'ദിസ് ഗവണ്മെന്റ് ഈസ് ഇന്സള്ട്ടിങ് മൈ ഫ്രണ്ട് സുരേഷ് ഗോപി! എയിംസ് വരുമെന്ന് അദ്ദേഹം ഉറച്ച വാഗ്ദാനം നല്കിയിരുന്നു; 24 മണിക്കൂറും 36 മണിക്കൂറും പിന്നിട്ടിട്ടും എവിടെയാണ് ആ എയിംസ്?' സ്വന്തം മന്ത്രിയെ മോദി സര്ക്കാര് നാണംകെടുത്തുന്നുവെന്ന് പരിഹസിച്ച് ജോണ് ബ്രിട്ടാസ്
സ്വന്തം മന്ത്രിയെ മോദി സര്ക്കാര് നാണംകെടുത്തുന്നുവെന്ന് പരിഹസിച്ച് ജോണ് ബ്രിട്ടാസ്
ന്യൂഡല്ഹി: കേരളത്തിന് എയിംസ് അനുവദിക്കാത്തതിലൂടെ കേന്ദ്രസര്ക്കാര് സ്വന്തം മന്ത്രിയായ സുരേഷ് ഗോപിയെ തുടര്ച്ചയായി അപമാനിക്കുകയാണെന്ന് ജോണ് ബ്രിട്ടാസ് എം.പി. കേരളത്തോടുള്ള അവഗണനയ്ക്കൊപ്പം നല്കിയ വാഗ്ദാനങ്ങള് പാലിക്കാത്തതിനെയും പാര്ലമെന്റില് നടന്ന ചര്ച്ചയില് ബ്രിട്ടാസ് പരിഹസിച്ചു.
സുരേഷ് ഗോപിക്ക് നേരെയുള്ള പരിഹാസം
'എന്റെ സുഹൃത്തായ സുരേഷ് ഗോപിയെ സര്ക്കാര് നിരന്തരം അവഗണിക്കുകയാണ്. എയിംസ് വരുമെന്ന് അദ്ദേഹം ഉറച്ച വാഗ്ദാനം നല്കിയിരുന്നു. 24 മണിക്കൂറും 36 മണിക്കൂറും പിന്നിട്ടിട്ടും എവിടെയാണ് ആ എയിംസ്?' എന്ന് ബ്രിട്ടാസ് ചോദിച്ചു.
സുരേഷ് ഗോപിയെ ആദരിക്കണമെന്ന് താന് സര്ക്കാരിനോട് അഭ്യര്ത്ഥിച്ചിരുന്നതാണ്. എന്നാല് അദ്ദേഹം വീണ്ടും വീണ്ടും അപമാനിക്കപ്പെടുകയാണ്. സ്വന്തം മന്ത്രിയുടെ അന്തസ്സ് സംരക്ഷിക്കാന് സര്ക്കാര് തയ്യാറാകണമെന്നും അദ്ദേഹം ആവശ്യപ്പെട്ടു.
ആരോഗ്യരംഗത്ത് മികച്ച നേട്ടങ്ങള് കൈവരിച്ച കേരളത്തിന്റെ എയിംസ് എന്ന ദീര്ഘകാല ആവശ്യത്തെ ഇത്തവണത്തെ ബജറ്റിലും കേന്ദ്രം തഴഞ്ഞു.
കേരളത്തില് എയിംസ് വരുമെന്ന് പല വേദികളിലും ആവര്ത്തിച്ചു പ്രഖ്യാപിച്ച വ്യക്തിയായിരുന്നു സുരേഷ് ഗോപി. എയിംസ് തൃശൂരോ ആലപ്പുഴയിലോ തിരുവനന്തപുരത്തോ വരുമെന്നും, കേരളം ഭൂമി നല്കിയില്ലെങ്കില് അത് പൊള്ളാച്ചിയിലേക്ക് കൊണ്ടുപോകുമെന്നുമൊക്കെയുള്ള അദ്ദേഹത്തിന്റെ മുന് പ്രസ്താവനകള് വലിയ ചര്ച്ചയായിരുന്നു. എന്നാല് കേന്ദ്ര ബജറ്റില് എയിംസിനെക്കുറിച്ച് പരാമര്ശമില്ലാത്തതാണ് പുതിയ രാഷ്ട്രീയ പോരിലേക്ക് നയിച്ചത്.
എയിംസിന്റെ കാര്യത്തില് കേരളത്തിന്റെ വര്ഷങ്ങളായുള്ള ആവശ്യമാണ് ഇക്കുറിയും കേന്ദ്രം അവഗണിച്ചത്. ആരോഗ്യ രംഗത്ത് മുന്നില് നില്ക്കുന്ന കേരളത്തിന് എയിംസ് അനുവദിക്കണമെന്ന് സംസ്ഥാനം ദീര്ഘകാലമായി ആവശ്യപ്പെട്ടിരുന്നു.
