വളരെ വ്യക്തമായ കാരണങ്ങളുണ്ടായാല് ഇറാനിലേക്ക് കരസേനയെ അയയ്ക്കും; അങ്ങനെ വന്നാല് ഇറാന്റെ സര്വ്വനാശം ഉണ്ടാകുമെന്ന് ട്രംപ്; അമേരിക്കന് സേന ഇറങ്ങിയാല് ഉണ്ടാവുക ദൂരവ്യാപക പ്രത്യാഘാതങ്ങള്; ഹോര്മുസ് കടലിടുക്കില് ഇന്ധന വിതരണ നീക്കം ദീര്ഘകാലം തടസ്സപ്പെടും; ട്രംപിസത്തിനൊപ്പം ഇറാനെ തച്ചു തകര്ത്ത് ഇസ്രയേലും
വാഷിംഗ്ടണ്: ഇറാനുമായുള്ള യുദ്ധം അതീവ ഗുരുതരമായ ഘട്ടത്തിലേക്ക് നീങ്ങവെ, ഇറാനിലേക്ക് അമേരിക്കന് കരസേനയെ അയക്കുന്ന കാര്യം പരിഗണനയിലുണ്ടെന്ന് പ്രസിഡന്റ് ഡൊണാള്ഡ് ട്രംപ്. ഇതിനായി വളരെ വ്യക്തമായ കാരണങ്ങള് ഉണ്ടാകണമെന്നും എന്നാല് ഇങ്ങനെയൊരു നീക്കം നടത്തിയാല് ഇറാന്റെ സര്വ്വനാശമായിരിക്കും ഫലമെന്നും ട്രംപ് മുന്നറിയിപ്പ് നല്കി. ശനിയാഴ്ച കൊല്ലപ്പെട്ട ആറ് അമേരിക്കന് സൈനികരുടെ ഭൗതികശരീരങ്ങള് ഏറ്റുവാങ്ങിയ ശേഷം എയര്ഫോഴ്സ് വണ് വിമാനത്തില് വെച്ചാണ് ട്രംപ് ഈ നിര്ണ്ണായക വെളിപ്പെടുത്തല് നടത്തിയത്. ഇറാനിലേക്ക് സൈന്യത്തെ അയക്കില്ലെന്ന വൈറ്റ് ഹൗസ് വക്താവിന്റെ മുന് പ്രസ്താവനകളെ തള്ളുന്നതാണ് ട്രംപിന്റെ പുതിയ നിലപാട്.
അതേസമയം, ശനിയാഴ്ച രാത്രി ടെഹ്റാനെ അഗ്നിഗോളമാക്കി മാറ്റി ഇസ്രയേല് പുതിയ ഘട്ടത്തിലുള്ള ആക്രമണം അഴിച്ചുവിട്ടു. ഇറാന്റെ എണ്ണ ശുദ്ധീകരണശാലകളും സംഭരണശാലകളും ലക്ഷ്യമിട്ടായിരുന്നു ഇസ്രയേലിന്റെ കടന്നാക്രമണം. നഗരത്തിന് മുകളില് കറുത്ത പുകപടലങ്ങള് ഉയരുന്നതിന്റെയും സ്ഫോടനങ്ങളുടെയും ഭീകര ദൃശ്യങ്ങള് പുറത്തുവന്നു. ഇറാന്റെ സാമ്പത്തിക അടിത്തറ തകര്ക്കുക എന്ന ലക്ഷ്യത്തോടെയാണ് ഇസ്രയേല് നീങ്ങുന്നത്.
ഗള്ഫ് രാജ്യങ്ങള്ക്ക് നേരെ ഇറാന് നടത്തുന്ന പ്രത്യാക്രമണങ്ങളും രൂക്ഷമായി തുടരുകയാണ്. ദുബായിലെ ആഡംബര കെട്ടിടമായ '23 മറീന' സ്കൈസ്ക്രാപ്പറിന് മുകളില് പ്രതിരോധ സംവിധാനങ്ങള് വെടിവെച്ചിട്ട മിസൈലിന്റെ അവശിഷ്ടങ്ങള് പതിച്ചു. മറ്റൊരു സംഭവത്തില് ഡ്രോണ് അവശിഷ്ടം കാറിന് മുകളില് വീണ് ഒരാള് കൊല്ലപ്പെട്ടു. ദുബായ് വിമാനത്താവളം ഒഴിപ്പിക്കേണ്ടി വന്നത് മേഖലയിലെ വ്യോമഗതാഗതത്തെ പൂര്ണ്ണമായും ബാധിച്ചു.
തങ്ങള് ഒരിക്കലും നിരുപാധികം കീഴടങ്ങില്ലെന്നും ഖമേനിയുടെ വധത്തിന് അമേരിക്ക വലിയ വില നല്കേണ്ടി വരുമെന്നും ഇറാന്റെ പുതിയ നേതാവ് അലി ലാരിജാനി ആവര്ത്തിച്ചു. ഇതിനിടെ, ഈ ആഴ്ചാവസാനം ഇറാനെതിരെ 'ദ ബിഗ് വണ്' എന്ന് താന് വിശേഷിപ്പിച്ച ഒരു മഹാ ആക്രമണത്തിന് ട്രംപ് തയ്യാറെടുക്കുന്നതായും സൂചനകളുണ്ട്. ഇതോടെ പശ്ചിമേഷ്യ പൂര്ണ്ണമായും ഒരു ലോകമഹായുദ്ധത്തിന്റെ വക്കിലെത്തിയിരിക്കുകയാണ്.
പശ്ചിമേഷ്യന് യുദ്ധം പുതിയ തലത്തിലേക്ക് കടക്കവേ, ഇറാനിലേക്ക് അമേരിക്കന് കരസേനയെ അയക്കാനുള്ള നീക്കം ആഗോളതലത്തില് വന് സാമ്പത്തിക-രാഷ്ട്രീയ പ്രത്യാഘാതങ്ങള്ക്ക് വഴിയൊരുക്കുമെന്ന് മുന്നറിയിപ്പ്. യുദ്ധം രൂക്ഷമായാല് ലോകത്തെ എണ്ണ വിതരണത്തിന്റെ സിരാകേന്ദ്രമായ ഹോര്മുസ് കടലിടുക്ക് ഇറാന് അടയ്ക്കുമെന്ന ഭീഷണിയാണ് ഏറ്റവും വലിയ വെല്ലുവിളി. ഇത് സംഭവിച്ചാല് ആഗോള വിപണിയില് ക്രൂഡ് ഓയില് വില ബാരലിന് 200 ഡോളര് വരെ ഉയര്ന്നേക്കാം. ഇതോടെ ഇന്ത്യയടക്കമുള്ള രാജ്യങ്ങള് കടുത്ത പണപ്പെരുപ്പത്തിലേക്കും സാമ്പത്തിക മാന്ദ്യത്തിലേക്കും നീങ്ങുമെന്നാണ് അന്താരാഷ്ട്ര സാമ്പത്തിക നിരീക്ഷകര് വിലയിരുത്തുന്നത്.
ലോകത്തെ മൊത്തം പെട്രോളിയം ഉപഭോഗത്തിന്റെ 20 ശതമാനവും കടന്നുപോകുന്ന ഹോര്മുസ് കടലിടുക്ക് തടസ്സപ്പെടുന്നത് ഇന്ത്യയുടെ എല്പിജി, ക്രൂഡ് ഓയില് ഇറക്കുമതിയെ നേരിട്ട് ബാധിക്കും. വിതരണ ശൃംഖല തകരുന്നതോടെ രാജ്യത്ത് ഇന്ധനവില കുതിച്ചുയരുകയും നിത്യോപയോഗ സാധനങ്ങളുടെ വില നിയന്ത്രണാതീതമാവുകയും ചെയ്യും. ചരക്കുനീക്കം തടസ്സപ്പെടുന്നത് ഇലക്ട്രോണിക്സ്, വളം, ഭക്ഷ്യവസ്തുക്കള് എന്നിവയുടെ ലഭ്യതയെയും ബാധിക്കും.
അമേരിക്കന് നീക്കത്തിനെതിരെ റഷ്യയും ചൈനയും രംഗത്തെത്താന് സാധ്യതയുള്ളത് പ്രാദേശിക യുദ്ധത്തെ ഒരു ലോകമഹായുദ്ധത്തിന്റെ വക്കിലെത്തിച്ചേക്കാം. റഷ്യ ഇറാനുമായി രഹസ്യാന്വേഷണ വിവരങ്ങള് പങ്കുവെക്കുന്നതും ബാങ്കിംഗ് മേഖലയ്ക്ക് നേരെയുള്ള ഇറാന്റെ സൈബര് ആക്രമണ ഭീഷണിയും ലോകരാജ്യങ്ങളെ കടുത്ത ആശങ്കയിലാഴ്ത്തുന്നു.
