ജനിച്ചത് അധികാരത്തിന് നടുവിലാണെങ്കിലും അതിനോട് താത്പര്യമില്ല; ഇന്ത്യയെ മനസിലാക്കാനാണ് താൻ ശ്രമിച്ചിട്ടുള്ളതെന്ന് രാഹുൽ ഗാന്ധി

ന്യൂഡൽഹി: താൻ ജനിച്ചത് അധികാര കേന്ദ്രത്തിലാണെന്നും എന്നാൽ അധികാരത്തോട് താത്പര്യം തോന്നിയിട്ടില്ലെന്നും വ്യക്തമാക്കി കോൺഗ്രസ് നേതാവ് രാഹുൽ ഗാന്ധി. ചില രാഷ്ട്രീയ നേതാക്കൾക്ക് അധികാരം നേടുന്നതിൽ മാത്രമാണ് താത്പര്യമെന്നും രാഹുൽ വിമർശിച്ചു. മുഴുവൻ സമയവും അധികാരം നേടി ശക്തരാകുന്നതിനെക്കുറിച്ച് മാത്രമാണ് ഇത്തരക്കാരുടെ ചിന്തയെന്നും അദ്ദേഹം പറഞ്ഞു.

അധികാരം പിടിക്കുന്നതിലുപരി ഇന്ത്യയെന്ന രാജ്യത്തെ മനസ്സിലാക്കാനാണ് താൻ ശ്രമിച്ചിട്ടുള്ളതെന്ന് രാഹുൽ പറഞ്ഞു. ന്യൂഡൽഹിയിലെ ഒരു പുസ്തക പ്രകാശന ചടങ്ങിൽ പങ്കെടുത്ത് സംസാരിക്കുകയായിരുന്നു അദ്ദേഹം.തനിക്ക് രാജ്യത്ത് നിന്നും ഒരുപാട് സ്‌നേഹവും വെറുപ്പും കിട്ടിയെന്ന് രാഹുൽ പറഞ്ഞു. തനിക്ക് കിട്ടുന്ന ഓരോ വേദനയും എന്തെങ്കിലും പഠിപ്പിക്കുന്നുവെന്നും അദ്ദേഹം കൂട്ടിച്ചേർത്തു.

അതേസമയം യുപി നിയമസഭാ തെരഞ്ഞെടുപ്പിന് മുന്നോടിയായി മായാവതി നയിക്കുന്ന ബിഎസ്‌പിയുമായി സഖ്യമുണ്ടാക്കാൻ കോൺഗ്രസ് ശ്രമം നടത്തിയിരുന്നുവെന്നും രാഹുൽ പറഞ്ഞു. എന്നാൽ മായാവതി പ്രതികരിച്ചില്ലെന്നും രാഹുൽ വെളിപ്പെടുത്തി.