ബംഗാള് തിരഞ്ഞെടുപ്പിന് ഒരുങ്ങവെ തൃണമൂല് കോണ്ഗ്രസിനെ ഞെട്ടിച്ച് ബിജെപിയുടെ നിര്ണായക നീക്കം; ടെന്നീസ് ഇതിഹാസം ലിയാണ്ടര് പേസ് ബിജെപിയിലേക്ക്; നിതിന് നബിനുമായി കൂടിക്കാഴ്ച; മത്സരിക്കുമോ അതോ താരപ്രചാരകനോ? മമത ക്യാമ്പില് ആശങ്ക
കൊല്ക്കത്ത: പശ്ചിമ ബംഗാള് നിയമസഭാ തിരഞ്ഞെടുപ്പിന് ദിവസങ്ങള് മാത്രം ബാക്കിനില്ക്കെ, ടെന്നീസ് ഇതിഹാസ താരം ലിയാണ്ടര് പേസിനെ രാഷ്ട്രീയ ഗോദയില് ഇറക്കാന് അപ്രതീക്ഷിത നീക്കവുമായി ബിജെപി. ഇന്ന് കൊല്ക്കത്തയില് നടന്ന ചടങ്ങില് ലിയാണ്ടര് പേസ് ഔദ്യോഗികമായി ബിജെപി അംഗത്വം എടുക്കുമെന്നാണ് റിപ്പോര്ട്ട്. നേരത്തെ മമത ബാനര്ജിയുടെ നേതൃത്വത്തിലുള്ള തൃണമൂല് കോണ്ഗ്രസുമായി സഹകരിച്ചിരുന്ന പേസിന്റെ ഈ മാറ്റം രാഷ്ട്രീയ വൃത്തങ്ങളില് വലിയ ചര്ച്ചയായിട്ടുണ്ട്. 2021-ല് ഗോവയില് വെച്ച് പേസ് തൃണമൂലില് ചേര്ന്നിരുന്നു. എന്നാല് ബംഗാള് തിരഞ്ഞെടുപ്പിന് തൊട്ടുമുന്പുള്ള ഈ പാര്ട്ടി മാറ്റം ബിജെപിക്ക് സംസ്ഥാനത്ത് വലിയ ഊര്ജ്ജം നല്കുമെന്നാണ് വിലയിരുത്തപ്പെടുന്നത്.
ബിജെപി ദേശീയ അധ്യക്ഷന് നിതിന് നബിനുമായി പേസ് നേരത്തെ കൂടിക്കാഴ്ചനടത്തിയിരുന്നു. ബിജെപി സംസ്ഥാന അധ്യക്ഷന് സമിക് ഭട്ടാചാര്യയും ചടങ്ങില് സന്നിഹിതനായിരുന്നു. പാര്ട്ടിയുടെ തിരഞ്ഞെടുപ്പ് തന്ത്രങ്ങള് രൂപീകരിക്കുന്നതിനായി നിതിന് നബിന് കൊല്ക്കത്തയില് നടത്തുന്ന സന്ദര്ശനത്തിനിടെയാണ് ലിയാണ്ടര് പേസിന്റെ ഈ രാഷ്ട്രീയ പ്രവേശം. എങ്കിലും, വരാനിരിക്കുന്ന തിരഞ്ഞെടുപ്പില് പേസ് മത്സരിക്കുമോ എന്ന കാര്യത്തില് പാര്ട്ടി ഇതുവരെ ഔദ്യോഗിക സ്ഥിരീകരണം നല്കിയിട്ടില്ല.
പശ്ചിമ ബംഗാള് നിയമസഭാ തിരഞ്ഞെടുപ്പിന്റെ പടിവാതില്ക്കല് നില്ക്കെ, കായിക ലോകത്തെ ഇതിഹാസ താരം ലിയാണ്ടര് പേസിന്റെ രാഷ്ട്രീയ ചുവടുമാറ്റം ബംഗാള് രാഷ്ട്രീയത്തില് പുതിയ ചര്ച്ചകള്ക്ക് വഴിതുറക്കുകയാണ്. രാഷ്ട്രീയക്കളരിയില് അപ്രതീക്ഷിത നീക്കങ്ങള് പതിവാണെങ്കിലും, തൃണമൂല് കോണ്ഗ്രസില് നിന്ന് ബിജെപിയിലേക്കുള്ള പേസിന്റെ മാറ്റം വലിയ പ്രാധാന്യത്തോടെയാണ് രാഷ്ട്രീയ നിരീക്ഷകര് കാണുന്നത്. കൊല്ക്കത്തയില് വച്ച് ബിജെപി ദേശീയ അധ്യക്ഷന് നിതിന് നബിനുമായി നടത്തിയ കൂടിക്കാഴ്ചയ്ക്ക് പിന്നാലെ അദ്ദേഹം ഔദ്യോഗികമായി ബിജെപിയില് ചേരുമെന്ന റിപ്പോര്ട്ടുകള് പുറത്തുവന്നതോടെ കായികപ്രേമികളും രാഷ്ട്രീയ അണികളും ഒരുപോലെ ആവേശത്തിലാണ്.
ബംഗാളില് ഇതിനകം തന്നെ രണ്ട് ഘട്ടങ്ങളിലായി 255 സ്ഥാനാര്ത്ഥികളെ ബിജെപി പ്രഖ്യാപിച്ചു കഴിഞ്ഞു. ആദ്യ പട്ടികയില് 144 പേരും രണ്ടാം പട്ടികയില് 111 പേരും ഇടംപിടിച്ചിട്ടുണ്ട്. ഈ സാഹചര്യത്തില് പേസ് സ്ഥാനാര്ത്ഥിയായി മത്സരിക്കുമോ അതോ ബിജെപിയുടെ താരപ്രചാരകനായി മാത്രം നില്ക്കുമോ എന്ന കാര്യത്തില് ഇതുവരെ ഔദ്യോഗിക സ്ഥിരീകരണം ഉണ്ടായിട്ടില്ല. കായികതാരങ്ങള് രാഷ്ട്രീയത്തിലേക്ക് വരുന്നത് ബംഗാളില് പുതിയ കാര്യമല്ലെങ്കിലും, വിശ്വപ്രസിദ്ധനായ ഒരു ടെന്നീസ് താരം തിരഞ്ഞെടുപ്പിന് തൊട്ടുമുന്പ് തൃണമൂല് വിട്ട് ബിജെപിയില് ചേരുന്നത് മമത ബാനര്ജിക്ക് രാഷ്ട്രീയമായി തിരിച്ചടിയായേക്കാം.
അന്താരാഷ്ട്ര ടെന്നീസ് കോര്ട്ടുകളില് നിരവധി വിജയങ്ങള് കൊയ്ത ലിയാണ്ടര് പേസിന് ബംഗാളിലെ ജനങ്ങള്ക്കിടയില് വലിയ സ്വാധീനമുണ്ട്. അദ്ദേഹത്തിന്റെ വരവ് യുവാക്കളുടെയും കായിക പ്രേമികളുടെയും വോട്ടുകള് ബിജെപിയിലേക്ക് ആകര്ഷിക്കാന് സഹായിക്കുമെന്ന് പാര്ട്ടി നേതൃത്വം കണക്കുകൂട്ടുന്നു. വരും ദിവസങ്ങളില് ലിയാണ്ടര് പേസിന്റെ രാഷ്ട്രീയ ഭാവി സംബന്ധിച്ചും അദ്ദേഹം മത്സരിക്കുന്ന മണ്ഡലത്തെക്കുറിച്ചുമുള്ള കൂടുതല് വിവരങ്ങള് പുറത്തുവരുമെന്നാണ് പ്രതീക്ഷിക്കുന്നത്. ബംഗാള് നിയമസഭാ തിരഞ്ഞെടുപ്പ് ഗോദയില് പേസിന്റെ ഈ 'സര്വ്വ്' ബിജെപിക്ക് എത്രത്തോളം ഗുണകരമാകുമെന്ന് കാത്തിരുന്നു കാണേണ്ടിയിരിക്കുന്നു.
