മണ്ഡലത്തിലെ വികസന മുരടിപ്പിനെതിരെ പ്രതിഷേധിക്കാനെത്തി; പൊലീസ് നോക്കിനില്‍ക്കെ സിപിഎം മര്‍ദനം; റോഡ് ഉപരോധിച്ച് പ്രതിഷേധിച്ച് കോണ്‍ഗ്രസ് പ്രവര്‍ത്തകര്‍; ചെറുതുരുത്തിയില്‍ സംഘര്‍ഷവസ്ഥ
ചെറുതുരുത്തിയില്‍ സംഘര്‍ഷവസ്ഥ; സിപിഎമ്മുകാര്‍ മര്‍ദ്ദിച്ചെന്ന് കോണ്‍ഗ്രസ്
തൃശൂര്‍: ഉപതിരഞ്ഞെടുപ്പ് നടക്കുന്ന ചേലക്കരയിലെ ചെറുതുരുത്തിയില്‍ സംഘര്‍ഷം. ചെറുതുരുത്തിയില്‍ മണ്ഡലത്തിലെ വികസന മുരടിപ്പിനെതിരെ പ്രതിഷേധിക്കാനെത്തിയ യൂത്ത് കോണ്‍ഗ്രസ് പ്രവര്‍ത്തകന്‍ നിഷാദ് തലശ്ശേരിയെ സിപിഎം പ്രവര്‍ത്തകര്‍ മര്‍ദ്ദിച്ചെന്ന് പരാതി. മര്‍ദ്ദനത്തില്‍ നിഷാദ് തലശ്ശേരിക്ക് പരിക്കേറ്റു.
സംഭവത്തെ തുടര്‍ന്ന് ചെറുതുരുത്തിയില്‍ കോണ്‍ഗ്രസ് പ്രവര്‍ത്തകര്‍ പ്രതിഷേധിക്കുകയാണ്. സ്ഥലത്ത് സംഘര്‍ഷവസ്ഥ നിലനില്‍ക്കുകയാണ്. പൊലീസിനെതിരെ യൂത്ത് കോണ്‍ഗ്രസ് പ്രവര്‍ത്തകര്‍ പ്രതിഷേധവുമായി രംഗത്തെത്തി. അതേസമയം, പൊലീസിനു മുന്നില്‍ വച്ചായിരുന്നു മര്‍ദ്ദനമെന്ന് നിഷാദ് പറഞ്ഞു. പരിക്കേറ്റ നിഷാദിനെ ആംബുലന്‍സില്‍ കൊണ്ടുപോയി. അതിനിടെ, സ്ഥലത്ത് എത്തിയ പൊലീസിന് നേരെയും റോഡ് ഉപരോധിച്ചും കോണ്‍ഗ്രസ് പ്രതിഷേധിക്കുകയാണ്.
സിപിഎം പ്രവര്‍ത്തകര്‍ ക്രൂരമായി മര്‍ദ്ദിച്ചെന്ന് കോണ്‍ഗ്രസ് ആരോപണം. പൊലീസ് നോക്കി നില്‍ക്കവെയായിരുന്നു മര്‍ദ്ദനമെന്നും കോണ്‍ഗ്രസ് പ്രവര്‍ത്തകര്‍ ആരോപിച്ചു. മണ്ഡലത്തില്‍ കഴിഞ്ഞ 28 വര്‍ഷമായി വികസന മുരടിപ്പാണെന്ന് ആരോപിച്ച് 28 മിനുറ്റ് നേരം നീണ്ടുനില്‍ക്കുന്ന പ്രതിഷേധം ഇന്ന് കോണ്‍ഗ്രസ് പ്രഖ്യാപിച്ചിരുന്നു. തലകുത്തി നിന്നുള്ള പ്രതിഷേധമായിരുന്നു പ്രഖ്യാപിച്ചത്. ഈ പ്രതിഷേധത്തില്‍ പങ്കെടുക്കാനെത്തിയവരെയാണ് മര്‍ദ്ദിച്ചതെന്ന് കോണ്‍ഗ്രസ് ആരോപിച്ചു.
പൊലീസ് നോക്കിനിന്നുവെന്നാരോപിച്ച് കോണ്‍ഗ്രസ് പ്രവര്‍ത്തകര്‍ പൊലീസ് സ്റ്റേഷനിലേക്ക് മാര്‍ച്ച് നടത്തി. സി ഐയെ സ്ഥലം മാറ്റണമെന്ന് കോണ്‍ഗ്രസ് ആവശ്യപ്പെട്ടു.
