'ആരവല്ലി കോടിക്കണക്കിന് ആളുകളുടെ സംരക്ഷണ കവചം, നശിപ്പിക്കപ്പെട്ടാൽ താർ മരുഭൂമി ഡൽഹി വരെ വ്യാപിച്ചേക്കാം'; മുന്നറിയിപ്പുമായി കോൺഗ്രസ് നേതാവ് സച്ചിൻ പൈലറ്റ്
ജയ്പൂർ: ആരവല്ലി കുന്നുകളുടെ സമീപകാല പുനഃർനിർവചനം അതിന്റെ 90 ശതമാനം ഭാഗങ്ങളെയും സംരക്ഷണമില്ലാത്തവയാക്കുമെന്നും, താർ മരുഭൂമി ഡൽഹിയിലേക്ക് വ്യാപിക്കാൻ ഇടയാക്കുമെന്നും കോൺഗ്രസ് നേതാവ് സച്ചിൻ പൈലറ്റ്. 'സേവ് ആരവല്ലി - സേവ് ദി ഫ്യൂച്ചർ' കാമ്പെയ്നിന് കീഴിൽ നാഷനൽ സ്റ്റുഡന്റ്സ് യൂനിയൻ ഓഫ് ഇന്ത്യയുടെ (എൻ.എസ്.യു.ഐ) രാജസ്ഥാൻ തലസ്ഥാനത്ത് നടത്തിയ മാർച്ചിൽ സംസാരിക്കുകയായിരുന്നു അദ്ദേഹം.
നൂറ്റാണ്ടുകളായി പ്രകൃതിദത്ത കവചമായി വർത്തിക്കുന്ന ആരവല്ലി കുന്നുകൾ, വലിയ ജനവിഭാഗങ്ങളെ വായു മലിനീകരണത്തിൽ നിന്ന് സംരക്ഷിക്കുകയും ഭൂഗർഭജല പുനഃരുജ്ജീവനത്തെ പിന്തുണക്കുകയും പാരിസ്ഥിതിക സന്തുലിതാവസ്ഥ നിലനിർത്തുകയും ചെയ്യുന്നു. പുരാതന കാലം മുതൽ കോടിക്കണക്കിന് ആളുകളുടെ സംരക്ഷണ കവചമായി വർത്തിച്ച ആരവല്ലി പർവതനിരകളെ മനഃപൂർവ്വം അപകടത്തിലാക്കാനുള്ള ശ്രമങ്ങളിൽ രാജ്യമെമ്പാടുമുള്ള ആളുകൾ ആശങ്കാകുലരാണെന്ന് പൈലറ്റ് ചൂണ്ടിക്കാട്ടി. ആരവല്ലി നശിപ്പിക്കപ്പെട്ടാൽ, താർ മരുഭൂമി ഡൽഹി വരെ വ്യാപിച്ചേക്കാമെന്നും അദ്ദേഹം കൂട്ടിച്ചേർത്തു.
ആരവല്ലി കുന്നുകളെക്കുറിച്ചുള്ള കേന്ദ്രത്തിന്റെ അംഗീകൃത നിർവചനം മിക്ക ശ്രേണികളെയും നിയമപരമായ സംരക്ഷണത്തിൽ നിന്ന് ഒഴിവാക്കുമെന്ന വാദത്തെ സാധൂകരിക്കാൻ പൈലറ്റ് ഫോറസ്റ്റ് സർവേ ഓഫ് ഇന്ത്യയുടെ ഡാറ്റ പരാമർശിച്ചു. കഴിഞ്ഞ മാസം, ആരവല്ലി കുന്നുകളുടെയും ശ്രേണികളുടെയും ഏകീകൃത നിർവചനം സുപ്രീംകോടതി അംഗീകരിക്കുകയും വിദഗ്ധ റിപ്പോർട്ടുകൾ സമർപ്പിക്കുന്നതുവരെ ഡൽഹി, ഹരിയാന, രാജസ്ഥാൻ, ഗുജറാത്ത് എന്നിവിടങ്ങളിലെ പ്രദേശങ്ങളിൽ പുതിയ ഖനന പാട്ടങ്ങൾ നിരോധിക്കുകയും ചെയ്തിരുന്നു. പുതിയ നിർവചനമനുസരിച്ച്, നിയുക്ത ആരവല്ലി ജില്ലകളിലെ പ്രാദേശിക ഭൂപ്രകൃതിക്ക് മുകളിൽ 100 മീറ്ററോ അതിൽ കൂടുതലോ ഉയരമുള്ള ഭൂപ്രകൃതിയാണ് ആരവല്ലി കുന്ന്.
പരസ്പരം 500 മീറ്ററിനുള്ളിൽ സ്ഥിതി ചെയ്യുന്ന രണ്ടോ അതിലധികമോ കുന്നുകളുടെ ഒരു കൂട്ടം എന്നാണ് ആരവല്ലി മലനിരകൾ നിർവചിച്ചിരിക്കുന്നത്. ഗവൺമെന്റ് ഹോസ്റ്റൽ കവലയിൽ വെച്ച് പോലീസ് മാർച്ചിൽ തടഞ്ഞു. പരിമിതമായ അനുമതി മാത്രമാണ് ഉദ്യോഗസ്ഥർ നൽകിയതെന്നും, അനുവദനീയമായ സ്ഥലത്തിനപ്പുറത്തേക്ക് പ്രതിഷേധക്കാർ നീങ്ങിയാൽ നടപടിയെടുക്കുമെന്നും പോലീസ് മുന്നറിയിപ്പ് നൽകിയിരുന്നു. തുടർന്ന് മാർച്ച് അവസാനിച്ചു. മകനെ ആദ്യമായി ഒരു രാഷ്ട്രീയ പ്രകടനത്തിലേക്ക് കൊണ്ടുവന്നത് ഈ മാർച്ചിലാണെന്ന് സച്ചിൻ പൈലറ്റ് പറഞ്ഞു.
