ബിജെപിയിൽ നേരിട്ട് കുറ്റം പതിക്കാതിരിക്കാൻ യുവമോർച്ചക്കാരന്റെ നേതൃത്വത്തിലെ ക്വട്ടേഷൻ സംഘത്തെ വിലയ്ക്ക് എടുത്തുവെന്ന് സിപിഎം; കരുവാറ്റ ലോഡ്ജിൽ പദ്ധതി; കോട്ടയത്തെ കോർക്കമ്മറ്റിക്കെതിരേയും ദേശാഭിമാനി; സന്ദീപിനെ കുത്തിക്കൊന്നത് ബിജെപിക്കാരെന്ന് എഫ് ഐ ആറും; പെരിങ്ങരയിൽ നിലപാട് മാറ്റി പൊലീസും

പത്തനംതിട്ട: തിരുവല്ലയിലെ സിപിഎം നേതാവ് സന്ദീപിന്റെ കൊലപാതകത്തിൽ രാഷ്ട്രീയമില്ലെന്ന മുൻ നിലപാട് പൊലീസ് മാറ്റി. പ്രതികൾ ബിജെപി പ്രവർത്തകരെന്ന് പൊലീസ് എഫ്‌ഐആർ വിശദീകരിക്കുന്നു. സന്ദീപിനെ ആക്രമിച്ചതുകൊല്ലാൻ വേണ്ടി തന്നെ ആണെന്നും എഫ്‌ഐആറിൽ വ്യക്തമാക്കുന്നു.

സന്ദീപ് കുമാറിനെ(36) കുത്തിക്കൊന്നത് ആർഎസ്എസ് ക്വട്ടേഷൻ സംഘമാണെന്ന് ദേശാഭിമാനിയും റിപ്പോർട്ട് ചെയ്യുന്നു. കൊലപാതകത്തിൽ നേരിട്ട് പങ്കാളികാളായ അഞ്ചുപേരാണ് മണിക്കൂറുകൾക്കകം പിടിയിലായത്. യുവമോർച്ച പെരിങ്ങര പഞ്ചായത്ത് പ്രസിഡന്റ് തിരുവല്ല ചാത്തങ്കേരി പള്ളിപ്പറമ്പിൽ ജിഷ്ണു(23), വേങ്ങൽ നന്ദു ഭവനിൽ നന്ദു(24), ചങ്ങനാശേരി പായിപ്പാട് പള്ളിക്കൽചിറ കൊച്ചുപറമ്പിൽ വീട്ടിൽ പ്രമോദ് (23), കണ്ണൂർ ചെറുപുഴകുന്നിൽ വീട്ടിൽ മുഹമ്മദ് ഫൈസൽ (22), ഹരിപ്പാട് കരുവാറ്റ അഭിജിത്ത് ഭവനിൽ അഭിജിത്ത്(25) എന്നിവരെയാണ് പൊലീസ് അറസ്റ്റ് ചെയ്തത്.

ഒന്നാം പ്രതി ജിഷ്ണുവാണ് മറ്റുപ്രതികളെ കൊലപാതകത്തിനായി കൂട്ടിയോജിപ്പിച്ചത്. ജിഷ്ണുവിനേയും രണ്ടും മൂന്നും പ്രതികളായ പ്രമോദ്, നന്ദു എ ന്നിവരെ കരുവാറ്റയിലെ ഒരു വീട്ടിൽനിന്നും വെള്ളിയാഴ്ച പുലർച്ചെ മൂന്നോടെയാണ് പിടികൂടിയത്. അഞ്ചാം പ്രതി അഭിജിത്തിനെ നിരണം തോട്ടടിയിൽനിന്നും നാലാം പ്രതി മുഹമ്മദ് ഫൈസലിനെ കുറ്റൂരിലെ ലോഡ്ജിൽ നിന്നും അറസ്റ്റ് ചെയ്തു. മുഹമ്മദ് ഫൈസലിന്റെ വിലാസത്തിൽ തെറ്റുണ്ടെന്നാണ് പൊലീസ് നിഗമനം. ഇത് കണ്ടെത്താനും ശ്രമം തുടങ്ങിയിട്ടുണ്ടെന്ന് ദേശാഭിമാനി പറയുന്നു. എന്നാൽ ജിഷ്ണുവിന് ബിജെപി ബന്ധമുണ്ടെന്നും മൂന്ന് പ്രതികൾ സിപിഎമ്മുകാരാണെന്നും ബിജെപിയും പറയുന്നുണ്ട്.

കൊലപാതകം രാഷ്ട്രീയ കൊലപാതകമല്ലെന്നും വ്യക്തി വൈരാഗ്യമെന്നുമായിരുന്നു നേരത്തെ പൊലീസ് പറഞ്ഞിരുന്നത്. ഇതിനെതിരെ സിപിഎം പ്രതിഷേധവുമായി വന്നു. ഇതിന് ശേഷമാണ് പ്രതികൾ ബിജെപിക്കാരാണെന്ന് എഫ് ഐ ആർ പറയുന്നത്.പ്രതികൾ ബിജെപി പ്രവർത്തകരെന്നാണ് പുറത്തു വന്ന എഫ്‌ഐആഫിൽ വ്യക്തമാക്കുന്നത്. സന്ദീപിന്റെ കൊലപാതകത്തിന് പിന്നാലെ ഇതൊരു രാഷ്ട്രീയ കൊലപാതകമാണെന്ന് സിപിഎം നേതൃത്വം പറഞ്ഞിരുന്നു. എന്നാൽ ജില്ലാ പൊലീസ് സൂപ്രണ്ട് അടക്കമുള്ള ആളുകൾ സംഭവത്തിൽ രാഷ്ട്രീയപരമായ ബന്ധം തള്ളുകയും മുൻവൈരാഗ്യമാണ് കാരണമെന്നുമായിരുന്നു വ്യക്തമാക്കിയിരുന്നത്.

ഇത് ഏറെ വിവാദമായിരുന്നു. എന്നാൽ പ്രതികളെ കോടതിയിൽ ഹാജരാക്കാൻ കൊണ്ടു പോകുന്നതിന് തൊട്ടു മുമ്പ് പുറത്തുവന്ന എഫ്‌ഐആറിലാണ് പ്രതികളുടെ രാഷ്ട്രീയം വ്യക്തമാക്കുന്നത്. ബിജെപി പ്രവർത്തകരായ അഞ്ചു പേർക്ക് സിപിഎം പ്രവർത്തകനായ സന്ദീപിനോട് വൈരാഗ്യമുണ്ടായിരുന്നു. ഇത് കണക്കിലെടുത്ത് മുൻകൂട്ടി കൊലപ്പെടുത്തുക എന്ന ഉദ്ദേശത്തോട് കൂടി മാരകായുധങ്ങളുമായെത്തി ആസൂത്രിതമായി ആക്രമിച്ച് മുറിവേൽപ്പിച്ചു കൊലപ്പെടുത്തി എന്നാണ് എഫ്‌ഐആറിൽ പറയുന്നത്.

പ്രതികൾക്കെതിരെ അന്യായമായ സംഘം ചേരൽ, കൊലപാതകം, വധഭീഷണി തുടങ്ങിയ എട്ടു വകുപ്പുകൾ ചേർത്താണ് കേസെടുത്തിരിക്കുന്നത്. സന്ദീപ് കുമാറിനെ ആർഎസ്എസ്-- ബിജെപി ക്രിമിനൽ സംഘം കൊലപ്പെടുത്തിയത് നേതൃത്വത്തിന്റെ അറിവോടെ എന്നാണ് സിപിഎം ആരോപിക്കുന്നത്. പത്തനംതിട്ടയിൽ ബിജെപിയിൽ നിന്ന് പ്രവർത്തകർ കൊഴിഞ്ഞുപോകുന്നത് തടയുന്നതിന് അരാജത്വം സൃഷ്ടിക്കുക എന്ന ലക്ഷ്യത്തോടെയായിരുന്നു ആസൂത്രണം. അന്വേഷണം ഉന്നതരിലേക്ക് നീളുകയാണെന്ന് ദേശാഭിമാനി റിപ്പോർട്ട് ചെയ്യുന്നു.

ബിജെപിയിൽ നേരിട്ട് കുറ്റം പതിക്കാതിരിക്കാൻ യുവമോർച്ച നേതാവിന്റെ നേതൃത്വത്തിലുള്ള ക്വട്ടേഷൻ സംഘത്തെ വിലയ്ക്ക് എടുക്കുകയായിരുന്നുവെന്നാണ് സൂചന. ഇതു സംബന്ധിച്ച് ഉന്നതതല അന്വേഷണം വേണമെന്ന് സിപിഐ എം ആവശ്യപ്പെട്ടിട്ടുണ്ട്. കഴിഞ്ഞ തെരഞ്ഞെടുപ്പിൽ ജില്ലയിലെ അഞ്ച് മണ്ഡലങ്ങളിലും എൽഡിഎഫിനായിരുന്നു ജയം. ഭൂരിപക്ഷം തദ്ദേശസ്ഥാപനങ്ങളിലും എൽഡിഎഫ് ഭരണം വന്നതുമുതൽ നാടിന്റെ ക്രമസമാധാനം തകർക്കാൻ ബിജെപി ആസൂത്രിത ശ്രമങ്ങൾ തുടങ്ങിയിരുന്നു. പത്തനംതിട്ടയിൽ ബിജെപി, ആർഎസ്എസ് പ്രവർത്തകർ കൂട്ടത്തോടെ കുടുംബസമേതം സിപിഐ എമ്മിനൊപ്പം ചേർന്നിരുന്നു.

പെരിങ്ങര പഞ്ചായത്ത് ഉൾപ്പെടുന്ന തിരുവല്ല ഏരിയയിൽ അടുത്തിടെ നൂറുകണക്കിനുപേർ ബിജെപിവിട്ട് സിപിഐ എമ്മിനൊപ്പം എത്തി. ഇത് ബിജെപിയെ അലോസരപ്പെടുത്തി. നവംബർ 29ന് കോട്ടയത്ത് ചേർന്ന ബിജെപി കോർ കമ്മിറ്റി യോഗത്തിൽ ഇതു ചർച്ചയ്ക്ക് വന്നിരുന്നു. പിന്നാലെ റാന്നിയിലും പത്തനംതിട്ടയിലും യോഗം ചേർന്നു. ബിജെപി അധ്യക്ഷൻ കെ സുരേന്ദ്രനടക്കം പങ്കെടുത്ത ഈ യോഗങ്ങളിലാണ് അരാജകത്വം സൃഷ്ടിക്കാൻ പ്രാഥമികധാരണയായതെന്ന് ദേശാഭിമാനി പറയുന്നു.

ഇതിനു പിന്നാലെ കരുവാറ്റയിലെ ലോഡ്ജിലാണ് സന്ദീപിനെ വധിക്കാനുള്ള പദ്ധതി തയ്യാറാക്കിയതെന്ന സൂചന പൊലീസിന് ലഭിച്ചിട്ടുണ്ട്. ഇതിനായി മയക്കുമരുന്ന്, മദ്യമാഫിയ, ക്വട്ടേഷൻ സംഘത്തിലുള്ളവരെവരെയും സംഘടിപ്പിച്ചു. സിപിഐ എം ലോക്കൽ സെക്രട്ടറിയെ അരുംകൊല ചെയ്താണ് ഇതിന് തുടക്കമിട്ടത്. തലശേരിയിലെ കലാപനീക്കവും കോർ കമ്മിറ്റി തീരുമാനം ശരിവെയ്ക്കുന്നു.

യുവമോർച്ച പെരിങ്ങര പഞ്ചായത്ത് അധ്യക്ഷൻ ജിഷ്ണു ആണ് മുഖ്യപ്രതി. ബിജെപി സമരങ്ങളുടെ മുൻനിരയിലും നേതാക്കൾക്കൊപ്പവുമുള്ള ജിഷ്ണുവിന്റെ നിരവധി ചിത്രങ്ങളാണ് സമൂഹ മാധ്യമങ്ങളിലുള്ളത്. ബിജെപി വക്താവ് സന്ദീപ് വാര്യരോടൊപ്പമുള്ള ചിത്രവുമുണ്ട്-ദേശാഭിമാനി പറയുന്നു.