകരിച്ചു. ഗ്രീൻലൻഡിനെ അമേരിക്കയുടെ ഭാഗമാക്കുക എന്നത് ട്രംപിന്റെ പ്രഖ്യാപിത ലക്ഷ്യമാണെന്നും ഇതിനായി എല്ലാ മാർഗങ്ങളും തേടുമെന്നും റൂബിയോ വ്യക്തമാക്കി.

ഡെന്മാർക്കിന്റെ കീഴിലുള്ള സ്വയംഭരണ പ്രദേശമാണ് ലോകത്തിലെ ഏറ്റവും വലിയ ദ്വീപായ ഗ്രീൻലൻഡ്. തന്റെ ആദ്യ ഭരണകാലം മുതൽക്കേ ഗ്രീൻലൻഡ് വാങ്ങാനുള്ള താൽപ്പര്യം ഡൊണാൾഡ് ട്രംപ് പ്രകടിപ്പിച്ചിരുന്നു. ഒരു വലിയ 'റിയൽ എസ്റ്റേറ്റ് ഇടപാട്' എന്ന നിലയിലായിരുന്നു അദ്ദേഹം ഇതിനെ വിശേഷിപ്പിച്ചത്. എന്നാൽ ഡെന്മാർക്ക് ഈ നിർദ്ദേശം അന്ന് തന്നെ പുച്ഛിച്ചു തള്ളുകയായിരുന്നു. രണ്ടാം തവണ അധികാരമേറ്റ ട്രംപ് കൂടുതൽ ഗൗരവത്തോടെയാണ് ഈ നീക്കവുമായി മുന്നോട്ട് പോകുന്നത്.

ഗ്രീൻലൻഡ് വെറുമൊരു മഞ്ഞുഭൂമി മാത്രമല്ല, മറിച്ച് വൻതോതിൽ പ്രകൃതിവിഭവങ്ങളുള്ള ഭൂപ്രദേശമാണ്. ആർട്ടിക് മേഖലയിൽ ചൈനയുടെയും റഷ്യയുടെയും സ്വാധീനം വർദ്ധിക്കുന്നത് അമേരിക്കയ്ക്ക് വലിയ സുരക്ഷാ ഭീഷണിയാണെന്ന് മാർക്കോ റൂബിയോ ചൂണ്ടിക്കാട്ടുന്നു. ചൈനീസ് സർക്കാർ കമ്പനികൾ ഗ്രീൻലൻഡിലെ ഖനന മേഖലയിലും മറ്റും നിക്ഷേപം നടത്തുന്നത് അമേരിക്കയുടെ തൊട്ടടുത്ത് ശത്രുക്കളുടെ സാന്നിധ്യം വർദ്ധിപ്പിക്കുമെന്ന് റൂബിയോ ഭയപ്പെടുന്നു. ആർട്ടിക് സമുദ്രത്തിലെ കപ്പൽ ചാലുകളുടെ നിയന്ത്രണവും അമേരിക്കയ്ക്ക് പ്രധാനമാണ്.

റൂബിയോയുടെ നിലപാട്

വാഷിംഗ്ടണിൽ മാധ്യമപ്രവർത്തകരോട് സംസാരിക്കവെ, ഗ്രീൻലൻഡ് വിഷയത്തിൽ താൻ ഡെന്മാർക്ക് വിദേശകാര്യമന്ത്രിയുമായും ഗ്രീൻലൻഡ് പ്രതിനിധികളുമായും ചർച്ച നടത്തുമെന്ന് റൂബിയോ പറഞ്ഞു. "ഗ്രീൻലൻഡ് വാങ്ങുക എന്നത് ഒരു തമാശയല്ല. അത് അമേരിക്കയുടെ ദേശീയ സുരക്ഷയുമായി ബന്ധപ്പെട്ട ഗൗരവകരമായ കാര്യമാണ്," അദ്ദേഹം വ്യക്തമാക്കി. സൈനിക നടപടിക്ക് പകരം നയതന്ത്രപരമായ ചർച്ചകളിലൂടെയോ സാമ്പത്തിക ഇടപാടിലൂടെയോ ദ്വീപ് സ്വന്തമാക്കാനാണ് അമേരിക്കയുടെ മുൻഗണനയെന്നും അദ്ദേഹം കൂട്ടിിച്ചേർത്തു.

ഡെന്മാർക്കിന്റെയും യൂറോപ്പിന്റെയും പ്രതിഷേധം

അമേരിക്കയുടെ ഈ നിലപാടിനോട് ഡെന്മാർക്ക് അതിശക്തമായ ഭാഷയിലാണ് പ്രതികരിക്കുന്നത്. "ഗ്രീൻലൻഡ് വിൽപനയ്ക്കുള്ളതല്ല" എന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൺ ആവർത്തിച്ച് വ്യക്തമാക്കി. ഗ്രീൻലൻഡ് അവിടുത്തെ ജനങ്ങളുടേതാണെന്നും അത് വാങ്ങാനും വിൽക്കാനുമുള്ള ചരക്കല്ലെന്നും അവർ പറഞ്ഞു. ട്രംപിന്റെ ഇത്തരം നീക്കങ്ങൾ നാറ്റോ സഖ്യത്തിന്റെ തകർച്ചയ്ക്ക് വഴിതെളിക്കുമെന്ന് യൂറോപ്യൻ രാജ്യങ്ങൾ മുന്നറിയിപ്പ് നൽകുന്നു.

ഫ്രാൻസ്, ജർമ്മനി, ഇറ്റലി, സ്പെയിൻ, പോളണ്ട് തുടങ്ങിയ പ്രമുഖ രാജ്യങ്ങൾ ഡെന്മാർക്കിന് പിന്തുണയുമായി രംഗത്തെത്തിയിട്ടുണ്ട്. ഒരു പരമാധികാര രാജ്യത്തിന്റെ ഭൂപ്രദേശം ബലംപ്രയോഗിച്ചോ സാമ്പത്തിക സമ്മർദ്ദം ഉപയോഗിച്ചോ പിടിച്ചെടുക്കുന്നത് അന്താരാഷ്ട്ര നിയമങ്ങളുടെ ലംഘനമാണെന്ന് യൂറോപ്യൻ നേതാക്കൾ സംയുക്ത പ്രസ്താവനയിൽ പറഞ്ഞു.

സൈനിക നടപടിയെന്ന ഭീഷണി

വൈറ്റ് ഹൗസ് പ്രസ് സെക്രട്ടറി കരോളിൻ ലീവിറ്റിന്റെ പ്രസ്താവന മേഖലയിൽ കൂടുതൽ ആശങ്ക പടർത്തിയിട്ടുണ്ട്. ഗ്രീൻലൻഡ് വിഷയത്തിൽ സൈനിക നടപടി ഉൾപ്പെടെയുള്ള എല്ലാ സാധ്യതകളും ട്രംപിന്റെ മുന്നിലുണ്ടെന്നാണ് അവർ സൂചിപ്പിച്ചത്. എന്നാൽ മാർക്കോ റൂബിയോ ഇത്തരമൊരു സൈനിക നീക്കത്തെ തള്ളിക്കളഞ്ഞു. ഡെന്മാർക്ക് ഒരു നാറ്റോ സഖ്യകക്ഷിയാണെന്നും അവരുമായി സമാധാനപരമായ ചർച്ചകളാണ് ആഗ്രഹിക്കുന്നതെന്നും അദ്ദേഹം പറഞ്ഞു. എങ്കിലും, ഈ വൈരുദ്ധ്യം അമേരിക്കൻ ഭരണകൂടത്തിനുള്ളിലെ ആശയക്കുഴപ്പമാണോ അതോ ഡെന്മാർക്കിനെ സമ്മർദ്ദത്തിലാക്കാനുള്ള തന്ത്രമാണോ എന്ന് ലോകം ഉറ്റുനോക്കുന്നു.

കാലാവസ്ഥാ വ്യതിയാനം മൂലം ആർട്ടിക്കിലെ മഞ്ഞുപാളികൾ ഉരുകുന്നത് പുതിയ കപ്പൽ പാതകൾ തുറക്കുന്നതിനും വൻതോതിലുള്ള ധാതു നിക്ഷേപം (ലിഥിയം, കോബാൾട്ട് തുടങ്ങിയവ) കണ്ടെത്താനും കാരണമായിട്ടുണ്ട്. ഗ്രീൻലൻഡിൽ നിലവിൽ തന്നെ അമേരിക്കയ്ക്ക് 'പിറ്റുഫിക്' (Pituffik) എന്ന പേരിൽ തന്ത്രപ്രധാനമായ ഒരു ബഹിരാകാശ സൈനിക താവളമുണ്ട്. മിസൈൽ പ്രതിരോധ സംവിധാനങ്ങൾക്കായി അമേരിക്ക ഈ താവളത്തെയാണ് ആശ്രയിക്കുന്നത്.

ചർച്ചയിൽ എന്ത് സംഭവിക്കും?

അടുത്ത ആഴ്ച നടക്കുന്ന കൂടിക്കാഴ്ചയിൽ ഡെന്മാർക്ക് വിദേശകാര്യമന്ത്രി ലാർസ് ലോക്കെ റാസ്മുസെൻ, ഗ്രീൻലൻഡ് വിദേശകാര്യമന്ത്രി വിവിയൻ മോട്ട്സ്ഫെൽഡ് എന്നിവർ പങ്കെടുക്കും. ഈ കൂടിക്കാഴ്ച വെറുമൊരു ചർച്ചയല്ല, മറിച്ച് അമേരിക്കയുടെ 'കണ്ണുവെക്കൽ' അവസാനിപ്പിക്കാനുള്ള ഡെന്മാർക്കിന്റെ ശ്രമം കൂടിയായിരിക്കും. ഗ്രീൻലൻഡ് ഒരു കാരണവശാലും വിട്ടുനൽകില്ലെന്ന് അവർ റൂബിയോയെ നേരിട്ട് അറിയിക്കും.

അതേസമയം, വെനിസ്വേലയിൽ ഉൾപ്പെടെ അമേരിക്ക നടത്തിയ ആക്രമണാത്മകമായ ഇടപെടലുകൾ ഡെന്മാർക്കിനെ ആശങ്കയിലാക്കുന്നുണ്ട്. ഒരു സഖ്യകക്ഷിയോട് അമേരിക്ക ഇത്തരത്തിൽ പെരുമാറുന്നത് അന്താരാഷ്ട്ര തലത്തിൽ ട്രംപിന്റെ പ്രതിച്ഛായയെ ബാധിക്കുമെന്നും രാഷ്ട്രീയ നിരീക്ഷകർ കരുതുന്നു.

ചൊവ്വാഴ്ച, ഗ്രീൻലൻഡിന്റെയും ഡെൻമാർക്കിന്റെയും പ്രാദേശിക സമഗ്രതയെ മാനിക്കണമെന്ന് യൂറോപ്യൻ നേതാക്കൾ സംയുക്ത പ്രസ്താവനയിലൂടെ ട്രംപിന് മുന്നറിയിപ്പ് നൽകിയിരുന്നു. ഇതിനുമുന്നേ, ഗ്രീൻലൻഡിന് മേലുള്ള ഏതൊരു യുഎസ് "ആക്രമണവും" നാറ്റോ സഖ്യത്തിന്റെയും രണ്ടാം ലോക മഹായുദ്ധത്തിന് ശേഷം സ്ഥാപിതമായ സുരക്ഷയുടെയും അവസാനമായിരിക്കുമെന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൻ തിങ്കളാഴ്ച പറഞ്ഞിരുന്നു.

ചൈനയുടെയും റഷ്യയുടെയും വർധിച്ചുവരുന്ന ഭീഷണികൾക്കിടയിൽ ലോകത്തിലെ ഏറ്റവും വലിയ ദ്വീപിന്റെ നിയന്ത്രണം തങ്ങൾക്ക് ഉറപ്പാക്കേണ്ടതുണ്ടെന്നാണ് ട്രംപിന്റെ വാദം. ഡെൻമാർക്കിന്റെ കീഴിലുള്ള സ്വയംഭരണ പ്രദേശവും നാറ്റോയുടെ ഭാഗവുമായ ഗ്രീൻലൻഡിനെ വാങ്ങാനാണ് ട്രംപ് ഭരണകൂടത്തിന്റെ ഉദ്ദേശ്യമെന്ന് സ്റ്റേറ്റ് സെക്രട്ടറി മാർക്കോ റൂബിയോ പറഞ്ഞതായി അസോസിയേറ്റ് പ്രസ്സ് നേരത്തെ റിപ്പോർട്ട് ചെയ്തിരുന്നു. ഗ്രീൻലൻഡിന്റെ നിയന്ത്രണം ഏറ്റെടുക്കുന്നതിനെക്കുറിച്ച് ട്രംപ് ചൊവ്വാഴ്ച പറഞ്ഞത് സൈനിക നടപടി എപ്പോഴും ഒരു സാധ്യതയാണ് എന്നായിരുന്നു.