മോഷ്ടിച്ചെടുത്ത ബൈക്കുമായി കറങ്ങി നടന്ന് കവർച്ച; പെരുമ്പാവൂരിൽ നാല് പ്രതികൾ പിടിയിൽ; രണ്ടുപേർ പ്രായപൂർത്തിയാകാത്തവർ

ആലുവ:നിരവധി മോഷണ കേസുകളിലെ പ്രതികളായ 4 പേർ പെരുമ്പാവൂരിൽ പൊലീസിന്റെ പിടിയിലായി. കോട്ടുവള്ളി കൈതാരം ചെറുപറമ്പ് കൈതാരം വീട്ടിൽ ശരത് (19), തൃക്കാക്കര കൈപ്പട മുകൾഭാഗത്ത് പുതുശ്ശേരി വീട്ടിൽ അശ്വിൻ (19) എന്നിവരും പ്രായപൂർത്തിയാകാത്ത രണ്ടു പേരുമാണ് പിടിയിലായത്.

പെരുമ്പാവൂർ മാവിൻചുവട് ഭാഗത്തുനിന്നും ഫസൽ എന്നയാളുടെ ഡ്യൂക്ക് ബൈക്ക് മോഷണം പോയ സംഭവത്തെപ്പറ്റി അന്വേഷണം നടത്തി വരവേയാണ് പ്രതികൾ അറസ്റ്റിലായത്. മോഷ്ടിച്ചെടുത്ത ബൈക്കുമായി പ്രതികൾ കറങ്ങി നടക്കുമ്പോഴാണ് ആലുവ റൂറൽ എസ് പി കെ.കാർത്തിക്കിന്റെ നേതൃത്വത്തിലുള്ള പ്രത്യേക അന്വേഷണ സംഘം മോഷ്ടാക്കളെ പിടികൂടുന്നത്.

ഡ്യൂക്ക് ബൈക്ക് പൊലീസ് കസ്റ്റഡിയിലെടുത്തു. ഇവർക്കെതിരെ നിരവധി പൊലീസ് സ്റ്റേഷനുകളിൽ മോഷണ കേസുകൾ നിലവിലുണ്ട്.രണ്ടുപേർ പ്രായപൂർത്തി ആകാത്തതിനെ തുടർന്ന് കാക്കനാട് ജുവനൈൽ ഹോമിൽ ഹാജരാക്കി.പെരുമ്പാവൂർ ഡി വൈ എസ് പി എൻ.ആർ ജയരാജ് ഇൻസ്‌പെക്ടർ രാഹുൽ രവീന്ദ്രൻ, എസ് ഐമാരായ അജിത്ത്, ഉണ്ണികൃഷ്ണൻ ശിവാസ് സി പി ഒ മാരായ സിജോ പോൾ, പ്രീജിത്, മീരൻ, സാബു എന്നിവരടങ്ങുന്ന പ്രത്യേക അന്വേഷണ സംഘമാണ് പ്രതികളെ അറസ്റ്റ് ചെയ്തത് കോടതിയിൽ ഹാജരാക്കി റിമാൻഡ് ചെയ്തു.