അന്ന് തെരുവ് മുഴുവൻ അശാന്തം; പേടിച്ച് ചിതറി ഓടുന്ന ആളുകൾ; ചേരിതിരിഞ്ഞ് കല്ലേറ് പിന്നാലെ വെടിവെയ്പ്പ്; ലഡാക്കിനെ നടുക്കിയ ആ കലാപത്തിൽ കേന്ദ്രം ജുഡീഷ്യൽ അന്വേഷണം പ്രഖ്യാപിക്കുമ്പോൾ
ഡൽഹി: ലഡാക്കിൽ നടന്ന സംഘർഷങ്ങളെക്കുറിച്ച് അന്വേഷിക്കാൻ ജുഡീഷ്യൽ അന്വേഷണത്തിന് കേന്ദ്രസർക്കാർ ഉത്തരവിട്ടു. സുപ്രീം കോടതി മുൻ ജഡ്ജി ബി.എസ്. ചൗഹാൻ അധ്യക്ഷനായുള്ള സമിതിയാണ് അന്വേഷണത്തിന് മേൽനോട്ടം വഹിക്കുക. ലഡാക്കിൽ നിലനിൽക്കുന്ന പ്രതിഷേധങ്ങളുടെ പ്രധാന ആവശ്യങ്ങളിലൊന്നായിരുന്നു ജുഡീഷ്യൽ അന്വേഷണം.
ലഡാക്കിലെ വെടിവെപ്പ് സംബന്ധിച്ച് ജുഡീഷ്യൽ അന്വേഷണം നടത്തണമെന്നാവശ്യപ്പെട്ട് പ്രശസ്ത സാമൂഹ്യപ്രവർത്തകനും ചലച്ചിത്രകാരനുമായ സോനം വാങ്ചുക്ക് ജയിലിനകത്ത് നിന്ന് സന്ദേശമയച്ചിരുന്നു. ജുഡീഷ്യൽ അന്വേഷണം പ്രഖ്യാപിക്കുന്നതുവരെ നിരാഹാരം തുടരുമെന്നായിരുന്നു അദ്ദേഹത്തിന്റെ നിലപാട്. അദ്ദേഹത്തെ അഭിഭാഷകനും സഹോദരനും ജയിലിൽ സന്ദർശിച്ചതിന് പിന്നാലെയാണ് കേന്ദ്രസർക്കാർ ഈ പ്രഖ്യാപനം നടത്തിയത്.
ലഡാക്ക് സംഘർഷങ്ങളെക്കുറിച്ചുള്ള സമഗ്രമായ അന്വേഷണം സാധ്യമാക്കാനും വിഷയത്തിൽ സുതാര്യത ഉറപ്പാക്കാനുമാണ് ഈ നീക്കം. പ്രതിഷേധക്കാരുടെ പ്രധാന ആവശ്യങ്ങളിലൊന്നായ ജുഡീഷ്യൽ അന്വേഷണം പ്രഖ്യാപിച്ചതോടെ, ലഡാക്കിലെ നിലവിലെ പ്രതിഷേധങ്ങൾക്ക് ഒരു പരിഹാരമാകുമെന്നാണ് പ്രതീക്ഷിക്കുന്നത്.
