'ഭരണഘടനയും ഭഗവദ്ഗീതയും ഒന്ന്'; രണ്ടും ലക്ഷ്യമിടുന്നത് നീതിയുക്തവും സമാധാനപരവുമായ ഒരു സമൂഹത്തെ; വിവാദ പരാമർശവുമായി പവൻ കല്യാൺ; വാക്കുകൾ തിരുത്തണമെന്ന് പ്രതിപക്ഷം

അമരാവതി: ആന്ധ്രാപ്രദേശ് ഉപമുഖ്യമന്ത്രിയും ജനസേന നേതാവുമായ പവൻ കല്യാൺ നടത്തിയ ഭരണഘടനാ പരാമർശം വലിയ വിവാദങ്ങൾക്ക് തിരികൊളുത്തിയിരിക്കുകയാണ്. ഭരണഘടനയും ഭഗവദ്ഗീതയും ഒന്നാണെന്ന അദ്ദേഹത്തിന്റെ പ്രസ്താവനയ്ക്കെതിരെ കോൺഗ്രസ് അടക്കമുള്ള പ്രതിപക്ഷ നേതാക്കൾ രൂക്ഷ വിമർശനവുമായി രംഗത്തെത്തി. ഭരണഘടനയുടെ മതേതര സ്വഭാവത്തെക്കുറിച്ച് പവൻ കല്യാണിന് ധാരണയില്ലെന്നാണ് വിമർശകരുടെ പ്രധാന ആക്ഷേപം.

ധർമ്മവും ഭരണഘടനയും വ്യത്യസ്ത ലോകങ്ങളുടേതാണെന്ന് ചിലർ കരുതുന്നുണ്ടെങ്കിലും അത് ശരിയല്ലെന്നാണ് പവൻ കല്യാൺ ഒരു പൊതുപരിപാടിയിൽ പറഞ്ഞത്. 'ധർമ്മം ഒരു ധാർമ്മിക കോമ്പസാണ്, ഭരണഘടന ഒരു നിയമപരമായ കോമ്പസാണ്. എന്നാൽ നീതിയുക്തവും സമാധാനപരവും കാരുണ്യപൂർണ്ണവുമായ ഒരു സമൂഹത്തെയാണ് രണ്ടും ലക്ഷ്യമിടുന്നത്. അതിനാൽ, ഹിന്ദു ധർമ്മവും ഭരണഘടനയും ഒന്നാണെന്ന കാഴ്ചപ്പാടാണ് എനിക്കുള്ളത്,' അദ്ദേഹം വ്യക്തമാക്കി.

ഈ പ്രസ്താവനയ്ക്കെതിരെ കോൺഗ്രസ് നേതാക്കൾ ശക്തമായി പ്രതികരിച്ചു. ഭരണഘടനയെക്കുറിച്ച് അറിവില്ലാത്ത സെലിബ്രിറ്റികൾക്ക് മാത്രമേ ഇത്തരം പരാമർശങ്ങൾ നടത്താൻ സാധിക്കുകയുള്ളൂ എന്ന് മുതിർന്ന കോൺഗ്രസ് നേതാവ് ബി. കെ. ഹരിപ്രസാദ് വിമർശിച്ചു. 'ഇന്ത്യൻ ഭരണഘടന മതേതരമാണ്. അതിൽ ധർമ്മത്തിനല്ല, നിയമത്തിനാണ് സ്ഥാനം. ഒരു ഉത്തരവാദിത്തപ്പെട്ട സ്ഥാനത്തിരിക്കുന്ന വ്യക്തിയിൽ നിന്ന് ഇത്തരം പ്രസ്താവനകൾ വരുന്നത് ഖേദകരമാണ്,' അദ്ദേഹം പറഞ്ഞു.

കർണാടക മന്ത്രിയും കോൺഗ്രസ് നേതാവുമായ പ്രിയങ്ക് ഖാർഗെയും പവൻ കല്യാണിന്റെ പ്രസ്താവനയെ നിശിതമായി വിമർശിച്ചു. നിയമത്തെയും ധർമ്മത്തെയും കുറിച്ച് അദ്ദേഹത്തിന് ധാരണയില്ലെന്നാണ് ഖാർഗെ അഭിപ്രായപ്പെട്ടത്. ഭരണഘടന എല്ലാവർക്കും തുല്യനീതി ഉറപ്പാക്കുന്ന ഒരു നിയമസംഹിതയാണ്. അതിനെ ഏതെങ്കിലും ഒരു മതഗ്രന്ഥവുമായി താരതമ്യം ചെയ്യുന്നത് ഭരണഘടനാ മൂല്യങ്ങളെ ചോദ്യം ചെയ്യുന്നതിന് തുല്യമാണെന്നും അദ്ദേഹം കൂട്ടിച്ചേർത്തു.

ഉപമുഖ്യമന്ത്രിയുടെ വാക്കുകൾ ഭരണഘടനാപരമായി സത്യപ്രതിജ്ഞ ചെയ്ത ഒരു വ്യക്തിക്ക് ചേർന്നതല്ലെന്നും, തന്റെ വാക്കുകൾ അദ്ദേഹം തിരുത്തണമെന്നും പ്രതിപക്ഷം ആവശ്യപ്പെട്ടു. ജനാധിപത്യ രാജ്യത്ത്, ഭരണഘടനയാണ് പരമപ്രധാനമായ നിയമപുസ്തകം എന്നും, അതിനെ ഏതെങ്കിലും ഒരു മതഗ്രന്ഥവുമായി താരതമ്യം ചെയ്യുന്നത് ഭരണഘടനയോടുള്ള അനാദരവാണെന്നും രാഷ്ട്രീയ നിരീക്ഷകരും ചൂണ്ടിക്കാട്ടി. ഈ വിഷയത്തിൽ ജനസേനയുടെ ഭാഗത്തുനിന്ന് ഇതുവരെ ഔദ്യോഗിക പ്രതികരണമൊന്നും വന്നിട്ടില്ല.