മുഖം മിനുക്കല് പാളി; 'സ്വാതന്ത്ര്യ വിരുദ്ധ' പ്രതിച്ഛായ മാറിയില്ല; യുവ വോട്ടര്മാരും സ്ത്രീകളും കൈവിട്ടു; അമേരിക്കന് നയതന്ത്രജ്ഞരുമായി രഹസ്യചര്ച്ചയെന്ന വാഷിങ്ടണ് പോസ്റ്റ് റിപ്പോര്ട്ടും പാരയായി; ബംഗ്ലാദേശില് അടിപതറി തീവ്ര നിലപാടുള്ള ജമാഅത്തെ ഇസ്ലാമി; ബിഎന്പിക്ക് ജനം വോട്ടുകുത്താന് കാരണങ്ങള് ഇങ്ങനെ
ബംഗ്ലാദേശില് അടിപതറി തീവ്ര നിലപാടുള്ള ജമാഅത്തെ ഇസ്ലാമി;
ന്യൂഡല്ഹി: ഫെബ്രുവരി 12-ന് നടന്ന ബംഗ്ലാദേശ് പൊതുതിരഞ്ഞെടുപ്പിന് മുന്നോടിയായുള്ള ആഴ്ചകളില്, ബംഗ്ലാദേശ് ജമാഅത്തെ ഇസ്ലാമിയോളം ആത്മവിശ്വാസം പ്രകടിപ്പിച്ച മറ്റൊരു പാര്ട്ടിയും ഉണ്ടായിരുന്നില്ല. തിരഞ്ഞെടുപ്പിന് മുമ്പ് ധാക്കയിലെ രാഷ്ട്രീയ നിരീക്ഷകര് പരസ്യമായി പറഞ്ഞിരുന്നത്, സ്വാതന്ത്ര്യത്തിന് ശേഷമുള്ള പാര്ട്ടിയുടെ ഏറ്റവും മികച്ച പ്രകടനമായിരിക്കും ഇതെന്നാണ്. കേവലം ഒരു പങ്കാളിത്തം മാത്രമല്ല, ഭരണത്തിന്റെ കേന്ദ്രസ്ഥാനത്തിനായി മത്സരിക്കാന് തങ്ങള് തയ്യാറാണെന്ന സൂചനയും പാര്ട്ടി നല്കിയിരുന്നു.
എന്നാല് താരിഖ് റഹ്മാന്റെ നേതൃത്വത്തിലുള്ള ബിഎന്പി (BNP) വിജയം പ്രഖ്യാപിക്കുകയും വിദേശ രാജ്യങ്ങള് അഭിനന്ദനങ്ങള് അറിയിക്കുകയും ചെയ്തപ്പോള്, ജമാഅത്തെ ഇസ്ലാമി തികച്ചും വ്യത്യസ്തമായ നിലപാടാണ് സ്വീകരിച്ചത്. വെള്ളിയാഴ്ച, ഫലപ്രഖ്യാപന പ്രക്രിയയുടെ സുതാര്യതയില് തങ്ങള്ക്ക് ഗൗരവകരമായ ചോദ്യങ്ങളുണ്ടെന്നാണ് പാര്ട്ടി പ്രസ്താവിച്ചത്.
ഔദ്യോഗിക ഫലങ്ങള് പുറത്തുവരാനിരിക്കുന്നതേയുള്ളൂ എന്നും എല്ലാവരും ക്ഷമയോടെ കാത്തിരിക്കണമെന്നും ജമാഅത്തെ ഇസ്ലാമി ആവശ്യപ്പെട്ടു. എങ്കിലും, രാജ്യത്തെ രാഷ്ട്രീയ സാഹചര്യം ബിഎന്പിക്ക് അനുകൂലമായിരുന്നു. 2024-ലെ വിപ്ലവത്തിന് ശേഷം നടന്ന ആദ്യ തിരഞ്ഞെടുപ്പില് ബിഎന്പി വന് വിജയം അവകാശപ്പെട്ടു. പാര്ട്ടി നേതാവ് താരിഖ് റഹ്മാന് പ്രധാനമന്ത്രിയാകാന് ഒരുങ്ങുകയാണ്. ഫലം പൂര്ണ്ണമായി വരുന്നതിന് മുമ്പ് തന്നെ യുഎസ് എംബസി ബിഎന്പിക്ക് അഭിനന്ദനങ്ങള് അറിയിച്ചു കഴിഞ്ഞു.
പ്രതീക്ഷകള് തെറ്റിയതെവിടെ?
2024 ജൂലൈയില് നടന്ന വിദ്യാര്ത്ഥി പ്രക്ഷോഭത്തില് ഷെയ്ഖ് ഹസീന സര്ക്കാരിനെ പുറത്താക്കുന്നതില് ജമാഅത്തെ ഇസ്ലാമി വലിയ പങ്ക് വഹിച്ചിരുന്നു. അവാമി ലീഗിനെ തിരഞ്ഞെടുപ്പില് നിന്ന് വിലക്കിയതോടെ ജമാഅത്തിന് വലിയ സാധ്യതകളാണ് കല്പ്പിക്കപ്പെട്ടിരുന്നത്. എന്നാല് പ്രചാരണം മുറുകിയതോടെ അവര് പ്രതീക്ഷിച്ച വോട്ട് ബാങ്കുകള് കൈവിട്ടുപോയി.
ജൂലൈ പ്രക്ഷോഭത്തിന് നേതൃത്വം നല്കിയ യുവാക്കള് ജമാഅത്തിന് പകരം ബിഎന്പിക്കാണ് വോട്ട് ചെയ്തത്. മാഅത്തിന്റെ ഭാഗത്തേക്ക് സ്ത്രീകള് വലിയ തോതില് വരുമെന്ന് കരുതിയെങ്കിലും അതുണ്ടായില്ല. ഹിന്ദുക്കളടക്കമുള്ള ന്യൂനപക്ഷ വിഭാഗങ്ങളും ബിഎന്പിക്ക് പിന്നില് അണിനിരന്നു. തിരഞ്ഞെടുപ്പില് പങ്കെടുത്ത അവാമി ലീഗ് അനുഭാവികള് ജമാഅത്തിന് വോട്ട് ചെയ്യുന്നതിന് പകരം ബിഎന്പിയെ പിന്തുണയ്ക്കുകയാണ് ചെയ്തത്.
അമേരിക്കന് ഘടകം
അമേരിക്കന് നയതന്ത്രജ്ഞര് ജമാഅത്തെ ഇസ്ലാമിയുമായി രഹസ്യ ചര്ച്ചകള് നടത്തുന്നുവെന്ന 'വാഷിംഗ്ടണ് പോസ്റ്റ്' റിപ്പോര്ട്ട് തിരഞ്ഞെടുപ്പിന്റെ ഗതി മാറ്റി. ജമാഅത്ത് അമേരിക്കയുമായി രഹസ്യ ധാരണയുണ്ടാക്കിയെന്ന് ബിഎന്പി സെക്രട്ടറി ജനറല് മിര്സ ഫക്രുല് ഇസ്ലാം ആലംഗീര് ആരോപിച്ചു. ഇത് രാജ്യത്തിന്റെ പരമാധികാരത്തിന് ഭീഷണിയാണെന്നും അദ്ദേഹം മുന്നറിയിപ്പ് നല്കി. വിദേശ നയതന്ത്രജ്ഞരുമായുള്ള കൂടിക്കാഴ്ചകള് പതിവ് പരിപാടി മാത്രമാണെന്നായിരുന്നു ജമാഅത്തിന്റെ വിശദീകരണം.
പഴയ പ്രതിച്ഛായ മാറ്റാനുള്ള ശ്രമം
1971-ലെ വിമോചന യുദ്ധകാലത്ത് ബംഗ്ലാദേശിന്റെ സ്വാതന്ത്ര്യത്തെ എതിര്ത്ത ചരിത്രമാണ് ജമാഅത്തിനുള്ളത്. അന്ന് പാകിസ്ഥാന് പക്ഷത്ത് നിന്ന ഇവര്ക്കെതിരെ കൊലപാതകം, ബലാത്സംഗം തുടങ്ങിയ ഗുരുതര കുറ്റകൃത്യങ്ങള് ആരോപിക്കപ്പെട്ടിരുന്നു. ഷെയ്ഖ് ഹസീനയുടെ ഭരണകാലത്ത് യുദ്ധക്കുറ്റ വിചാരണകളിലൂടെ പാര്ട്ടിയുടെ ഉന്നത നേതാക്കള് വധിക്കപ്പെടുകയും പാര്ട്ടി വിലക്ക് നേരിടുകയും ചെയ്തു.
2024-ന് ശേഷം തിരിച്ചുവരവിനായി ശ്രമിച്ച ജമാഅത്ത് തങ്ങളുടെ പ്രതിച്ഛായ മാറ്റാന് കഠിനമായി ശ്രമിച്ചു. ആദ്യമായി ഒരു ഹിന്ദു സ്ഥാനാര്ത്ഥിയെ മത്സരരംഗത്തിറക്കുകയും ശരീയ നിയമങ്ങളെക്കുറിച്ചുള്ള പ്രസംഗങ്ങള് കുറയ്ക്കുകയും ചെയ്തു. എങ്കിലും, പാര്ട്ടിയുടെ പഴയകാല ചരിത്രവും ശരീയ നിയമങ്ങളോടുള്ള ആഭിമുഖ്യവും വോട്ടര്മാര്ക്കിടയില് ഭീതിയും സംശയവും നിലനിര്ത്തി. ചുരുക്കത്തില്, ബിഎന്പിയുടെ വലിയ മുന്നേറ്റത്തില് ജമാഅത്ത് കാഴ്ചക്കാരായി മാറുന്ന കാഴ്ചയാണ് തിരഞ്ഞെടുപ്പ് ഫലങ്ങള് നല്കുന്നത്.
