ഭക്തർക്ക് ദർശന സുകൃതമായി തങ്ക അങ്കി ചാർത്തി ദീപാരാധന ഇന്ന് ; മണ്ഡലകാല തീർത്ഥാടനത്തിന് നാളെ പരിസമാപ്തി; മണ്ഡല പൂജ നാളെ ഉച്ചയോടെ

ശബരിമല : ശരണമന്ത്രങ്ങളുമായി മലകയറിയെത്തുന്ന അയ്യപ്പ ഭക്തർക്ക് ദർശന സുകൃതമായി ഇന്ന് തങ്ക അങ്കി ചാർത്തി ദീപാരാധന നടക്കും.തങ്കഅങ്കി ഘോഷയാത്ര ഇന്ന് ഉച്ചയ്ക്കു പമ്പയിൽ എത്തും.

3 മണി വരെ പമ്പാ ഗണപതികോവിലിൽ ദർശനത്തിനു വയ്ക്കും. പിന്നീട് പെട്ടിയിലാക്കി ചുമന്ന് അയ്യപ്പസേവാ സംഘം പ്രവർത്തകർ സന്നിധാനത്തെത്തിക്കും. സോപാനത്ത് തന്ത്രി കണ്ഠര് മഹേഷ് മോഹനരും മേൽശാന്തി എൻ.പരമേശ്വരൻ നമ്പൂതിരിയും ഏറ്റുവാങ്ങും. തുടർന്ന് തങ്ക അങ്കി അയ്യപ്പ വിഗ്രഹത്തിൽ ചാർത്തി ദീപാരാധന.

മണ്ഡലകാല തീർത്ഥാടനത്തിനു സമാപ്തി കുറിച്ചു നാളെയാണു മണ്ഡലപൂജ.നാളെ പകൽ 11.50നും 1.15നുമിടയ്ക്കു മീനം രാശി മുഹൂർത്തത്തിൽ തങ്ക അങ്കി ചാർത്തി മണ്ഡലപൂജ നടക്കും. മണ്ഡലകാല തീർത്ഥാടന ചടങ്ങുകൾ പൂർത്തിയാക്കി 10നു നട അടയ്ക്കും. മകരവിളക്ക് തീർത്ഥാടനത്തിനായി 30നു വൈകിട്ട് 5നു വീണ്ടും തുറക്കും.