'ഷട്ട് യുവർ ബ്ലഡി മൗത്ത് മിസ്റ്റർ ആരിഫ് മുഹമ്മദ് ഖാൻ' എന്ന് പറയാൻ അറിയാഞ്ഞിട്ടല്ല; പക്ഷേ, നിങ്ങൾ ഇരിക്കുന്ന പദവിയെ ഞങ്ങൾ ബഹുമാനിക്കുന്നു; കണ്ണൂരിന്റെ ശരിക്കുള്ള ചരിത്രം ഗവർണർക്ക് അറിയില്ല: ഗവർണർക്കെതിരേ ആഞ്ഞടിച്ച് മന്ത്രി പി.എ. മുഹമ്മദ് റിയാസ്

 കോന്നി: നവകേരള സദസിൽ ഗവർണർ ആരിഫ് മുഹമ്മദ് ഖാനെതിരേ ആഞ്ഞടിച്ച് പൊതുമരാമത്ത് മന്ത്രി പി.എ. മുഹമ്മദ് റിയാസ്. 'ഷട്ട് യുവർ ബ്ലഡി മൗത്ത് മിസ്റ്റർ ആരിഫ് മുഹമ്മദ് ഖാൻ' എന്ന് പറയാൻ അറിയാഞ്ഞിട്ടല്ല. ഗവർണറെന്ന പദവിയോടുള്ള ബഹുമാനംകൊണ്ടാണ് അങ്ങനെ പറയാത്തതെന്നും മന്ത്രി പറഞ്ഞു.

കേന്ദ്രം ഭരിക്കുന്ന ബിജെപി അധികാരം ലഭിക്കാത്ത സംസ്ഥാനങ്ങളിലെല്ലാം ഗവർണർ പദവിയുൾപ്പെടെയുള്ള സ്ഥാനങ്ങളെ രാഷ്ട്രീയ ഉപകരണമാക്കുകയാണ്. കോൺഗ്രസ് ഭരിച്ചിരുന്ന സംസ്ഥാനങ്ങളിൽ നിന്നുൾപ്പെടെ ഗവർണർമാരുടെ ഇത്തരം പ്രവർത്തനങ്ങൾക്കെതിരെ വ്യാപക പ്രതിഷേധം ഉയരുന്നുണ്ട്. അത് കേരളത്തിലെ കോൺഗ്രസുകാർ മാത്രം കാണുന്നില്ല.

എന്താണ് ആരിഫ് മുഹമ്മദ് ഖാന് കണ്ണൂരിനോടും കേരളത്തോടും ഇത്ര വിദ്വേഷം? കണ്ണൂരിന്റെ 'ബ്ലഡി ഹിസ്റ്ററി' തനിക്കറിയാമെന്നു പറയുന്ന ആരിഫ് മുഹമ്മദ് ഖാൻ കണ്ണൂരിന്റെ ശരിക്കുള്ള ചരിത്രം പഠിച്ചിട്ടില്ല. കോളനി വിരുദ്ധ പോരാട്ടത്തിൽ നിരവധിപേർ രക്ഷസാക്ഷികളായ മണ്ണാണ് കണ്ണൂർ. കേരളത്തെ വർഗീയവൽക്കരിക്കാൻ കണ്ണൂർ ജില്ലയിലെ തലശ്ശേരിയെ ആർഎസ്എസ് തെരഞ്ഞെടുപ്പോൾ അതിനെ ചെറുത്തതാണ് കണ്ണൂരിന്റെ ചരിത്രം. മുസ്ലിം പള്ളി ആക്രമിക്കാൻ ആർഎസ്എസുകാർ ശ്രമിച്ചപ്പോൾ യു.കെ കുഞ്ഞിരാമനെന്ന സഖാവാണ് പള്ളിക്ക് കാവൽ നിന്നത്. മാപ്പിളയുടെ സന്തതിയെന്നു പറഞ്ഞ് കുഞ്ഞിരാമനെ ആർഎസ്എസുകാർ വകവരുത്തി. അന്ന് വർഗീയകലാപത്തിന് കോപ്പുകൂട്ടിയവരെ തടുത്ത, ജനങ്ങൾക്ക് കാവൽനിന്ന പാരമ്പര്യമാണ് കണ്ണൂരിന്റേത്. അതിനു നേതൃത്വം കൊടുത്തയാളാണ് പിണറായി വിജയനെന്ന് ആരിഫ് മുഹമ്മദ് ഖാൻ തിരിച്ചറിയണം. ചരിത്രത്തെ വക്രീകരിച്ചും തമസ്‌കരിച്ചും ആർഎസ്എസ് ആഗ്രഹിക്കുന്നതുപോലെ കേരളത്തിൽ പ്രവർത്തനം നടത്താനുള്ള ശ്രമത്തിന്റെ ഭാഗമായാണ് മുഖ്യമന്ത്രിയേയും അദ്ദേഹം ജനിച്ചു വളർന്ന കണ്ണൂരിനേയും ആക്രമിക്കാൻ ആരിഫ് മുഹമ്മദ് ഖാൻ പുറപ്പെട്ടിരിക്കുന്നത്.

കേരളത്തിലെ എല്ലാ വിഭാഗം ജനങ്ങളേയും ഒരുമിപ്പിച്ചും യോജിപ്പിച്ചും നിറുത്തി മുന്നോട്ടുപോകാനാണ് കേരളസർക്കാർ ആഗ്രഹിക്കുന്നത്. അത് വർഗീയ പാർട്ടിയായ ബിജെപിക്ക് ഇഷ്ടപ്പെടില്ല. അതുകൊണ്ടാണ് കേരളത്തോട് സാമ്പത്തിക ഉപരോധ സമാനമായ നിലപാട് സ്വീകരിക്കുന്നുത്. സംസ്ഥാനത്തിനു ലഭിക്കേണ്ട ന്യായമായ തുകയാണ് കേന്ദ്രം വെട്ടിക്കുറയ്ക്കുന്നത്. അത് ആരുടേയും തറവാട്ട് സ്വത്തിൽ നിന്ന് എടുത്തുതരുന്നതല്ല. ജനങ്ങൾക്കു ലഭിക്കേണ്ട ന്യായമായ തുകയാണത്. അതേ കേരളം ചോദിച്ചിട്ടുള്ളു. അതേപ്പറ്റി പറയുമ്പോൾ വ്യക്തിയധിക്ഷേപം നടത്തിയല്ല മറുപടി പറയേണ്ടത്. 'നമോപൂജ്യ നിവാരണ പദ്ധതി'യിലൂടെ കേന്ദ്രമന്ത്രിയായ മുരളീധരനാണ് ജനാധിപത്യരീതിയിൽ തെരഞ്ഞെടുക്കപ്പെട്ട സർക്കാരിനെതിരെ സംസാരിക്കുന്നത്.

എൻഎച്ച് 66ന് സ്ഥലമേറ്റെടുക്കാൻ 25 ശതമാനം പണം കേരളം നൽകിയകാര്യം കേന്ദ്ര മന്ത്രി നിതിൻ ഗഡ്കരിയാണ് പാർലമെന്റിൽ പറഞ്ഞത്. എന്നിട്ടും കേരളത്തിന് ദേശീയപാത വികസനത്തിൽ പങ്കില്ലെന്ന് പച്ചക്കള്ളം മുരളീധരൻ ആവർത്തിച്ചുകൊണ്ടിരിക്കുകയാണ്. ഇത് സംസ്ഥാനത്തോടുള്ള നിഷേധാത്മക നിലപാടാണ്. ജനിച്ചുവളർന്ന നാടിനോട് തെല്ലെങ്കിലും കൂറുണ്ടെങ്കിൽ മുരളീധരൻ അങ്ങനെ പറയില്ലെന്നും റിയാസ് കൂട്ടിച്ചേർത്തു.