ഹരീഷ് റാവത്തിനെ അനുനയിപ്പിച്ച് കോൺഗ്രസ്; ഉത്തരാഖണ്ഡ് തിരഞ്ഞെടുപ്പിൽ പാർട്ടിയെ നയിക്കും
ന്യൂഡൽഹി: ഇടഞ്ഞുനിന്ന മുതിർന്ന കോൺഗ്രസ് നേതാവ് ഹരീഷ് റാവത്തിനെ അനുനയിപ്പിച്ച് കോൺഗ്രസ് നേതൃത്വം. ഉത്തരാഖണ്ഡ് തിരഞ്ഞെടുപ്പിന് ദിവസങ്ങൾ മാത്രം ബാക്കിനിൽക്കെ താൻ പാർട്ടിയിൽ നിന്ന് വിട്ടുനിൽക്കുമെന്ന് ട്വീറ്റ് ചെയ്ത അദ്ദേഹം താൻ പൂർണസംതൃപ്തനാണെന്നായിരുന്നു വെള്ളിയാഴ്ച പ്രതികരിച്ചത്. രാഹുൽ ഗാന്ധിയുമായുള്ള കൂടിക്കാഴ്ചയ്ക്ക് ശേഷമായിരുന്നു മഞ്ഞുരുകൽ.
'ഞാൻ പൂർണ സംതൃപ്തനാണ്. ഉത്തരാഖണ്ഡ് തിരഞ്ഞെടുപ്പ് എന്റെ നേതൃത്വത്തിൽ തന്നെയാകും കോൺഗ്രസ് മത്സരിക്കുകയെന്ന് ഹൈക്കമാൻഡ് എന്നോട് പറഞ്ഞിട്ടുണ്ട്. നാമെല്ലാവരും ഒറ്റക്കെട്ടായി നിൽക്കണം,' ഹരീഷ് റാവത്ത് മാധ്യമപ്രവർത്തകരോട് പറഞ്ഞു.
താൻ മുഖ്യമന്ത്രിയാകണോ വേണ്ടയോ എന്നത് തിരഞ്ഞെടുപ്പിന് ശേഷം നിയമസഭാ കക്ഷി തീരുമാനിക്കുമെന്നും തിരഞ്ഞെടുപ്പിൽ വിജയിക്കുക എന്നതാണ് ഏക ലക്ഷ്യമെന്നും റാവത്ത് മാധ്യമപ്രവർത്തകരോട് പറഞ്ഞു.
'എന്റെ കൈകൾ ഇപ്പോൾ കൂട്ടിക്കെട്ടിയിട്ടില്ല. ഞങ്ങളെല്ലാവരും കോൺഗ്രസിന്റെ ഭടന്മാരാണ്,' അദ്ദേഹം പറഞ്ഞു. തനിക്കുണ്ടായിരുന്ന അഭിപ്രായവ്യത്യാസങ്ങൾ ഇനി അടഞ്ഞ അധ്യായമാണെന്നും അദ്ദേഹം കൂട്ടിച്ചേർത്തു.
