ഖത്തറിൽ കാറിന്‍റെ ടയർപൊട്ടി അപകടം; പരിക്കേറ്റ ചികിത്സയിലായിരുന്ന പ്രവാസി മലയാളിയായ വിദ്യാർത്ഥി മരിച്ചു; രണ്ട് പേർ രക്ഷപ്പെട്ടു
ദോഹ: ഖത്തറിൽ വച്ച് നടന്ന വാഹനാപകടത്തില്‍ ഗുരുതരമായി പരിക്കേറ്റ് ചികിത്സയില്‍ കഴിഞ്ഞിരുന്ന മലയാളി വിദ്യാര്‍ത്ഥി മരിച്ചു. തൃശൂർ പുന്നയൂർക്കുളം സ്വദേശി വീട്ടിലെ വളപ്പിൽ ഷാജഹാൻ - ഷംന ദമ്പതികളുടെ മകനായ മുഹമ്മദ് ഹനീന് (17) ആണ് മരണത്തിന് കീഴടങ്ങി.
നോബിള്‍ ഇന്‍റര്‍നാഷണൽ സ്‌കൂള്‍ പന്ത്രണ്ടാം ക്ലാസ് വിദ്യാര്‍ത്ഥിയാണ്. ദേശീയ ദിനത്തിന്റെ പൊതുഅവധി ദിവസം സുഹൃത്തുക്കൾക്കൊപ്പം കാറിൽ സഞ്ചരിക്കവെ വുഖൈറിൽ വെച്ചാണ് അപകടം നടന്നത്. കാറിന്‍റെ ടയർപൊട്ടി നിയന്ത്രണം വിട്ടാണ് അപകടം ഉണ്ടായത്.
അപകടത്തിൽ ഹനീന് തലക്ക് വളരെ ഗുരുതരമായി പരിക്കേറ്റിരിന്നു. സഹയാത്രികരായ രണ്ട് സുഹൃത്തുക്കൾ കാര്യമായ പരിക്കില്ലാതെ രക്ഷപ്പെടുകയും ചെയ്തു. ആയിഷയാണ് ഹനീന്റെ സഹോദരി.
പിതാവ് ഷാജഹാൻ മുൻ ഖത്തർ എനർജി ജീവനക്കാരനും നോബിൾ ഇന്റർനാഷനൽ സ്കൂൾ സ്ഥാപക അംഗവുമാണ്. പ്രവാസി വെൽഫെയർ റിപാട്രിയേഷൻ വിങ്ങിനു കീഴിൽ നടപടിക്രമങ്ങൾ പൂർത്തിയാക്കിയ ശേഷം മൃതദേഹം നാട്ടിലേക്ക് കൊണ്ടുപോകുമെന്ന് ബന്ധപ്പെട്ടവർ വ്യക്തമാക്കി.
