റഷ്യ പിടിച്ചെടുത്ത ഭൂമി അവര്‍ക്ക് കൈമാറണം; സൈന്യത്തിന്റെ വലിപ്പം കുറയ്ക്കുകയും ചില ആയുധങ്ങള്‍ ഉപേക്ഷിക്കുകയും വേണം; പുടിനുമായുളള സമാധാന കരാര്‍ അംഗീകരിക്കാന്‍ സെലന്‍സ്‌ക്കിക്ക് മേല്‍ സമ്മര്‍ദ്ദം ചെലുത്തി ട്രംപ്; ഗസ്സ വെടിനിര്‍ത്തല്‍ മാതൃകയില്‍ യുക്രെയിന്‍ യുദ്ധം അവസാനിപ്പിക്കാന്‍ 28 ഇന യുഎസ്-റഷ്യ രഹസ്യ സമാധാന പദ്ധതി
യുക്രെയിന്‍ യുദ്ധം അവസാനിപ്പിക്കാന്‍ 28 ഇന യുഎസ്-റഷ്യ രഹസ്യ സമാധാന പദ്ധതി
കീവ്: ഗസ്സ സമാധാന പദ്ധതിക്ക് സമാനമായി യുക്രെയിന്‍ യുദ്ധം അവസാനിപ്പിക്കാന്‍ യുഎസും റഷ്യയും തമ്മില്‍ രഹസ്യമായി 28 ഇന സമാധാന പദ്ധതിക്ക് രൂപം നല്‍കിയതായി റിപ്പോര്‍ട്ട്. റഷ്യക്ക് ഭൂമി കൈമാറുന്ന ഒരു കരാര്‍ അംഗീകരിക്കാന്‍ യുക്രെയ്ന് പ്രസിഡന്റ് വോളോഡിമിര്‍ സെലെന്‍സ്‌കിക്ക് മേല്‍ അമേരിക്ക സമ്മര്‍ദ്ദം ചെലുത്തുന്നതായി സൂചന.
യു.എസ്. പ്രസിഡന്റ് ഡൊണാള്‍ഡ് ട്രംപിന്റെ നേതൃത്വത്തില്‍ തയ്യാറാക്കുന്ന ഈ സമാധാന പദ്ധതിയില്‍ യുക്രെയ്ന് അംഗീകരിക്കാന്‍ ബുദ്ധിമുട്ടുള്ള നിരവധി വ്യവസ്ഥകളുണ്ടെന്നാണ് വിവരം.
റഷ്യ പിടിച്ചെടുത്ത ചില പ്രദേശങ്ങള്‍ കൈവിടാന്‍ കീവ് നിര്‍ബന്ധിതമാകും. യുക്രെയ്ന് സൈന്യത്തിന്റെ വലുപ്പം കുറയ്ക്കുകയും ചില ആയുധങ്ങള്‍ ഉപേക്ഷിക്കുകയും ചെയ്യേണ്ടിവരും.
ഈ രൂപരേഖ നാല് വിശാലമായ വിഷയങ്ങളില്‍ ശ്രദ്ധ കേന്ദ്രീകരിക്കുന്നു:
1.യുക്രെയ്‌നിലെ സമാധാനം
2. സുരക്ഷാ ഗ്യാരന്റികള്‍ (Security Guarantees)
3. വിശാലമായ യൂറോപ്യന്‍ സുരക്ഷ
4. റഷ്യ, യുക്രെയ്ന് എന്നീ രാജ്യങ്ങളുമായുള്ള യു.എസിന്റെ ഭാവി ബന്ധം
യുക്രെയിനെ ഇരുട്ടത്ത് നിര്‍ത്തുന്നു
സമാധാന പദ്ധതിയുടെ ആലോചനകളില്‍ യുക്രെയ്‌നെ കൂട്ടിയിട്ടില്ല എന്നതാണ് പ്രത്യേകത. എന്നിരുന്നാലും, യു.എസും റഷ്യയുമായി ചര്‍ച്ച ചെയ്ത നിര്‍ദ്ദേശങ്ങളെക്കുറിച്ച് തങ്ങള്‍ക്ക് 'സൂചനകള്‍' ലഭിച്ചതായി യുക്രെയ്ന് വൃത്തങ്ങള്‍ റോയിട്ടേഴ്സിനോട് വ്യക്തമാക്കി
യു.എസ്. പ്രത്യേക ദൂതന്‍ സ്റ്റീവ് വിറ്റ്കോഫ് റഷ്യന്‍ ദൂതന്‍ കിറില്‍ ദിമിത്രിയേവുമായി പദ്ധതിയെക്കുറിച്ച് വിപുലമായി ചര്‍ച്ച ചെയ്തു. അടുത്തിടെ മിയാമിയില്‍ വെച്ച് സെലെന്‍സ്‌കിയുടെ സുരക്ഷാ ഉപദേഷ്ടാവ് റുസ്തം ഉമറോവുമായും വിറ്റ്കോഫ് ചര്‍ച്ചകള്‍ നടത്തിയിരുന്നു.
സമാധാന നിര്‍ദ്ദേശങ്ങളെക്കുറിച്ച് ഔദ്യോഗികമായി പ്രതികരിക്കാന്‍ പുതിയ വിവരങ്ങളൊന്നും ലഭ്യമല്ലെന്ന് ക്രെംലിന്‍ വക്താവ് ദിമിത്രി പെസ്‌കോവ് പ്രതികരിച്ചു.
പുടിന്റെ ആവശ്യങ്ങള്‍
യുദ്ധം അവസാനിപ്പിക്കാന്‍, നാറ്റോ സഖ്യത്തില്‍ ചേരാനുള്ള പദ്ധതി യുക്രെയ്ന് ഉപേക്ഷിക്കണം, റഷ്യയുടെ ഭാഗമായി അവകാശപ്പെടുന്ന നാല് പ്രവിശ്യകളില്‍ നിന്ന് സൈന്യത്തെ പിന്‍വലിക്കണം എന്നീ പ്രധാന ആവശ്യങ്ങളില്‍ നിന്ന് റഷ്യ പിന്നോട്ട് പോയിട്ടില്ല. ഈ ആവശ്യങ്ങള്‍ അംഗീകരിക്കില്ലെന്ന് യുക്രെയ്ന് വ്യക്തമാക്കിയിട്ടുണ്ട്.
സെലെന്‍സ്‌കിയുടെ നിലപാട്
സമാധാന ചര്‍ച്ചകള്‍ക്ക് ഉണര്‍വ് നല്‍കുന്നതിന്റെ ഭാഗമായി സെലെന്‍സ്‌കി ബുധനാഴ്ച തുര്‍ക്കിയില്‍ ചര്‍ച്ചകള്‍ നടത്തുണ്ട്. തുര്‍ക്കി പ്രസിഡന്റ് തയ്യിപ് എര്‍ദോഗാനുമായി 'നീതിയുക്തമായ സമാധാനം' എങ്ങനെ കൊണ്ടുവരാം എന്ന് അദ്ദേഹം ചര്‍ച്ച ചെയ്യും. വ്യാഴാഴ്ച അദ്ദേഹം കീവില്‍ യു.എസ്. സൈനിക ഉദ്യോഗസ്ഥരെയും കാണും.
നാല് വര്‍ഷത്തോളമായി തുടരുന്ന യുദ്ധത്തില്‍ റഷ്യന്‍ സൈന്യം യുക്രെയ്ന് പ്രദേശത്തിന്റെ ഏകദേശം 19 ശതമാനം നിയന്ത്രിക്കുന്നുണ്ട്.
യുദ്ധം അവസാനിപ്പിക്കാനുള്ള ശ്രമങ്ങള്‍ക്ക് വേഗത കൈവരിക്കുകയാണെങ്കിലും റഷ്യ അവരുടെ നിബന്ധനകളില്‍ മാറ്റം വരുത്താന്‍ തയ്യാറായിട്ടില്ല. സമാധാന ശ്രമങ്ങള്‍ക്ക് ട്രംപ് ഊന്നല്‍ നല്‍കുന്നുണ്ടെങ്കിലും അദ്ദേഹത്തിന്റെ മുന്‍ ശ്രമങ്ങള്‍ (അലാസ്‌ക ഉച്ചകോടി ഉള്‍പ്പെടെ) ഫലം കണ്ടിരുന്നില്ല.
