അർധരാത്രി വീട്ടിൽ അതിക്രമിച്ച് കയറി പ്രായം തികയാത്ത പെൺകുട്ടിയെ പീഡിപ്പിക്കാൻ ശ്രമം: പ്രതിയെ അറസ്റ്റ് ചെയ്ത് അടൂർ പൊലീസ്

അടൂർ: അർധരാത്രി സമയത്ത് വീട്ടിൽ അതിക്രമിച്ചു കയറി പ്രായപൂർത്തിയാകാത്ത പെൺകുട്ടിയെ പീഡിപ്പിക്കാൻ ശ്രമിച്ച കേസിൽ യുവാവ് അറസ്റ്റിൽ.

മൂന്നാളം പിലാമിറ്റത്ത് വീട്ടിൽ ബൈജു(32)വാണ് പിടിയിലായത്. തിങ്കളാഴ്ച അർധരാത്രിയോടെയായിരുന്നു ബൈജുവിന്റെ പീഡനശ്രമം. ഇതു കണ്ട് മാതാവ് ബഹളം വച്ചതിനെ തുടർന്ന് ഇയാൾ ഓടി രക്ഷപ്പെട്ടു.

കുട്ടിയുടെ മൊഴിപ്രകാരം പൊലീസ്‌കേസ് രജിസ്റ്റർ ചെയ്തു. മാതാവും കുട്ടിയും നൽകിയ വിവരങ്ങളുടെ അടിസ്ഥാനത്തിൽ അന്വേഷണം ആരംഭിച്ചു. പ്രതിയെ അടൂർ ബൈപ്പാസിന് സമീപത്ത് നിന്നും ഇന്നലെ രാത്രി കസ്റ്റഡിയിലെടുത്തു. ഡിവൈ.എസ്‌പി ആർ.ബിനുവിന്റെ നിർദ്ദേശ പ്രകാരം പൊലീസ് ഇൻസ്പെക്ടർ റ്റി.ഡി പ്രജീഷിന്റെ നേതൃത്വത്തിലുള്ള സംഘമാണ് ഇയാളെ പിടികൂടിയത്.

കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. സ്ത്രീകളെ ആക്രമിച്ചതടക്കമുള്ള കേസിലെ പ്രതിയാണ് ഇയാൾ. എസ്‌ഐ. വിപിൻ കുമാർ, സിവിൽ പൊലീസ് ഓഫീസർമാരായ സൂരജ്, അമൽ, പ്രവീൺ, നിസാർ,അരുൺ, സതീഷ് എന്നിവരാണ് അന്വേഷണ സംഘത്തിലുള്ളത്.