രണ്ടാംഘട്ട സ്ഥാനാര്ത്ഥി പട്ടികയില് സുധാകരന്റെ പേര് ഉണ്ടാകുമോ? പരിഗണിച്ചില്ലെങ്കില് ജില്ലയില് മാത്രമല്ല, സംസ്ഥാനത്താകെ ചലനമുണ്ടാകും; 15 സീറ്റുകളില് സ്വതന്ത്രരായി മത്സരിച്ചേക്കും; കടുത്ത നിലപാടിലേക്ക് സുധാകരന് അനുകൂലികള്
കണ്ണൂര്: കണ്ണൂര് രാഷ്ട്രീയത്തിലും കോണ്ഗ്രസ് നേതൃത്വത്തിലും വന് പ്രകമ്പനം സൃഷ്ടിച്ച് കെ. സുധാകരന്റെ സ്ഥാനാര്ത്ഥിത്വത്തെച്ചൊല്ലിയുള്ള തര്ക്കം മുറുകുന്നു. നിയമസഭാ തിരഞ്ഞെടുപ്പില് സുധാകരന് സീറ്റ് നിഷേധിച്ചാല് കടുത്ത പ്രത്യാഘാതങ്ങള് നേരിടേണ്ടി വരുമെന്ന മുന്നറിയിപ്പുമായി അദ്ദേഹത്തിന്റെ അനുനയികള് രംഗത്തെത്തിക്കഴിഞ്ഞു. സുധാകരനൊപ്പം നില്ക്കുന്ന 15 ഓളം പേര് വിവിധ മണ്ഡലങ്ങളില് സ്വതന്ത്രരായി മത്സരിക്കാനാണ് നിലവില് ആലോചിക്കുന്നത്.
കണ്ണൂരിലെ മൂന്ന് മണ്ഡലം കമ്മിറ്റി പ്രസിഡന്റുമാര് സുധാകരന് പരസ്യ പിന്തുണ പ്രഖ്യാപിച്ചു. ഇന്ന് നടന്ന സുപ്രധാനമായ നേതൃയോഗത്തില് നിന്ന് തങ്ങളെ ബോധപൂര്വം ഒഴിവാക്കിയെന്നും സുധാകരനോടുള്ള അവഗണന തങ്ങളോടും കാട്ടിയെന്നുമാണ് ഇവരുടെ പരാതി. കണ്ണൂരില് സുധാകരന് തന്നെ മത്സരിക്കണമെന്നും അല്ലാത്തപക്ഷം സംസ്ഥാനത്തുടനീളം വലിയ രാഷ്ട്രീയ ചലനങ്ങളുണ്ടാകുമെന്നും ഇവര് ഹൈക്കമാന്ഡിന് മുന്നറിയിപ്പ് നല്കി.
കോണ്ഗ്രസിന്റെ രണ്ടാംഘട്ട സ്ഥാനാര്ത്ഥി പട്ടിക ഉടന് പുറത്തിറങ്ങാനിരിക്കെ, അതില് സുധാകരന്റെ പേര് ഉണ്ടാകുമോ എന്നതാണ് രാഷ്ട്രീയ കേരളം ഉറ്റുനോക്കുന്നത്. നിലവില് ഡല്ഹിയിലുള്ള സുധാകരന് ഇന്ന് തന്നെ കേരളത്തിലേക്ക് മടങ്ങുമെന്നും ഉടന് മാധ്യമങ്ങളെ കാണുമെന്നുമാണ് ലഭിക്കുന്ന വിവരം. സുധാകരന്റെ കാര്യത്തില് പാര്ട്ടി വഴങ്ങുമെന്ന സൂചനകള് പുറത്തുവന്നതോടെ മറ്റു മുതിര്ന്ന നേതാക്കളും സമ്മര്ദ്ദ തന്ത്രങ്ങളുമായി രംഗത്തെത്തിയിട്ടുണ്ട്.
കെ. സുധാകരന് പിന്നാലെ അടൂര് പ്രകാശ് എം.പിയും സ്ഥാനാര്ത്ഥിത്വത്തിനായി അവകാശവാദം ഉന്നയിച്ചു. കോന്നി നിയമസഭാ മണ്ഡലത്തില് തന്നെ പരിഗണിക്കണമെന്ന് അദ്ദേഹം ഹൈക്കമാന്ഡിനോട് ആവശ്യപ്പെട്ടു. നേരത്തെ താന് മത്സരിക്കാനില്ലെന്ന് വ്യക്തമാക്കി ഫെയ്സ്ബുക്കില് ഇട്ട പോസ്റ്റ് പിന്വലിച്ചാണ് അടൂര് പ്രകാശ് തന്റെ നിലപാട് കടുപ്പിച്ചത്. കോന്നിയില് യു.ഡി.എഫ് വിജയത്തിനായി പ്രവര്ത്തിക്കുമെന്നും പാര്ട്ടി തീരുമാനത്തിനൊപ്പം നില്ക്കുമെന്നും ആദ്യം കുറിച്ചെങ്കിലും, സുധാകരന്റെ കാര്യത്തില് അനുകൂല തീരുമാനമുണ്ടാകുമെന്ന് കണ്ടതോടെയാണ് അടൂര് പ്രകാശ് പിന്മാറിയത്.
കോന്നിയില് പാര്ട്ടി നിര്ദ്ദേശിക്കുന്ന സ്ഥാനാര്ത്ഥിയെ വിജയിപ്പിക്കുക എന്നത് ഉത്തരവാദിത്തമാണെന്ന് മുന്പ് പറഞ്ഞിരുന്നെങ്കിലും, നിലവിലെ സാഹചര്യത്തില് അടൂര് പ്രകാശ് തന്നെ അവിടെ സ്ഥാനാര്ത്ഥിയാകുമോ എന്ന കാര്യത്തില് വലിയ ആകാംക്ഷയാണ് നിലനില്ക്കുന്നത്. സീറ്റ് വിഭജനത്തെച്ചൊല്ലിയുള്ള ഈ വടംവലി കോണ്ഗ്രസ് നേതൃത്വത്തെ വലിയ പ്രതിസന്ധിയിലാക്കിയിരിക്കുകയാണ്.
