ശമ്പളവും ചിക്ലിയും മേടിക്കുന്നുണ്ട്; പണി ചെയ്യാൻ പറ്റുന്നവരെ ജോലിക്ക് വെക്കണം; തമിഴ്‌നാട്ടിലെ റവന്യൂ ഉദ്യോഗസ്ഥരും ഫോറസ്റ്റുകാരും പൊലീസുകാരും ആ നാടിനോട് കാണിക്കുന്ന കൂറ് ഇവിടുത്തെ കാക്കിധാരികളും കാണണം; വനം - റവന്യൂ വകുപ്പ് ഉദ്യോഗസ്ഥർക്കെതിരെ രൂക്ഷ വിമർശനവുമായി എം എം മണി
കമ്പംമെട്ട്: വനം, റവന്യൂ വകുപ്പ് ഉദ്യോഗസ്ഥർക്കെതിരെ രൂക്ഷ വിമർശനവുമായ എംഎൽഎയും മുൻ മന്ത്രിയുമായ എം എം മണി. നാടിനോട് കൂറില്ലാത്തവരാണ് ഉദ്യോഗസ്ഥർ. നികുതിപ്പണം കൊണ്ട് ശമ്പളം വാങ്ങി ഭക്ഷണം കഴിച്ച് വെറുതേ ഇരിക്കുകയാണവർ. ജോലി ചെയ്യാത്തവരെ കാസർകോട്ടേക്ക് സ്ഥലം മാറ്റണമെന്നും എം.എം. മണി പറഞ്ഞു. ഇടുക്കി കമ്പംമെട്ട് സംയോജിത ചെക്ക് പോസ്റ്റ് ഉദ്ഘാടന ചടങ്ങിലാണ് മുന്മന്ത്രിയുടെ പരാമർശം.
അതിർത്തിയിൽ ഒന്നനങ്ങിപ്പോയാൽ തമിഴ്‌നാട് ഉദ്യോഗസ്ഥർ ഇവിടെ വരും. നമ്മുടെ വായ് നോക്കികൾ ഇവിടെയൊന്നുമില്ല. തമാശ പറയുകയല്ല. കുറേ നാളായി തോന്നിയ വികാരമാണ് ഞാനീ പറയുന്നതെന്ന് പറഞ്ഞാണ് മണിയുടെ വിമർശനം.
എം.എം. മണി എംഎ‍ൽഎയുടെ വാക്കുകൾ:
അതിർത്തിയിൽ ഒരു കരിങ്കല്ല് എറിഞ്ഞെന്നറിഞ്ഞാൽ തമിഴ്‌നാട്ടിലെ ഉദ്യോഗസ്ഥരെല്ലാം ഇവിടെ വരും. ഇവിടുത്തെ പൊലീസുകാരടക്കം ഒരുത്തനും തിരിഞ്ഞുനോക്കില്ല.
അതിർത്തിയിൽ എന്തേലും ഒരു കിള കിളച്ചാൽ, തമിഴ്‌നാട്ടിൽ നിന്ന് ഉദ്യോഗസ്ഥന്മാർ ഇവിടെ വരും. നമ്മുടെ ഉദ്യോഗസ്ഥന്മാർ യാതൊരു കൂറുമില്ലാത്ത ഒരു സൈസ് ആളുകൾ.
തമിഴ്‌നാട്ടിലെ റവന്യൂ ഉദ്യോഗസ്ഥരും ഫോറസ്റ്റുകാരും പൊലീസുകാരും ആ നാടിനോട് കാണിക്കുന്ന കൂറ് ഇവിടുത്തെ കാക്കിധാരികളും ഒന്ന് കണ്ടുപടിക്കുന്നത് നന്നായിരിക്കും എന്നാണ് എനിക്ക് തോന്നുന്നത്.
അതിർത്തിയിൽ ഒന്നനങ്ങിപ്പോയാൽ തമിഴ്‌നാട് ഉദ്യോഗസ്ഥർ ഇവിടെ വരും. നമ്മുടെ വായ് നോക്കികൾ ഇവിടെയൊന്നുമില്ല. തമാശ പറയുകയല്ല. കുറേ നാളായി തോന്നിയ വികാരമാണ് ഞാനീ പറയുന്നത്.
ശമ്പളമൊക്കെ മേടിക്കുന്നുണ്ട്, കൂടാതെ ചിക്ലിയും മേടിക്കുന്നുണ്ട്. തമിഴ്‌നാട്ടുകാർ അവരുടെ സംസ്ഥാനത്തോട് കാണിക്കുന്ന കൂറ് കാണിക്കാത്ത തട്ടിപ്പുകാരാണ് ഇവിടുത്തെ മഹാഭൂരിപക്ഷം ഉദ്യോഗസ്ഥരും. നിങ്ങളൊക്കെ അവർക്ക് ദക്ഷിണ വെക്കണം. എനിക്ക് കുറേ നാളായി തോന്നിയ ചൊറിച്ചിലാണിത്.
പണിചെയ്യാൻ പറ്റുന്നവരെ ജോലിക്ക് വെക്കണം. അതിർത്തിയിൽ ഉള്ള ഉദ്യോഗസ്ഥരെയെല്ലാം മാറ്റി, ഉത്തരവാദിത്തമുള്ളവരെ വെക്കണം എന്നാണ് എന്റെ അഭിപ്രായം. ഞാൻ വേണമെങ്കിൽ നിൽക്കാം, നിങ്ങളും കൂടെ കൂടാമെങ്കിൽ. വെറുതേ വിടരുത്. അന്നന്ന് ഉണ്ട്, ശയിക്കണം. പണിയും ചെയ്യില്ല. തമിഴ്‌നാട്ടുകാരന്മാര് കാണിക്കുന്ന കൂറ് കാണിക്കാത്തവന്മാർ.
വല്ല ചിക്ലിയും കിട്ടാമോയെന്ന് നോക്കും. ഈ നിലപാട് മാറ്റിയില്ലെങ്കിൽ ഇവിടുന്ന മാറ്റി പ്രതിഷ്ഠിക്കണം. ഇവിടെയൊന്നും വേണ്ട, കാസർകോട്ടോ വേറെ എവിടെയെങ്കിലും വിടണം. എന്നിട്ട് പണി ചെയ്യാൻ പറ്റുന്ന വേറെയാരെയെങ്കിലും വെക്കണം. കൂറില്ലാത്തവരെയെന്തിനാണ് നമ്മൾ ചുമക്കുന്നത്. ഉദ്യോഗസ്ഥരുടെ കാര്യമാണ് ഞാൻ പറയുന്നത്.
