ഇനി 'ഫ്ലൈറ്റ് ഫൈൻഡർ ആപ്പ്' തുറന്നാൽ മിക്ക രാജ്യങ്ങളുടെ ആകാശത്ത് ഇവനെ കാണാൻ പറ്റും; യാത്രക്കാർക്ക് സന്തോഷ വാർത്തയുമായി ഖത്തർ എയർവേയ്‌സ്

ദോഹ: ആഗോളതലത്തിൽ യാത്രാ ആവശ്യകത വർധിച്ചു വരുന്ന സാഹചര്യത്തിൽ, ഖത്തറിന്റെ ദേശീയ വിമാനക്കമ്പനിയായ ഖത്തർ എയർവേയ്‌സ് നിരവധി പ്രധാന റൂട്ടുകളിലേക്കുള്ള സർവീസുകളുടെ എണ്ണം വർധിപ്പിച്ചു.

ക്വലാലംപൂർ, ലാഗോസ്, ഷാങ്ഹായ്, സിംഗപ്പൂർ എന്നീ റൂട്ടുകളിലേക്കാണ് പ്രധാനമായും അധിക ശൈത്യകാല സർവീസുകൾ പ്രഖ്യാപിച്ചിട്ടുള്ളത്.

കേപ് ടൗൺ, ഡബ്ലിൻ, ലണ്ടൻ, ഫുക്കറ്റ്, ടൊറന്റോ എന്നിവയുൾപ്പെടെ 15-ൽ അധികം സ്ഥലങ്ങളിലേക്ക് കൂടുതൽ വിമാനങ്ങൾ ചേർത്തുള്ള വിപുലമായ ശൈത്യകാല ഷെഡ്യൂൾ വിപുലീകരണത്തിന്റെ ഭാഗമായാണ് പുതിയ പ്രഖ്യാപനം.

വർധിച്ചുവരുന്ന യാത്രക്കാരുടെ ഡിമാൻഡ് കാരണം, ഈ വർഷം ഏകദേശം 3,000 അധിക വിമാനങ്ങൾ എയർലൈൻ സർവീസ് നടത്തി. ഏറ്റവും മികച്ച യാത്രാനുഭവം നൽകുന്നതിനുള്ള പ്രതിബദ്ധതയുടെ ഭാഗമായി, 2025-ൽ ഒമ്പതാം തവണയും സ്കൈട്രാക്സ് ലോകത്തിലെ ഏറ്റവും മികച്ച എയർലൈനായി ഖത്തർ എയർവേയ്‌സിനെ തിരഞ്ഞെടുത്തിരുന്നു.