ന്യൂഡൽഹി: മധ്യപ്രദേശിലെ ഇൻഡോറിൽ മലിനജലം കുടിച്ച് നിരവധിയാളുകൾ മരിച്ച സംഭവത്തിൽ ബി.ജെ.പി നേതൃത്വം നൽകുന്ന സർക്കാരിനെതിരെ രൂക്ഷ വിമർശനവുമായി കോൺഗ്രസ് നേതാവ് രാഹുൽ ഗാന്ധി. 'ഇൻഡോറിൽ വെള്ളമില്ലായിരുന്നു, വിഷമാണ് വിതരണം ചെയ്തത്,' എന്ന് രാഹുൽ എക്‌സിൽ കുറിച്ചു. ഈ ദുരന്തത്തിന് ബി.ജെ.പിയുടെ 'ഇരട്ട എൻജിൻ' സർക്കാരും അതിന്റെ അശ്രദ്ധമായ ഭരണകൂടവുമാണ് പൂർണമായും ഉത്തരവാദികളെന്ന് അദ്ദേഹം ആരോപിച്ചു.

മധ്യപ്രദേശ് സർക്കാരിന്റെ ഭരണത്തിന്റെയും ഉത്തരവാദിത്തത്തിന്റെയും പരാജയമാണ് ഇൻഡോറിലെ ജലമലിനീകരണ പ്രതിസന്ധിക്ക് കാരണമെന്ന് രാഹുൽ ഗാന്ധി ചൂണ്ടിക്കാട്ടി. ശുദ്ധജലം ലഭിക്കാനുള്ള അവകാശം ജീവിക്കാനുള്ള അവകാശമാണെന്നും, ഈ 'കൊലപാതകത്തിന്' ബി.ജെ.പിയുടെ നിർദയമായ നേതൃത്വവും ഉത്തരവാദികളാണെന്നും അദ്ദേഹം പറഞ്ഞു. ദുരന്തം നടന്നപ്പോൾ ഭരണകൂടം കുംഭകർണ്ണനെപ്പോലെ ഉറങ്ങുകയായിരുന്നുവെന്നും, വീടുകളിൽ നിന്ന് വീടുകളിലേക്ക് വിലാപം വ്യാപിച്ചപ്പോൾ ദരിദ്രർ നിസ്സഹായരായെന്നും രാഹുൽ വിമർശിച്ചു.

ഇതിനിടെ, ബി.ജെ.പി നേതാക്കൾ ധാർഷ്ട്യപരമായ പ്രസ്താവനകൾ നടത്തിയെന്നും, ദുരിതമനുഭവിക്കുന്നവർക്ക് ആശ്വാസത്തിന് പകരം സർക്കാർ അഹങ്കാരമാണ് വിളമ്പിയതെന്നും രാഹുൽ കൂട്ടിച്ചേർത്തു. വൃത്തികെട്ടതും ദുർഗന്ധം വമിക്കുന്നതുമായ വെള്ളത്തെക്കുറിച്ച് താമസക്കാർ ആവർത്തിച്ച് പരാതിപ്പെട്ടിട്ടും ഭരണകൂടം നടപടിയെടുക്കുന്നതിൽ പരാജയപ്പെട്ടുവെന്ന് രാഹുൽ ഗാന്ധി പറഞ്ഞു. കുടിവെള്ളത്തിൽ മലിനജലം കലരാൻ എങ്ങനെ അനുവദിച്ചുവെന്നും, എന്തുകൊണ്ട് വിതരണം യഥാസമയം നിർത്തിവെച്ചില്ലെന്നും, ഉത്തരവാദികളായ ഉദ്യോഗസ്ഥർക്കും നേതാക്കൾക്കുമെതിരെ എപ്പോൾ നടപടിയെടുക്കുമെന്നും അദ്ദേഹം ചോദ്യങ്ങൾ ഉന്നയിച്ചു.

ആർ.ജെ.ഡി. എം.പി. മനോജ് ഝായും ഇൻഡോർ വിഷയത്തിൽ സർക്കാരിനെതിരെ വിമർശനമുന്നയിച്ചു. നിരപരാധികളായ കുട്ടികൾക്ക് ജീവൻ നഷ്ടമായതിനെ സർക്കാർ വെറുമൊരു സംഖ്യയായി കാണുമ്പോൾ, കുടുംബങ്ങൾക്ക് അവരുടെ പ്രിയപ്പെട്ടവരെയാണ് നഷ്ടപ്പെട്ടതെന്ന് അദ്ദേഹം പറഞ്ഞു. കൂടാതെ, ഈ വിഷയത്തിൽ ഒരു മന്ത്രിയുടെ പെരുമാറ്റം വികാരരഹിതമായിരുന്നുവെന്നും, ആരും ഉത്തരവാദിത്തം ഏറ്റെടുക്കാതെ വിഷയം വഴിതിരിച്ചുവിടാൻ 'ഹെഡ്‌ലൈൻ മാനേജ്‌മെന്റിലാണ്' സർക്കാർ ശ്രദ്ധ കേന്ദ്രീകരിക്കുന്നതെന്നും മനോജ് ഝാ പരിഹസിച്ചു. മലിനജലം മൂലമുണ്ടായ മരണങ്ങൾ മധ്യപ്രദേശിൽ വലിയ രാഷ്ട്രീയ വിവാദത്തിന് വഴിവെച്ചിരിക്കുകയാണ്.

ഇൻഡോർകോൺഗ്രസ് നേതാവ്രാഹുൽ ഗാന്ധി

സ്വന്തം ലേഖകൻ