കേരളത്തില് ചെളികള് കൂടുതല്, താമര ശക്തമായി വളരുന്നത് അതിനാല്; നുണറായിയല്ല നുണറായിസം ആണ് ഇപ്പോള്; തൃശ്ശൂര് മേയര് വര്ഗീസ് നല്ല ആളാണ്, അതില് സംശയമില്ല; അദ്ദേഹത്തെ നിയന്ത്രിക്കുന്ന ചില പിശാചുകളുണ്ട്: സുരേഷ് ഗോപി
കേരളത്തില് ചെളികള് കൂടുതല്, താമര ശക്തമായി വളരുന്നത് അതിനാല്
തൃശൂര്: തൃശൂര് മേയര് എം കെ വര്ഗീസിനെ വീണ്ടും പുകഴ്ത്തി സുരേഷ് ഗോപി എംപി. മേയര് വര്ഗീസ് നല്ല ആളാണ്, അതില് എനിക്ക് സംശയമില്ലെന്നും അദ്ദേഹത്തെ നിയന്ത്രിക്കുന്ന ചില പിശാചുകളുണ്ടെന്നും സുരേഷ് ഗോപി പറഞ്ഞു. മേയര് നല്ല മനുഷ്യനാണെന്നും എന്നാല് അദ്ദേഹത്തെ ചങ്ങലയ്ക്ക് ഇട്ടിരിക്കയാണെന്നും സുരേഷ് ഗോപി മുന്പ് പറഞ്ഞിരുന്നു.
ഇവിടെ നുണറായിയല്ല നുണറായിസം ആണ് ഇപ്പോള്. കുറെ ചെളികള് ഉണ്ടായതുകൊണ്ടാണ് താമരകള് ശക്തമായി വിരിഞ്ഞു കൊണ്ടിരിക്കുന്നത്. കേരളത്തില് ചെളികളുടെ അളവ് വളരെ കൂടുതലാണെന്നും അദ്ദേഹം പറഞ്ഞു.
റെയില്വേ ഓവര് ബ്രിഡ്ജിനായി 15 കോടി അനുവദിച്ചിരിക്കുന്നു എന്ന് പറഞ്ഞത് വടൂക്കരയില് ഫ്ളക്സ് വെച്ചിരിക്കുന്നു. റെയില്വേ അങ്ങനെയൊരു ഓവര് ബ്രിഡ്ജിന്റെ പെര്മിഷന് കൊടുത്തതായി അറിവില്ല. അത് തട്ടിപ്പാണെന്നും സുരേഷ് ഗോപി പറഞ്ഞു. ആര്ടിഐ ചുരണ്ടിയെടുത്ത മഹാന്മാര് എല്ലാം ചെമ്പ് ചുരണ്ടിയവരാണ്. ആ ചെമ്പ് ചുരണ്ടിയവരെല്ലാം ഇപ്പോള് ചെമ്പിലോ സ്വര്ണ്ണത്തിലോ കിടന്ന് തിളച്ച് പൊങ്ങുകയാണെന്നും അദ്ദേഹം പറഞ്ഞു.
തദ്ദേശ സ്വയംഭരണ തിരഞ്ഞെടുപ്പ് പ്രചാരണത്തില് കലുഷിതമായൊരു അന്തരീക്ഷം സൃഷ്ടിച്ച് അതില്നിന്ന് മുതലെടുപ്പുനടത്താന് ഇടതുവലതു മുന്നണികള് ശ്രമിക്കുന്നുവെന്ന് സുരേഷ് ഗോപി പന്തളത്ത് പറഞ്ഞിരുന്നു. ശബരിമല ഹിന്ദുവിന്റെ മാത്രം അവകാശമല്ല, ശബരിമലയില് അടിസ്ഥാന സൗകര്യങ്ങളില്ലാത്തതാണ് തിരക്കുനിയന്ത്രണത്തിലും മറ്റുമുണ്ടാകുന്ന പ്രശ്നം, ഇപ്പോഴുള്ള സൗകര്യങ്ങള് അപര്യാപ്തമാണ്, സുഖകരമായ ദര്ശനം നടത്താനുള്ള സൗകര്യമാണ് വേണ്ടത്, ശബരിമലയുടെ കാര്യത്തില് കേന്ദ്ര സര്ക്കാരിന് ഇടപെടേണ്ട സമയവും മാര്ഗങ്ങളുമുണ്ട് അതുണ്ടാകും.
ഏകീകൃത സിവില്കോഡ് നിലവില്വരുന്നതോടെ ശബരിമലയില് വലിയമാറ്റങ്ങള് വരും. നൂറ് ഇവി ബസുകളാണ് ശബരിമലയിലേക്ക് കേന്ദ്രം അനുവദിച്ചത്. മോദിയുടെ ഫോട്ടോ വെയ്ക്കുമോ എന്ന് ഭയപ്പെട്ട് അത് പ്രാബല്യത്തില് വരുത്താതിരിക്കുകയാണ്, ഈ സീസണിലെങ്കിലും അത് ഉപയോഗിക്കണം, കേന്ദ്രപദ്ധതികള് പലതും ഇവിടെ നടപ്പാക്കാനാകുന്നില്ലെന്നും സുരേഷ്ഗോപി പറഞ്ഞു.
