അന്ന് രാഹുൽ പറഞ്ഞപ്പോൾ എല്ലാവരും കളിയാക്കി ചിരിച്ചു; ഇത് സമൂഹത്തിന്റെ എക്‌സ് റേയാണ്; ഇത് ജനങ്ങളുടെ വിജയം; ജാതി സെന്‍സസില്‍ പ്രതികരിച്ച് ജയ്‌റാം രമേശ്
ഡല്‍ഹി: ജാതി സെന്‍സസ് നടത്താനുള്ള കേന്ദ്രത്തിന്റെ തീരുമാനത്തെ രാജ്യത്തെ കോടിക്കണക്കിന് വരുന്ന ജനങ്ങളുടെ വിജയമെന്ന് പറഞ്ഞ് കോണ്‍ഗ്രസ് ജനറല്‍ സെക്രട്ടറി ജയ്‌റാം രമേശ്. രാഹുല്‍ ഗാന്ധി ജാതി സെന്‍സസിനെക്കുറിച്ച് സംസാരിച്ചപ്പോള്‍ പരിഹസിച്ചവരാണ് ബിജെപിയെന്നും അദ്ദേഹം വ്യക്തമാക്കി.
പൊതുപരിപാടികളിലും പാര്‍ലമെന്റിലും രാഹുല്‍ ഗാന്ധി പലതവണ ജാതി സെന്‍സസ് ആവശ്യപ്പെട്ടിട്ടുണ്ട്. സമൂഹത്തിന്റെ എക്‌സ് റേയാണ് ജാതി സെന്‍സസെന്ന് രാഹുല്‍ പറഞ്ഞപ്പോള്‍ കളിയാക്കി ചിരിച്ചുകൊണ്ട് അവഗണിച്ചവരാണ് ഭരണപക്ഷത്തിരിക്കുന്നവര്‍.
അവകാശങ്ങള്‍ക്കു വേണ്ടിയുള്ള കോടിക്കണക്കിന് ജനതയുടെ ശബ്ദം അധികകാലം അടിച്ചമര്‍ത്താന്‍ കഴിയില്ല. ഇപ്പോഴിതാ മോദി സര്‍ക്കാര്‍ ജാതി സെന്‍സസ് നടത്താന്‍ തീരുമാനിച്ചിരിക്കുന്നു. ഒരിക്കലുമില്ലാതിരിക്കുന്നതിനേക്കാള്‍ ഭേദമാണ് വൈകിയെങ്കിലും നടത്താനുള്ള തീരുമാനം' എന്ന് ജയറാം രമേശ് എക്‌സ് പോസ്റ്റില്‍ വ്യക്തമാക്കി.
സാമൂഹിക നീതി ഉറപ്പാക്കുന്നതിനായുള്ള നിര്‍ണായകമായ ചുവടുവെയ്പ്പാണ് ഈ സെന്‍സസെന്നും സമത്വത്തിനും തുല്യതയ്ക്കും പ്രാതിനിധ്യത്തിനും വേണ്ടി വര്‍ഷങ്ങളായി പോരാടിക്കൊണ്ടിരിക്കുന്ന കോടിക്കണക്കിന് ജനതയുടെ വിജയമാണെന്നും അദ്ദേഹം വ്യക്തമാക്കി.
